1غَطَ دُوٻِ سَڤّٛ اٜ نَيِ مِ فُطِّتِ مِ يَحِي اُرُشَلِيمَ حَوْتِ اٜ بَرْنَبَ، مِنْ نجَادِ اٜ تِيتُسْ؞ 2مِ يَحُ اُرُشَلِيمَ نغَمْ اَللَّه حٛلِّييَمْ مِ يَحَ؞ ندٜ نجَامِ مِ حَوْرِي اٜ اَرْدِيٻٜ تٛکُّٻٜ يٜىٰسُ تَنْ، مِ حٛلِّيٻٜ حَبَرُ بٜلْطُمْ طُمْ نغَعَجِنَنْمِ يِمْٻٜ نَاع يَحُودَنْکٛعٜنْ؞ مِ وَطُ نٛنْ نغَمْ مِ يِطَا کُوغَلْ نغَلْ کُوُمِ ندٜنّٛ اٜ نغَلْ کُوَيْمِ جٛونِ وَرْتَ مٜىٰرٜ؞ 3کٛو تِيتُسْ مٛ نجَادَيْمِ، کٛو ندٜ نَاع اٛ يَحُودَنْکٜىٰجٛ، طُمْ وَطَايِمٛ دٛولٜ اٛ نَادٜىٰ، 4کٛو ندٜ وٛٻّٜ اٜ نغِطُنٛو اٛ نَادٜىٰ؞ ٻٜ نغَطِي بٛ ٻٜ تٛکُّٻٜ يٜىٰسُ، ٻٜ نَتِّ ندٜرْ کَوْتَلْ مٜىٰطٜنْ، اٜ ٻٜ ندَارَ اِرِ رِمْطِنْکِ کِ نغٛودُطٜنْ ندٜرْ سُمْڤٛوتِرْکِ اٜ يٜىٰسُ اَلْمَسِيحُ، نغَمْ ٻٜ نغَرْتِرَعٜنْ مَشُّٻٜ؞ 5اَمَّا نغَمْ طُمْ سُرَنَعٛنْ غٛونغَ حَبَرُ بٜلْطُمْ، مِنْ نجَٻَايِ کٛ ٻٜ مبِعِ کٛو سٜطَّ؞

6اَمَّا ٻٜنْ طٛنْ اَرْدِيٻٜ ٻٜ ٻٜيْدَايِ غٛطُّمْ دٛوْ اٜکِّتِنٛلْ اَمْ؞ کٛو کَمْٻٜ ٻٜ ٻٜيٜ وَلَا فٜىٰرٛوتِرٛلْ تٛ اَمْ، نغَمْ اَللَّه حٛلَّتَا فٜىٰرٛوتِرٛلْ؞ 7اَمَّا ٻٜ نغِعِ اَللَّه حٛکِّييَمْ کُوغَلْ وَعَجِنَنْکِ يِمْٻٜ نَاع يَحُودَنْکٛعٜنْ حَبَرُ بٜلْطُمْ، نٛنْ نٛ اٛ حٛکِّرِ بِيتُرُسْ کُوغَلْ وَعَجِنَنْکِ يَحُودَنْکٛعٜنْ حَبَرُ بٜلْطُمْ؞ 8نغَمْ نٛ اَللَّه وَرْتِرِ بِيتُرُسْ لِلَاطٛ تٛ يَحُودَنْکٛعٜنْ، نٛنْ اٛ وَرْتِرِيَمْ لِلَاطٛ يَاکِ تٛ يِمْٻٜ نَاع يَحُودَنْکٛعٜنْ؞ 9يَاکُبُ اٜ بِيتُرُسْ اٜ يَحَيَ، نٛدّٜتٜىٰٻٜ اَرْدِيٻٜ مَوْٻٜ، ندٜ ٻٜ نغِعِ اَللَّه بَرْکِطِنِي کُوغَلْ اَمِنْ بٛنْغَلْ، ٻٜ نجَٻِّييَمْ مِنْ اٜ بَرْنَبَ جُوطٜ طِطِ؞ ٻٜ نجَٻِ مِنْ اٜ بَرْنَبَ مِنْ نغَعَجِنَ ندٜرْ يِمْٻٜ نَاع يَحُودَنْکٛعٜنْ، ندٜنْ کَمْٻٜ ٻٜ نغَعَجِنَ ندٜرْ يَحُودَنْکٛعٜنْ؞ 10فِي غٛعٛ طُمْ ٻٜ تٛرِيمِنْ وٛنِ تٛع مِنْ نغٜجِّتَ ٻٜ نغَلَنَا وٛنْٻٜ ندٜرْ مَٻّٜ، ندٜنْ مَا کَنْجُمْ وٛنِ کٛ کَاٻُمِ وَطُکِ؞

11اَمَّا ندٜ بِيتُرُسْ وَرِ اَنْتَاکِيَ، مِ حَٻَنِيمٛ غِتٜ اٜ غِتٜ، نغَمْ کٛ وٛوطَا طُمْ اٛ وَطِ اٜ نجَيْرِ طُمْ وٛنِ؞ 12کٛ وٛٻّٜ يِمْٻٜ ٻٜ يَاکُبُ لِلِ نجٛتّٛو تٛنْ، بِيتُرُسْ اٜ ݧَمْدَ اٜ يِمْٻٜ نَاع يَحُودَنْکٛعٜنْ؞ اَمَّا غَطَ يِمْٻٜ ٻٜنْ نجٛتَّکٜ، بِيتُرُسْ حَکِّتِ حٛورٜ مُوطُمْ اٜ مَٻّٜ، نغَمْ اٜ مٛ حُلَ ٻٜنْ طٛنْ يِمْٻٜ بِعٛوٻٜ دٛولٜ يِمْٻٜ نَاع يَحُودَنْکٛعٜنْ تٛکُّٻٜ يٜىٰسُ نَادٜىٰ؞ 13يَحُودَنْکٛعٜنْ تٛکُّٻٜ يٜىٰسُ کٛرِيٻٜ مَا ڤُطِّ وَطُکِ شِيَ غٛونغَ طُمْ بِيتُرُسْ وَطَتَ، حَا کٛ ٻٜ نغَطَتَ مَجِّنِ بَرْنَبَ اٛ فُطِّ وَطُکِ شِيَ غٛونغَ طُمْ ٻٜ نغَطَتَ؞ 14ندٜ نغِيمِ ٻٜ تٛکَّايِ غٛونغَ حَبَرُ بٜلْطُمْ، مبِيمِ بِيتُرُسْ يٜىٰسٛ مَٻّٜ ٻٜ فُو، ‏«‏اَ يَحُودَنْکٜىٰجٛ، اَمَّا اَ وَطَ جٛنْدٜ اِرِ ندٜ نٜطّٛ نَاع يَحُودَنْکٜىٰجٛ؞ نٛ وَطَتَ اَ وَطَ يِمْٻٜ نَاع يَحُودَنْکٛعٜنْ نغَطَ جٛنْدٜ اِرِ ندٜ يَحُودَنْکٛعٜنْ؟»‏

15اٜنٜنْ اٜ کٛعٜ مٜىٰطٜنْ اٜنْ يَحُودَنْکٛعٜنْ غَطَ اٜ يٜىٰسٛ، نَاع اٜنْ ‏«‏يِمْٻٜ نَاع يَحُودَنْکٛعٜنْ غَطٛوٻٜ حَکّٜ،»‏ نٛ ٻٜ نٛدِّرْتٜىٰ؞ 16فُو اٜ نٛنْ، اٜنْ اَنْدِ اَللَّه جَٻَتَا نٜطّٛ اٛ اَادِلِيجٛ نغَمْ تٛکُّکِ اَتَّوْرَ، اَمَّا اٛ جَٻَيْمٛ بَرْکَ حٛولَاکِ يٜىٰسُ اَلْمَسِيحُ؞ اٜنٜنْ مَا اٜنْ کٛولَکٜ يٜىٰسُ اَلْمَسِيحُ نغَمْ اَللَّه جَٻَعٜنْ اٜنْ اَادِلِعٜنْ بَرْکَ حٛولَاکِ اَلْمَسِيحُ، نَاع نغَمْ تٛکُّکِ اَتَّوْرَ؞ نغَمْ وَلَا مٛ اَللَّه جَٻَتَ اٛ اَادِلِيجٛ نغَمْ تٛکُّکِ اَتَّوْرَ؞ 17شَرٜلْ نغٜلْ طَٻِّتٜتٜنْ اَللَّه جَٻَعٜنْ اٜنْ اَادِلِعٜنْ بَرْکَ سُمْڤٛوتِرْکِ اٜ اَلْمَسِيحُ، تٛ طُمْ تَوْرِيعٜنْ اٜ حَکّٜ، تٛو، اَلْمَسِيحُ وَرْتِي غَطٛووٛعٜنْ نغَطٜنْ حَکّٜ وٛنْ طٛنْ؟ غٛونغَ نَاع طُمْ نٛنْ!‏ 18تٛ مِ فُطِّتِي مِ ݧِٻِي کٛ شَنْکُتُمِ، ندٜنْ مِ حٛلِّي مِ نٜطّٛ غٜوٛووٛ کٛ اَتَّوْرَ وِعِ؞ 19ندٜنّٛ اٜ مِ تٛکَّ اَتَّوْرَ، اَمَّا طُمْ يٛوفِييَمْ دَغَ بَوْطٜ مَاجُمْ، نغَمْ مِ وَطَ جٛنْدٜ حُوَنْکِ اَللَّه؞ 20مِنْ بٛ مِ وَرْدَامَ اٜ اَلْمَسِيحُ دٛوْ غَافَانغَلْ؞ جٛونِ جٛنْدٜ ندٜ نغَطَيْمِ نَاع مِنْ اٜ حٛورٜ اَمْ وَطَتَندٜ، اَمَّا طُمْ اَلْمَسِيحُ جٛوطِيطٛ ندٜرْ اَمْ؞ جٛونِ جٛنْدٜ ندٜ نجٛوطِيمِ ندٜرْ ٻَنْدُ، اٜ مِ وَطَندٜ ندٜرْ حٛولَاکِ ٻِطّٛ اَللَّه، غِطّٛيَمْ حٛکِّ يٛنْکِ مُوطُمْ نغَمْ اَمْ؞ 21مِ وَݧَتَا يِدّٜ اَللَّه؞ نغَمْ تٛ نٜطّٛ وَاوَيْ وَرْتُکِ اَادِلِيجٛ نغَمْ تٛکُّکِ اَتَّوْرَ، تٛو، مَيْدٜ اَلْمَسِيحُ وَرْتِي مٜىٰرٜ؞