युँ हुप्न्या
1उयुँ हुबो मिँए परमेस्वरए ओय़ाकार साचो ज़ थ·रैद ओमारँःवलाई ब उरँःधुव मिताव ज़ जैज़्याव। 2भाःकाव मिँर ब यायुँ उहुबोनी ज़ परमेस्वरए उयुँलावर ताकेर।
3परमेस्वरए ओपाँत गेयुँ उहुबोनी ज़ ‘परमेस्वरए ओयाःनी नाम नम ओजैव’ लिन्या गेथ·रैज़्या। है जैद ताव भरी गेमारँःवनी ज़ ताकेर। 4युँ हुबोनी ज़ हाबिलए ओदाज्यु कयिनकिन परमेस्वरलाई चाव चरैःक्यो। उयुँ उहुबोनी ज़ धर्मी थ॰रिके। ओसाची परमेस्वरलाई ओचरैःव रैद ओयोनी ज़ रैंःज़्या। नो ओल उसिदी ब ओय़ेन ते मासिए, पाँव ज़ लिज़्या।
5फरी युँ हुबोनी ज़ हनोक पाला मासिद ज़ स्वर्गत छींसिके। नोलाई परमेस्वरए ओलस ज़ ओलाँवए साप्द ब मादैकेर। नो मिँ परमेस्वरए ओलस ओमालाँद ज़ उयुँलाव मिताव थ॰रिउ उलिज़्याव धर्मसास्त्रल ब रैंःज़्या। 6उयुँ माहुप्ज़्याव मिँए खर्क ज़ परमेस्वरए उयुँ होलाँ जैद माएधुव। जो परमेस्वरए ल्योदा हुज़्या, होए ङ़ादा ‘परमेस्वर लिज़्या ज़’ लिद पतिउ ताके, नकिन ‘ओललाई खिम्ज़्याव मिँए ल्योदा उयुँ य़ालो ज़ लिज़्या’ लिन्या ब पतिउ ताके।
7युँ हुबोनी ज़ नोआए पाला हुन्या पाँर ओमाहुद ज़ परमेस्वरए है ओदोव उयुँ हुप्द उझ़िमलावरालाई बाँचैन्याए जूँनी ङ़ादाकिन ज़ ऱी जहाज जैक्यो। ननी ज़ मानुवाताव मिँ भरी ओपो·स ज़ अधर्मीर रैंःकेर। ओल ते उयुँ उहुबोनी ज़ परमेस्वरए उयुँलाव मितावल गनिसिके।
8परमेस्वरए अब्राहामलाई याव ओपैंज़्याव पोदा उखुल्क उयुँ उहुबोनी ज़ नो पो मासैंद ज़ परमेस्वरए ओपाँ भैंःद पुलुस्द बाके। 9नो पो ओल उजिउ भरिल ओमादैदी ब परमेस्वरए ओपाँत उयुँ उहुबोए नल ज़ खासिद लिके। ओज़ा इसहाक, ओनाती याकूबए ओपालाक पै नो पोल ज़ पालल खासिद लिकेर। नोनी ब अब्राहामए ओदैव य़ाका दैवनी निल्यो। 10ओल अब्राहामए उखिम्ज़्याव ते आव मानुवाताव सहररालाई माःक, परमेस्वरए ओजैव खर्क ज़ माखेम्न्या सहरलाई ची।
11ओज्या साराए मनी उयुँ उहुबोनी ज़ जूचास्द ब परमेस्वरए ओसक्ती दैद ज़ा तोबो दैक्यो। नो ज़ा दैन्या य़ाका याज़्याव परमेस्वरलाई ङ़ादा ज़ थ·रैद ओनैज़्याव। 12है जैद अब्राहाम बनै सेर्द फ्या·न्याल गनिसिउ उलिदी ब ओथोर नमताव सोरोर, स़ोनो समुन्द्रलाव बालुवा स्यासो मागनिसिधुन्यार ताकेर।
यायुँ हुबोराए स्वर्गताव पो खिम्ज़्यार
13आवर परमेस्वरए ओरायो य़ाका याजिउत यामादैदी ब यायुँ हुप्द ज़ सिकेर। नो य़ाका तादानी ज़ यारँःव मिताव जैद यायुँ नदा ज़ झाःकेर। नोर आव जुनील याझ़िम मालिद खासिद यालिज़्याव मिताव जैसिकेर। 14निताव जैसिज़्यावर साचो यादेस याखिम्ज़्याव रैंःज़्या। 15निताव यामाताकिन याख्यानैव देसलाई मामेंःद ओल्द बाखेरहो। 16खाली आवराए ते या याख्यानैव देसकिन झन स्वर्गताव चाव देस खिमो ज़ यानैज़्याव। है जैद परमेस्वरए, “ङा आवराए यापरमेस्वर ज़” है लिन्यात ओलाज माहुइ, काराव ल्यो ताकिन नोराए जूँनी परमेस्वरए स्वर्गत तोबो सहर जैद नैद यायो।
गेपुर्खाराए यायुँ यासुहुबो
17युँ हुबोनी ज़ अब्राहामए ब परमेस्वरनी ओजाँचिसिक ओज़ा इसहाकलाई चरैःन्यात उयुँ माकैक्यो। परमेस्वरए ओय़ाकार दैद ओनैज़्यावत ब तोबोका तोबो ओज़ालाई परमेस्वरलाई चरैःन्या तयार ज़ ताके। 18नो ओज़ालाई ज़ परमेस्वरए, “इसहाकनिकावर वाज़ नथोल गनिसिन्या लेर,” है ओदोव। 19है जैद अब्राहामए उयुँल उयुँल, ‘इसहाक उसिदी ब परमेस्वरए जुनी ब सोचोइवा ज़’ है उलिज़्याव। है जैद हो छ्याम ओचरैःक ओमासिउए परमेस्वरए सोचोइद ओयो मिताव ज़ ताके।
20युँ हुबोनी ज़ इसहाकए छींनीकाव तान्या पाँराए जूँनी ओज़ा याकूब स़ोनो एसावनिलाई असिक निएक्यो।
21युँ हुबोनी ज़ याकूबए ब उसिन्या बेलाक उझुइ तिकिसिद परमेस्वरलाई पोंखारिद योसेफए ओज़ानिलाई असिक निएक्यो।
22युँ हुबोनी ज़ योसेफए ब उसिन्या बेलाक इस्राएलीर इजिपनी पुलुस्न्याए जूँनी पाँद, “आनी जेपुलुस्क आव पोल ङाऱूस ब ख्यानैद तायाँच्यो,” लिद किर्या झाःव यापरींक्यो।
23युँ हुबोनी ज़ मोसा उजर्मिक ओबाबु ओआमानी ‘आव परमेस्वरए उयुँलाव मिताव तारिज़्या’ लिद राजाए ओकानुन रँःद माछे·द ज़ स़ोंमैना पै म़ोंद नैकिनी।
24युँ हुबोनी ज़ मोसा स़ेर ओतावत राजा फारोए मेंमा ओज़ाए ओज़ाल उगनिसिदी ब नल ल्यो माभैंःके। 25नोए थाँतस लिद पाप दाज़्याव देखा बुरू परमेस्वरए उमींरास दुख सहिन्या रूजिक्यो। 26इजिप भरिलाव धन सम्पती उकुइत उलिज़्यावत ब नोकिन झन ख्रीसए उमिनताव हेलारी तान्या घेप्पा रँःक्यो। परमेस्वरए ल्योङाव ओबताहादा वाज़ उयुँ थू जैक्यो। 27युँ हुबोनी ज़ नलाव राजाए उरिसनी माछे·द इजिपलाई ऱास्द इस्राएलीराए याङ़ात बाके। सुए ज़ यामारँःधुज़्याव परमेस्वरलाई उरँःव मिताव जैद उयुँ थू जैद नो ओय़ेनलाई माऱास्क्यो। 28परमेस्वरए इजिपलाव जेथा जेथा भरी ओरासैःज़्याक मोसाए उयुँ उहुबोनी ज़ इस्राएलीराए याज़ार छुव मायान्याए जूँनी पाथा सैःद य़ामत उझी थीन्या निस्तार पर्ब मानिउ यापरींक्यो।
29युँ हुबोनी ज़ इस्राएलीर लाल समुन्द्र यातरिज़्याक ऱी सा·द बगर ताके। नोरालाई खेपैहुव इजिपीर ते नो सा·व बगरल याहुव प़ाइँना ऱी हुद यागदैक्यो।
30युँ हुबोनी ज़ इस्राएलीराए यरीहो सहरलाई बारिसिउ भार्नालाई सात दिन पै दिनकाव तखेप याघुमैक नो भार्नार यानी ज़ त़ाकेर।
31युँ हुबोनी ज़ नो राहाब बेस्याए ब नो इस्राएलीराए यारापरींव देस जाँचिना हुवनिलाई पाथस उनिनैवए नो सहरलाव मिँ भरी यारासैःक ओल सिउ मापरिके।
यायुँ हुबोनी ज़ य़ेन ब दोकेर, दुख ब सहिकेर
32इताव यायुँ हुबोराए जूँनी खा ची ङापाँके? नोरानी गिदोन, बाराक, सिमसोन, यिप्ता, दाऊद राजा, समूएल स़ोनो अगमबक्तार ब लिज़्यार। नोराए जूँनी सर्न्या समय ज़ माले। 33युँ हुबोनी ज़ नोराए छुत राज्यार ब झेंःद यारारैकेर, परमेस्वरए उयुँलाव मिताव य़ेन ब दोकेर, परमेस्वरए ओय़ाकालाव पाँर ब दैकेर, लाराए यायाःर ब सूइद याराएकेर, 34वीं वीं चाँःज़्याव मेंःए मुल्कालाई ब सैःकेर, तरवालीनी सिन्यानी ब पुलुस्केर, यार्सा ओमालिदी ब ओचाहिउ बेलाक घ्योःव सक्ती ब दैकेर, लरैंल यार्सा ल्यो ताद छुत फौजीरालाई याराखेपैकेर, 35मेंमाराए ब सिउनी सैंसिउ यामींरालाई यारादैकेर।
युँ हुबोनी ज़ फरी ख्वाराए झ्यालखानाल यालिज़्याक ‘परमेस्वरलाई जेऱास्किन आनी पुलुसो जेदैया’ है यारादोक परमेस्वरए ल्योङाव अजम्बरी जुनी दैन्याए जूँनी ननी पुलुसो माभैंःद बुरू दुखस सिन्या सहिकेर। 36ख्वार फरी हसैसी ऩिन्या, रीःसी ऩिन्या ब ताकेर, ख्वार किसी ऩिन्या ब ताकेर। 37ख्वारालाई लुँराए झेःद यारासैःकेर, ख्वारालाई करौंतीए चिरा·द यारासैःकेर, ख्वारालाई तरवालीए यारासैःकेर। इतावनी ज़ प़ाइँनी जाँचिसिकेर। याखिरी पसिद दुखर दैकेर। नोर काता ज़ माल्योर ताद बेधा बाकराराए स्यालोर क्वाइसिद दुलिरिन्या ब ताकेर। 38सु ज़ यामालिज़्याव हाँ जीदा दुलिद कुँ जील पुप जील यालिज़्याव। आव मानुवाताव मिँराए कान्ल ज़ यामारागनिदी ब नोर झन प़ाइँरानी घेप्पाल गनिसिउर यालिज़्याव।
39आव भरी यायुँ उहुबोनी ज़ परमेस्वरए उयुँलाव मितावर ताकेर। खाली आव याजिउत परमेस्वरए ओय़ाकार रँःव मादैकेर। 40काराव ल्यो ताकिन परमेस्वरए गेजूँनी झन चाव पाँ तोबो थ·रैद, ‘प़ाइँ मिँर तखेप्त ज़ छैंवर घतारक’ लिद गेलाई ब कींद ओनैसिज़्याव।