Judah kah Laa
1Tekah khohnin ah tah Judah kho ah hekah laa he a sak ni.
“Mamih ham sarhi la aka tak khopuei,
khangnah vongtung neh rhalmahvong khaw a khueh.
2Vongka rhoek ong uh lamtah
oltak aka ngaithuen namtu loh a dueng la kun van saeh.
3Benbonah aka talong tih namah dongah
aka pangtung kah rhoepnah
ngaimongnah tah na kueinah ni.
4BOEIPA dongah a yoeyah la pangtung lah.
BOEIPA YAHWEH tah kumhal lungpang la om.
5Hmuensang khorha kah khosa khaw a ngam sak.
Aka pomdoep uh te khaw diklai ah a kunyun,
a kunyun sak tih, laipi khuila a bol.
6Te vaengah mangdaeng kah a kho,
a kho ah tattloel kah khokan loh a taelh.
Pilnam a Tang Sak
7Aka dueng kah caehlong tah vanat tih
aka thuem kah namtlak te a dueng la na saelh pah.
8BOEIPA namah kah caehlong tah tiktam pai,
na ming ham nang kan lamtawn uh tih,
ka hinglu ngaihlihnah tah namah poekkoepnah ham om saeh.
9Ka hinglu neh khoyin ah nang kan ngaidam.
Ka khui kah ka mueihla long khaw nang kan toem.
Diklai hman kah na laitloeknah vanbangla
lunglai dongkah khosa rhoek loh duengnah a cang uh.
10Halang te rhen mai cakhaw
khohmuen kah duengnah khaw a cang moenih.
Oldueng a phayoe sak tih
BOEIPA kah rhimomnah te hmu pawh.
11 BOEIPA nang kah kut thueng te hmu uh pawh.
Pilnam kah thatlainah loh hmu saeh lamtah
yahpok kolo saeh.
Na rhal rhoek kah hmai long khaw
amih te hlawp nawn saeh.
12BOEIPA aw, kaimih ham rhoepnah nan tloeng tih
kamamih kah bitat boeih khaw kaimih yueng la na saii.
13Kaimih kah Pathen BOEIPA
nang voelkah boei rhoek loh kaimih n'rhukom thil.
Na ming neh namah bueng ni kam poek uh.
14Aka duek rhoek te hing uh pawt tih
sairhai he khaw thoo uh noek pawh.
Te dongah amih te na hip tih na milh sak.
Te vaengah amih poekkoepnah khaw
boeih na paltham sak.
15Namtom te na thap coeng.
BOEIPA namah loh na thap namtom loh
namah n'thangpom coeng tih
diklai khobawt khaw boeih na lakhla sak.
16Rhal lakli ah khaw BOEIPA namah te ng'hip uh tih
amih te na thuituennah neh na calthai loh a kilh.
17Aka vawn loh camoe om ham a tawn uh bangla,
aka vawn loh a tharhui khui kah a tloh neh a pang bangla,
BOEIPA nang kah mikhmuh ah ka om uh tangkhuet.
18Ka vawn uh tih pumrhih uh dae khohli ni ka cun uh.
Diklai ah khangnah khaw n'saii uh pawt tih
lunglai kah khosa khaw cungku uh hae pawh.
19Namah ah aka duek rhoek tah hing uh ni.
Ka rhok he khaw thoo ni.
Laipi dongkah khosa rhoek khaw
haenghang vetih tamhoe ni.
Namah kah buemtui khosae buemtui bangla
diklai long he sairhai rhoek te a cungku sak ni.
20Ka pilnam aw cet lamtah namah imkhui la kun laeh.
Na thohkhaih te khai laeh.
Kosi a poeng la a poeng hil tah mikhaptok ca khaw
na hnuk longah bet thuh dae.
21Diklai khosa rhoek kah thaesainah te cawh hamla
amah hmuen lamloh BOEIPA ha pawk coeng ke.
Te vaengah a sokah thii te diklai loh a phoe vetih
a pum dongkah a ngawn uh te khaw phah voel mahpawh.