विश्वास
1आशा यानागु खँ दइ धकाः ढुक्क जुइगु व मखंगु खँ धात्थें दु धकाः धायेगु हे विश्वास खः। 2विश्वासं यानाः हे न्हापायापिं मनूतय्त परमेश्वरं यय्कादिल।
3विश्वासं हे झीसं सीके फु, परमेश्वरं उजं बियादीगुलिं संसारयागु सृष्टि जुल, अले थुकथं खने मदुगुलिं खने दया वल।
4विश्वास यानाः हे हाबिलं परमेश्वरयात कयिनयागु स्वयाः भिंगु बलि छाल। विश्वास यानाः हे व परमेश्वरया न्ह्यःने ठीक ठहरय् जुल। अले वं छाःगु नं परमेश्वरं यय्कादिल। विश्वास यानाः हे हाबिल सीधुंकूसां झीपिं लिसे नवाना च्वंगु दु।
5विश्वास यानाः हे हनोकयात मसिकं स्वर्गय् थत यंकल। परमेश्वरं हे थत यंकादीगुलिं वयात सुनानं लुइके मफुत। वयात थत यंके न्ह्यः वं परमेश्वरयात लय्ताय्कूगु खः। 6विश्वास मयाय्कं परमेश्वरयात लय्ताय्के फइ मखु। वय्कःया थाय् वइम्ह मनुखं परमेश्वर दि, अले वय्कःयात मालिपिन्त वय्कलं इनाम बियादी धकाः विश्वास याये हे माः।
7विश्वास यानाः हे नोआं परमेश्वरयागु खँ न्यन। परमेश्वरं वयात गुब्सं मखंनिगु, लिपा जुइतिनिगु खँ धयादीगु खः। परमेश्वरं धयादी थें वं सिँयागु तःग्वःगु जहाज दय्कल। अले उकी हे च्वनाः वं थः जहानपिन्त बचय् यात। थुकथं विश्वास यानाः वं संसारं द्वंकूगु खँ क्यनाबिल, अले व थः परमेश्वरया न्ह्यःने ठीक ठहरय् जुल।
8विश्वास यानाः हे अब्राहामं परमेश्वरयागु खँ न्यन। परमेश्वरं वयात सःताः थःम्हं बी धकाः धयादीगु देशय् हुँ धकाः उजं बियादिल। गन वनेगु धकाः मसिकं हे वं थःगु देश त्वःतावन। 9विश्वासं हे अब्राहाम परमेश्वरं बियादी धकाः धयादीगु देशय् वन, अले अन परदेशी थें जुयाः पाल ग्वयाः च्वन। अथे हे वया काय् इसहाक, अले छय् याकूब नं परमेश्वरं बियादी धकाः धयादीगुलिं पाल ग्वयाः च्वंच्वन। 10अब्राहाम ला सदां दयाच्वनिगु जगय् परमेश्वरं हे दय्कादीगु शहरय् च्वनेत पिया च्वंम्ह खः।
11विश्वास यानाः हे बुह्रा जुइ धुंकाः नं अब्राहाम अबु जुइ फत। बाचा चिनादीम्ह परमेश्वरयात विश्वास याःगुलिं बुह्रि जुइ धुंकूसां साराया प्वाथय् दत। 12थुकथं सीत्यःम्ह बुह्राम्ह अब्राहाम पाखें आकाशय् च्वंगु नगु थें यक्व, अले फिसलय् च्वंगु फि थें ल्याः खाय् मफय्क सन्तान दत।
13इपिं फुक्कं विश्वास जक यानाः परमेश्वरं बी धकाः धयादीगु काये मखंकं सिना वन। अथेसां परमेश्वरं बी धकाः धयादीगु खँय् इमिसं विश्वास याः। इमिसं थःपिन्त पृथ्वीया लँजुवाःत जक ताय्कल। 14थथे धया जुइपिन्सं थःगु देश माला च्वंगु दु धकाः सी दु। 15इमिसं थःपिन्सं त्वःता वंगु देश लुमंकूगु जूसा इपिं हानं व हे देशय् लिहां वने दइगु खः। 16तर इमिसं व स्वयाः भिंगु व बांलाःगु स्वर्गयागु देशय् वनेगु मनंतुना च्वंगु दु। उकिं परमेश्वरं नं थःत इमि परमेश्वर खः धकाः धयादीत लज्या चायामदी, छाय्धाःसा वय्कलं इमिगु निंतिं छगू शहर हे दय्कादीगु दु।
17अब्राहामयात जाँचय् याःबलय् वं विश्वास यानाः थः हे काय् इसहाकयात बलि बीत स्वत। परमेश्वरं बियादी धकाः धयादीगु खँय् विश्वास यानाः हे वं थः याकः काय्यात बलि बीत्यंगु खः। 18थ्वयागु हे बारे परमेश्वरं वयात थथे धयादिल -- “इसहाकयापाखें हे छं सन्तान दयावइ।” 19परमेश्वरं सीम्ह मनूयात हानं म्वाकादी फु धकाः अब्राहामं विश्वास यानाः थथे इसहाकयात बलि बीत्यंगु खः। उकिं अब्राहामयात ला छगूकथं इसहाक सिनाः म्वाना वःम्ह थें हे जुल।
20विश्वासं हे इसहाकं याकूब व एसावयात लिपा जुइतिनिगु खँयागु निंतिं आशिष बिया थकल।
21विश्वासं हे याकूबं सीत्यय्काः तुतामं चुयाः परमेश्वरयात तःधंकाः योसेफया निम्ह काय्पिन्त आशिष बिया थकल।
22विश्वासं हे योसेफं सीत्यय्काः इस्राएलीतय्त परमेश्वरं मिश्र देशं लिगना यंकादी धकाः धया थकल। अले थःगु सीम्हयात कनान देशय् थुने यंकि धकाः नं धया थकल।
23विश्वासं हे मोशा बूबलय् बांलाःगुलिं वया मांबौपिन्सं जुजुयागु उजं खनाः मग्यासे मचायात बुयाः स्वला तक सुचुका तल।
24विश्वासं हे मोशां तःधिकः जुइ धुंकाः फारोहया म्ह्याय्या काय् मखु धकाः धाल। 25पापय् च्वनाः पलख मोजमज्जा यायेगु स्वयाः परमेश्वरया मनूत लिसे दुःखकष्ट फयेगु हे वं यय्कल। 26मिश्रयागु दक्व सम्पत्ति स्वयाः मुक्ति बीम्ह ख्रीष्टया निंतिं हेला याका जुइगु हे वं तःधं ताय्कल, छाय्धाःसा व परमेश्वरं बीगु सिरपाः कायेत पिया च्वंम्ह खः। 27विश्वासं हे जुजुयागु तं खनाः मग्यासे मोशां मिश्र देश त्वःता वन। अले खने मदुम्ह परमेश्वरयात खं थें च्वंक नुगः क्वात्तुकाच्वन। 28दक्वसिबय् न्हापां बूपिन्त स्याइम्हय्सिनं इस्राएलीतय् न्हापा बूपिन्त मथीमा धकाः मोशां विश्वासं हे छुत्कारायागु नखः मानय् यात, अले लुखाय् हि छ्वाकल।
29विश्वासं हे इस्राएलीत बँय् न्यासि वने थें लाल समुद्र छिना वन। मिश्र देशय् च्वंपिं नं अथे हे समुद्र छिनाः वंबलय् दुनाः सित।
30विश्वासं हे न्हय्न्हु तक चाः हुले धुंकाः यरीहोया पःखाः दुना वन।
31विश्वासं हे राहाब धाःम्ह वेश्या परमेश्वरयात मानय् मयाःपिं नाप सिना वने म्वाःल, छाय्धाःसा वं चिवा काय्के छ्वया हःपिं मनूतय्त लसकुस यात।
32थुलिं अप्वः छु धाये? गिदोन, बाराक, शिमशोन, यिप्ता, दाऊद, शमूएल व अगमवक्तातय्गु खँ ल्हानाः ब्याइ मखु। 33विश्वासं हे इमिसं देश देश त्याकाकाल। विश्वासं हे इमिसं बांलाक राज्य याना वन, अले विश्वासं हे परमेश्वरं बी धकाः धयादीगु काये खन। विश्वासं हे इमिसं सिंहतय्गु म्हुतुप्वाः तिकल। 34ह्वाना ह्वाना च्याना च्वंगु मिं नं इमित छुं याये मफुत। तरवारं पालाः स्याये त्यंबलय् नं इपिं बचय् जुल। बमलाःपिं इपिं, आः तसकं बल्लाना वल। भचा मग्यासे ल्वानाः इमिसं पिनें वःपिं शत्रुतय्त बिसिका छ्वत। 35विश्वासं हे मिसातय्सं सीपिं थः मनूतय्त म्वाना वःगु खन। मेपिन्सं नं गुब्सं सीम्वाय्क म्वाना वये दयेमा धकाः दुःखकष्ट फयाः हे सिना वन।
36गुलिसिनं हेस्याकाः जुइ माल, गुलिसिनं कोर्रां दाय्के माल, अले गुलिसिनं चिकाः झ्यालखानाय् कुंके माल। 37अले गुलिसितं ल्वहँतं कय्काः स्यात, गुलिसितं निकू जुइक कःतिं फाया बिल, गुलिसितं तरवारं पालाः स्यात। अले गुलि मनूतय्सं ला फै व दुगुयागु छेंगूयागु वसः दय्काः पुना जुल। अले चीमि जुयाः, दुःखकष्ट सियाः, क्वत्यय्काः जुइ माल। 38संसार इपिं च्वने बहःगु मजुल। इपिं मरुभूमिं मरुभूमिं, पहाडं पहाडं बिस्युं जुइ माल। अले गुफा गुफाय्, पाक्व पाक्वय् सुलाः जुइ माल।
39विश्वासं यानाः हे इमिसं थथे सह याये फुगु खः। अय्नं इमिसं परमेश्वरं बी धकाः धयादीगु काये मखं। 40परमेश्वरं झीत अज्ज भिंगु व बांलाःगु बियादीगु ग्वसाः ग्वयादीगु दु। झी नापं तुं इपिं नं सिद्ध जुइमा धकाः परमेश्वरं मनंतुनादीगु खः।