Η Καινή Διαθήκη

1Καί τινες κατελθόντες ἀπὸ τῆς Ἰουδαίας, ἐδίδασκον τοὺς ἀδελφοὺς ὅτι Ἐὰν μὴ ⸂περιτέμνησθε⸃ τῷ ἔθει ⸆ Μωϋσέως, οὐ δύνασθε σωθῆναι. 2Γενομένης ⸂οὖν⸃ στάσεως καὶ ⸂2ζητήσεως⸃ οὐκ ὀλίγης τῷ Παύλῳ καὶ τῷ Βαρνάβᾳ πρὸς αὐτούς, ἔταξαν ἀναβαίνειν Παῦλον καὶ Βαρνάβαν καί τινας ἄλλους ἐξ αὐτῶν πρὸς τοὺς ἀποστόλους καὶ πρεσβυτέρους εἰς Ἱερουσαλὴμ περὶ τοῦ ζητήματος τούτου. 3Οἱ μὲν οὖν, προπεμφθέντες ὑπὸ τῆς ἐκκλησίας, διήρχοντο τὴν ⸆ Φοινίκην καὶ Σαμάρειαν, ἐκδιηγούμενοι τὴν ἐπιστροφὴν τῶν ἐθνῶν· καὶ ἐποίουν χαρὰν μεγάλην πᾶσιν τοῖς ἀδελφοῖς. 4Παραγενόμενοι δὲ εἰς Ἱερουσαλήμ, ⸂ἀπεδέχθησαν⸃ ⸂2ὑπὸ⸃ τῆς ἐκκλησίας καὶ τῶν ἀποστόλων καὶ τῶν πρεσβυτέρων, ἀνήγγειλάν τε ὅσα ὁ θεὸς ἐποίησεν μετ᾽ αὐτῶν. 5Ἐξανέστησαν δέ τινες τῶν ἀπὸ τῆς αἱρέσεως τῶν Φαρισαίων πεπιστευκότες, λέγοντες ὅτι Δεῖ περιτέμνειν αὐτούς, παραγγέλλειν τε τηρεῖν τὸν νόμον Μωϋσέως.
6Συνήχθησαν ⸂δὲ⸃ οἱ ἀπόστολοι καὶ οἱ πρεσβύτεροι ἰδεῖν περὶ τοῦ λόγου τούτου. 7Πολλῆς δὲ ⸂συζητήσεως⸃ γενομένης, ἀναστὰς Πέτρος εἶπεν πρὸς αὐτούς,
Ἄνδρες ἀδελφοί, ὑμεῖς ἐπίστασθε ὅτι ἀφ᾽ ἡμερῶν ἀρχαίων ⸂2ὁ θεὸς ἐν ἡμῖν ἐξελέξατο,⸃ διὰ τοῦ στόματός μου ἀκοῦσαι τὰ ἔθνη τὸν λόγον τοῦ εὐαγγελίου, καὶ πιστεῦσαι. 8Καὶ ὁ καρδιογνώστης θεὸς ἐμαρτύρησεν αὐτοῖς, δοὺς ⸋αὐτοῖς⸌ τὸ πνεῦμα τὸ ἅγιον, καθὼς καὶ ἡμῖν· 9καὶ οὐδὲν διέκρινεν μεταξὺ ἡμῶν τε καὶ αὐτῶν, τῇ πίστει καθαρίσας τὰς καρδίας αὐτῶν. 10Νῦν οὖν τί πειράζετε τὸν θεόν, ἐπιθεῖναι ζυγὸν ἐπὶ τὸν τράχηλον τῶν μαθητῶν, ὃν οὔτε οἱ πατέρες ἡμῶν οὔτε ἡμεῖς ἰσχύσαμεν βαστάσαι; 11Ἀλλὰ διὰ τῆς χάριτος ⸂τοῦ κυρίου Ἰησοῦ⸃ πιστεύομεν σωθῆναι, καθ᾽ ὃν τρόπον κἀκεῖνοι.
12Ἐσίγησεν δὲ πᾶν τὸ πλῆθος, καὶ ἤκουον Βαρνάβα καὶ Παύλου ἐξηγουμένων ὅσα ἐποίησεν ὁ θεὸς σημεῖα καὶ τέρατα ἐν τοῖς ἔθνεσιν δι᾽ αὐτῶν. 13Μετὰ δὲ τὸ σιγῆσαι αὐτούς, ἀπεκρίθη Ἰάκωβος λέγων,
Ἄνδρες ἀδελφοί, ἀκούσατέ μου· 14Συμεὼν ἐξηγήσατο καθὼς πρῶτον ὁ θεὸς ἐπεσκέψατο λαβεῖν ἐξ ἐθνῶν λαὸν ⸋ἐπὶ⸌ τῷ ὀνόματι αὐτοῦ. 15Καὶ τούτῳ συμφωνοῦσιν οἱ λόγοι τῶν προφητῶν, καθὼς γέγραπται, 16Μετὰ ταῦτα ἀναστρέψω, καὶ ἀνοικοδομήσω τὴν σκηνὴν Δαυὶδ τὴν πεπτωκυῖαν· καὶ τὰ ⸂κατεσκαμμένα⸃ αὐτῆς ἀνοικοδομήσω, καὶ ἀνορθώσω αὐτήν· 17ὅπως ἂν ἐκζητήσωσιν οἱ κατάλοιποι τῶν ἀνθρώπων τὸν κύριον, καὶ πάντα τὰ ἔθνη, ἐφ᾽ οὓς ἐπικέκληται τὸ ὄνομά μου ἐπ᾽ αὐτούς, λέγει κύριος ⸋ὁ⸌ ποιῶν ταῦτα ⸋2πάντα.⸌ 18Γνωστὰ ἀπ᾽ αἰῶνός ⸂ἐστιν τῷ θεῷ πάντα τὰ ἔργα αὐτοῦ.⸃ 19Διὸ ἐγὼ κρίνω μὴ παρενοχλεῖν τοῖς ἀπὸ τῶν ἐθνῶν ἐπιστρέφουσιν ἐπὶ τὸν θεόν· 20ἀλλὰ ἐπιστεῖλαι αὐτοῖς τοῦ ἀπέχεσθαι ⸋ἀπὸ⸌ τῶν ἀλισγημάτων τῶν εἰδώλων ⸂καὶ τῆς πορνείας καὶ τοῦ πνικτοῦ καὶ τοῦ αἵματος.⸃ 21Μωϋσῆς γὰρ ἐκ γενεῶν ἀρχαίων κατὰ πόλιν τοὺς κηρύσσοντας αὐτὸν ἔχει, ἐν ταῖς συναγωγαῖς κατὰ πᾶν σάββατον ἀναγινωσκόμενος.
22Τότε ἔδοξεν τοῖς ἀποστόλοις καὶ τοῖς πρεσβυτέροις σὺν ὅλῃ τῇ ἐκκλησίᾳ, ἐκλεξαμένους ἄνδρας ἐξ αὐτῶν πέμψαι εἰς Ἀντιόχειαν σὺν ⸆ Παύλῳ καὶ Βαρνάβᾳ, Ἰούδαν τὸν ⸂ἐπικαλούμενον⸃ Βαρσαββᾶν, καὶ Σίλαν, ἄνδρας ἡγουμένους ἐν τοῖς ἀδελφοῖς, 23γράψαντες διὰ χειρὸς αὐτῶν ⸋τάδε,⸌ Οἱ ἀπόστολοι ⸂καὶ οἱ πρεσβύτεροι καὶ οἱ ἀδελφοὶ⸃ τοῖς κατὰ ⸂2τὴν Ἀντιόχειαν καὶ Συρίαν καὶ Κιλικίαν⸃ ἀδελφοῖς τοῖς ἐξ ἐθνῶν, χαίρειν· 24ἐπειδὴ ἠκούσαμεν ὅτι τινὲς ἐξ ἡμῶν ⸋ἐξελθόντες⸌ ἐτάραξαν ὑμᾶς λόγοις, ἀνασκευάζοντες τὰς ψυχὰς ὑμῶν, ⸋2λέγοντες περιτέμνεσθαι καὶ τηρεῖν τὸν νόμον,⸌ οἷς οὐ διεστειλάμεθα· 25ἔδοξεν ἡμῖν γενομένοις ὁμοθυμαδόν, ⸂ἐκλεξαμένους⸃ ἄνδρας πέμψαι πρὸς ὑμᾶς, σὺν τοῖς ἀγαπητοῖς ἡμῶν Βαρνάβᾳ καὶ Παύλῳ, 26ἀνθρώποις παραδεδωκόσιν τὰς ψυχὰς αὐτῶν ὑπὲρ τοῦ ὀνόματος τοῦ κυρίου ἡμῶν Ἰησοῦ χριστοῦ. 27Ἀπεστάλκαμεν οὖν Ἰούδαν καὶ Σίλαν, καὶ αὐτοὺς διὰ λόγου ἀπαγγέλλοντας τὰ αὐτά. 28Ἔδοξεν γὰρ ⸂τῷ ἁγίῳ πνεύματι,⸃ καὶ ἡμῖν, μηδὲν πλέον ἐπιτίθεσθαι ὑμῖν βάρος, πλὴν ⸉τῶν ἐπάναγκες τούτων,⸊ 29ἀπέχεσθαι εἰδωλοθύτων καὶ αἵματος καὶ ⸂πνικτοῦ⸃ καὶ πορνείας· ἐξ ὧν διατηροῦντες ἑαυτούς, εὖ πράξετε. Ἔρρωσθε.
30Οἱ μὲν οὖν ἀπολυθέντες ⸂ἦλθον⸃ εἰς Ἀντιόχειαν· καὶ συναγαγόντες τὸ πλῆθος, ἐπέδωκαν τὴν ἐπιστολήν. 31Ἀναγνόντες δέ, ἐχάρησαν ἐπὶ τῇ παρακλήσει. 32Ἰούδας τε καὶ Σίλας, καὶ αὐτοὶ προφῆται ὄντες, διὰ λόγου πολλοῦ παρεκάλεσαν τοὺς ἀδελφούς, καὶ ἐπεστήριξαν. 33Ποιήσαντες δὲ χρόνον, ἀπελύθησαν μετ᾽ εἰρήνης ἀπὸ τῶν ἀδελφῶν πρὸς τοὺς ⸂ἀποστόλους.⸃ 34 ⸆ 35Παῦλος δὲ καὶ Βαρνάβας διέτριβον ἐν Ἀντιοχείᾳ, διδάσκοντες καὶ εὐαγγελιζόμενοι, μετὰ καὶ ἑτέρων πολλῶν, τὸν λόγον τοῦ κυρίου.
36Μετὰ δέ τινας ἡμέρας εἶπεν ⸉Παῦλος πρὸς Βαρνάβαν,⸊ Ἐπιστρέψαντες δὴ ἐπισκεψώμεθα τοὺς ἀδελφοὺς ⸋ἡμῶν⸌ κατὰ ⸉2πᾶσαν πόλιν,⸊ ἐν αἷς κατηγγείλαμεν τὸν λόγον τοῦ κυρίου, πῶς ἔχουσιν. 37Βαρνάβας δὲ ⸂ἐβουλεύσατο⸃ συμπαραλαβεῖν ⸆ ⸋τὸν⸌ Ἰωάννην, τὸν καλούμενον Μάρκον. 38Παῦλος δὲ ἠξίου, τὸν ἀποστάντα ἀπ᾽ αὐτῶν ἀπὸ Παμφυλίας, καὶ μὴ συνελθόντα αὐτοῖς εἰς τὸ ἔργον, μὴ ⸂συμπαραλαβεῖν⸃ τοῦτον. 39Ἐγένετο ⸂οὖν⸃ παροξυσμός, ὥστε ⸂2ἀποχωρισθῆναι⸃ αὐτοὺς ἀπ᾽ ἀλλήλων, τόν τε Βαρνάβαν παραλαβόντα τὸν Μάρκον ἐκπλεῦσαι εἰς Κύπρον· 40Παῦλος δὲ ἐπιλεξάμενος Σίλαν ἐξῆλθεν, παραδοθεὶς τῇ χάριτι ⸂τοῦ θεοῦ⸃ ὑπὸ τῶν ἀδελφῶν. 41Διήρχετο δὲ ⸂τὴν Συρίαν καὶ Κιλικίαν,⸃ ἐπιστηρίζων τὰς ἐκκλησίας.

*15:1 ⸂ περιτέμνησθε RP f 35 TR ¦ περιτμηθῆτε TNT2 WH NA NIV SBL

*15:1 ⸆ – RP f 35 TR ¦ τῷ TNT2 WH NA NIV SBL

*15:2 ⸂ οὖν RP f 35 TR ¦ δὲ TNT2 WH NA NIV SBL

*15:2 ⸂2 ζητήσεως RP f 35 TNT2 WH NA NIV SBL ¦ συζητήσεως TR

*15:3 ⸆ – RP f 35 TR ¦ τε TNT2 WH NA NIV SBL

*15:4 ⸂ ἀπεδέχθησαν RP f 35 TR ¦ παρεδέχθησαν TNT2 WH NA NIV SBL

*15:4 ⸂2 ὑπὸ RP f 35 TR ¦ ἀπὸ TNT2 WH NA NIV SBL

*15:6 ⸂ δὲ RP f 35 TR ¦ τε TNT2 WH NA NIV SBL

*15:7 ⸂ συζητήσεως RP f 35 TR ¦ ζητήσεως TNT2 WH NA NIV SBL

*15:7 ⸂2 ὁ θεὸς ἐν ἡμῖν ἐξελέξατο RP TR ¦ ὁ θεὸς ἐν ὑμῖν ἐξελέξατο f 35 ¦ ἐν ὑμῖν ἐξελέξατο ὁ θεὸς TNT2 WH NA NIV SBL

*15:8 ⸋ αὐτοῖς RP f 35 TR ¦ – TNT2 WH NA NIV SBL

*15:11 ⸂ τοῦ κυρίου Ἰησοῦ RP f 35 TNT2 WH NA NIV SBL ¦ κυρίου Ἰησοῦ χριστοῦ TR

*15:14 ⸋ ἐπὶ RP f 35 TR ¦ – TNT2 WH NA NIV SBL

*15:16 ⸂ κατεσκαμμένα RP f 35 TR NA27+28 NIV SBL ¦ κατεστρεμμένα TNT2 ¦ κατεστραμμένα WH NA25

*15:17 ⸋ ὁ RP f 35 TR ¦ – TNT2 WH NA NIV SBL

*15:17 ⸋2 πάντα RP f 35 TR ¦ – TNT2 WH NA NIV SBL

*15:18 ⸂ ἐστιν τῷ θεῷ πάντα τὰ ἔργα αὐτοῦ RP f 35 ¦ ἐστι τῷ θεῷ πάντα τὰ ἔργα αὐτοῦ TR ¦ – TNT2 WH NA NIV SBL

*15:20 ⸋ ἀπὸ RP f 35 TR ¦ – TNT2 WH NA NIV SBL

*15:20 ⸂ καὶ τῆς πορνείας καὶ τοῦ πνικτοῦ καὶ τοῦ αἵματος RP f 35 TR NA27+28 NIV SBL ¦ καὶ τῆς πορνείας καὶ πνικτοῦ καὶ τοῦ αἵματος TNT2 WH NA25

*15:22 ⸆ – RP f 35 ¦ τῷ TR TNT2 WH NA NIV SBL

*15:22 ⸂ ἐπικαλούμενον RP f 35 TR ¦ καλούμενον TNT2 WH NA NIV SBL

*15:23 ⸋ τάδε RP f 35 TR ¦ – TNT2 WH NA NIV SBL

*15:23 ⸂ καὶ οἱ πρεσβύτεροι καὶ οἱ ἀδελφοὶ RP f 35 TR ¦ καὶ οἱ πρεσβύτεροι, ἀδελφοὶ TNT2 WH NA NIV SBL

*15:23 ⸂2 τὴν Ἀντιόχειαν καὶ Συρίαν καὶ Κιλικίαν RP TR TNT2 WH NA NIV SBL ¦ Ἀντιόχειαν καὶ Συρίαν καὶ Κιλικίαν f 35

*15:24 ⸋ ἐξελθόντες RP f 35 TR TNT2 NA27+28 NIV SBL ¦ – WH NA25

*15:24 ⸋2 λέγοντες περιτέμνεσθαι καὶ τηρεῖν τὸν νόμον RP f 35 TR ¦ – TNT2 WH NA NIV SBL

*15:25 ⸂ ἐκλεξαμένους RP TR NA25 ¦ ἐκλεξαμένοις f 35 TNT2 WH NA27+28 NIV SBL

*15:28 ⸂ τῷ ἁγίῳ πνεύματι RP f 35 TR ¦ τῷ πνεύματι τῷ ἁγίῳ TNT2 WH NA NIV SBL

*15:28 ⸉ τῶν ἐπάναγκες τούτων RP f 35 TR ¦ τούτων τῶν ἐπάναγκες TNT2 WH NA NIV SBL

*15:29 ⸂ πνικτοῦ RP f 35 TR ¦ πνικτῶν TNT2 WH NA NIV SBL

*15:30 ⸂ ἦλθον RP f 35 TR ¦ κατῆλθον TNT2 WH NA NIV SBL

*15:33 ⸂ ἀποστόλους RP f 35 TR ¦ ἀποστείλαντας αὐτούς TNT2 WH NA NIV SBL

*15:34 ⸆ – RP f 35 TNT2 WH NA NIV SBL ¦ Ἔδοξε δὲ τῷ Σίλᾳ ἐπιμεῖναι αὐτοῦ. TR

*15:36 ⸉ Παῦλος πρὸς Βαρνάβαν RP f 35 TR ¦ πρὸς Βαρνάβαν Παῦλος TNT2 WH NA NIV SBL

*15:36 ⸋ ἡμῶν RP f 35 TR ¦ – TNT2 WH NA NIV SBL

*15:36 ⸉2 πᾶσαν πόλιν RP f 35 TR ¦ πόλιν πᾶσαν TNT2 WH NA NIV SBL

*15:37 ⸂ ἐβουλεύσατο RP f 35 TR ¦ ἐβούλετο TNT2 WH NA NIV SBL

*15:37 ⸆ – RP TR ¦ καὶ f 35 TNT2 WH NA NIV SBL

*15:37 ⸋ τὸν RP TR TNT2 WH NA NIV SBL ¦ – f 35

*15:38 ⸂ συμπαραλαβεῖν RP f 35 TR ¦ συμπαραλαμβάνειν TNT2 NA NIV SBL ¦ συνπαραλαμβάνειν WH

*15:39 ⸂ οὖν RP f 35 TR ¦ δὲ TNT2 WH NA NIV SBL

*15:39 ⸂2 ἀποχωρισθῆναι RP TR TNT2 WH NA NIV SBL ¦ χωρισθῆναι f 35

*15:40 ⸂ τοῦ θεοῦ RP f 35 TR ¦ τοῦ κυρίου TNT2 WH NA NIV SBL

*15:41 ⸂ τὴν Συρίαν καὶ Κιλικίαν RP f 35 TR TNT2 NA25 ¦ τὴν Συρίαν καὶ τὴν Κιλικίαν WH NA27+28 NIV SBL