Maaron igharaat gabua maata maata, ve iŋginŋgin zi
1-2Yau nasaav pa taug naghe yau aat napait Yoova pa poia tooni.
O Yoova, Maaron tsiau, yo ezam tiina kat.
Tapirim tiina tomania mbonarim, ve gabuam naol isov tau ezam tiina pani na, ene ipabood ghom imin nonoghiiŋa to yes kinik.
Muuŋ geeg, yo ugharaat sambam saamba imin niam to lepoogh irau moogh balbaala tau tamtamon tiraraava leso tileep ila saamba.
3Ve upayooz ruum tsio izala yaa tau igheen ila sambam saamba na paavo.
Yo ugham taitai imin lem karis, leso uyooz izala paavo ve ughau.
Tauvene yaghur ibaad ghom, ve ughaughau ila sambam saamba.
4Yo ugham yaghur imin lem mbaŋooŋa.
Ve yav yaama, ene imin lem besooŋa.
5Muuŋ, yo ughur taan iyooz tuŋia ila puughu.
Tauta irau izuur mako. Ighengheen tauvene.
6Saawe tana, ugham te itav taan tomania loloz naol isov.
7Ra aliŋam izaa, ve uyaon te gha ighau.
Aliŋam tapiri tiina imin lalaav luutu.
Tauta te ilooŋ ghom, ve rekia mon ighau ila ilup ghi ila ziige ee, ve taan peria.
8Tauvene te imaak, ve loloz peria, ve imaak izi izi le nugh rapazi peria paam.
Tauta aazne, yaa ve te tigheen duduuŋ ila niazi niazi tau yo taum ughuru pazi na.
9Ve yo ughur ŋgat pa te ve taan.
Leso te itav taan ve ireu nugh muul sov.
Ŋgat tawe, te irau imalaaŋ pani mako.
10Yo ugham yaa tivot ila taan puura tau tighenaar taghon loloz zigezi,
ve tireer taghon sariipa tizila pa nugh duduŋazi.
11Yaa tawe tighenaar, leso gabua naol to su tighun.
Doŋki sagsagŋa paam. Isaav ighe murun zi, ene pale tighunu le isooŋ zi.
12Man tirau rumazi ila ai tau tiyooz ila yaa zigezi na bogazi,
ve tileep ila ve titaŋtaŋ.
13Yo uleep ila niam ta saaŋa we, ve ugham uman izizi ila loloz.
Uraat tsio tana, tauta igham taan ŋgoreeŋa ivot ve gabua popoia naol titum poi.
14Yo ugham kikiliiŋ itum, leso makau, sipsip ve gabua siriv paam tighan.
Ve ughur gabua maata maata to iuul tamtamon paam. Leso tivazogh zi ve tigham uratoi zi.
Yo ugham aniiŋ anooŋa ivotvot ila taan.
15Ve ughur ai vaen, leso tamtamon tigharaata ve tighun suuru, ve igham zi lolozi poia.
Ve ugham ai oliv pazi paam. Leso tigham ŋgoreeŋa, ve tisop tinizi ma naghozi pani, le milmilia.
Ve ugham aniiŋ maata maata pazi, ve tighani to ipalot zi.
16Yoova, ai tsio mezepur tau uvazogh zi izi Lebanon na,
yo uŋgin zi poi, ve ugham uman izizi pazi. Tauta aazne tizaa timin tintiina.
17Ai tawe, man tirau rumazi izala bogazi.
Ve man ŋgau, o tighagharaat rumazi ila ai tau imin yar na bogazi.
18Loloz mamalaua dabazi, ene mekmek sagsagŋa niazi to lepoogh.
Ve gabua siriv tau imin momot, ma uzuuv ma vene, ene tiyoŋyooŋ iloŋ ila maet tintiina sosozi izala loloz.
19Yo ughur kaiyo to iŋgat saawe to ndaman.
Ve aaz, ene iwatagh saawe sindei to izaa, ve saawe sindei to izila.
20Yo ugham mboŋ izi le nugh ndoroom,
leso gabua sagsagŋa to su tilaagh.
21Tauvene laion paghpaaghu aliŋazi izazaa ve tilaghlaagh, ve tiliil lezi gabua to tighan. Ve Maaron tau igham pazi.
22Saawe tau aaz izaa, mako timuul tila pa niazi to ghenooŋ, ve tizi tigheen.
23Mako tamtamon anazi tivot tila pa ghamuuŋ uraat.
Tighamgham uraat ila ila le ravrav izi.
24O Yoova, yo ughur gabua maata maata.
Ve gabua naol tau yo ugharaat zi na, titotoi ghom tighe ŋgar tsio tiina le tiina kat.
Taan ivon kat pa gabua ndiŋndiŋ ndiŋndiŋ tau yo ugharaat zi na.
25Ve nagham ŋgar pa te paam. Ene tiina kat.
Ve gabua ndiŋndiŋ ndiŋndiŋ tau matazi yaryaare na tileep ila. Siriv tintiina, ve siriv geegeu.
Gabua tawe, tanin zi, ene aat tarao mako.
26Waaŋ tiravraav ila te paavo,
ve Leviatan
ilaghlaagh ila te loolo. Gabua tana, tiina le tiina kat. Muuŋ geeg, yo ugharaata, leso imomogheer ila te.
27Gabua naol tawe tighurghur matazi payo to ugham lezi aniiŋ.
Saawe tau pitool zi, yo taum upanpan zi.
28Yes tilepaar ila yo nimam.
Isaav ighe ugham aniiŋ pazi, yes pale tighamu.
Ighe ukaak nimam to upan zi, ene pale tighan gabua popoia le apozi isuŋ.
29Ve isaav ighe uŋgooz naghom pazi,
ene pale tiroi ve tivaghamgham.
Ve isaav ighe upas avuvuzi ighau,
ene pale timatmaat ve timin ŋgaupup muul.
30Gabua naol tau tileep izi taan ne, yo uviv Avuvum ila pazi, tauta tileep matazi yaryaare.
Ve saawe tau timaat, yo ugham paaghu toozi tivot izi taan, leso tigham niazi.
31Yoova eeza tiina aat igheen taghon taghon gha ila.
Ve i loolo poia pa gabua naol tau i igharaat zi na.
32I tapiri tiina kat. Isaav ighe maata izi pa taan, ene pale taan irur.
Ve isaav ighe itut loloz eta, ene pale yav ighan loloz tana.
33Tauvene saawe tau naleep matag yaryaare, yau aat nambou mbouŋ to napait Yoova.
Pale lolog poia pani, ve napakuru pa mbouŋ ila ila le lepoogh tsiau to taan isov.
34Yoova igham ghau lolog poia kat.
Tauvene saawe tau naleep ve naghamgham ŋgar pani, naghe i ighit ghau ve loolo poia pa ŋgar tsiau.
35Eemon zeran sasaghatizi tau tighamgham sosor ila Yoova maata na, poia to i ipasov zi pa taan gha tilalez.
Ve yau ene, nasaav pa taug naghe yau aat napait Yoova pa poia tooni.
Aleluia! Tapait Yoova!