Η Καινή Διαθήκη

1Ταῦτα εἰπὼν ὁ Ἰησοῦς ἐξῆλθε σὺν τοῖς μαθηταῖς αὐτοῦ πέραν τοῦ χειμάρρου τῶν Κέδρων, ὅπου ἦν κῆπος, εἰς ὃν εἰσῆλθεν αὐτὸς καὶ οἱ μαθηταὶ αὐτοῦ. 2ᾜδει δὲ καὶ Ἰούδας, ὁ παραδιδοὺς αὐτόν, τὸν τόπον· ὅτι πολλάκις συνήχθη ὁ Ἰησοῦς ἐκεῖ μετὰ τῶν μαθητῶν αὐτοῦ. 3Ὁ οὖν Ἰούδας, λαβὼν τὴν σπεῖραν, καὶ ἐκ τῶν ἀρχιερέων καὶ Φαρισαίων ὑπηρέτας, ἔρχεται ἐκεῖ μετὰ φανῶν καὶ λαμπάδων καὶ ὅπλων. 4Ἰησοῦς οὖν, εἰδὼς πάντα τὰ ἐρχόμενα ἐπ᾽ αὐτόν, ἐξελθὼν εἶπεν αὐτοῖς, Τίνα ζητεῖτε; 5Ἀπεκρίθησαν αὐτῷ, Ἰησοῦν τὸν Ναζωραῖον. Λέγει αὐτοῖς ὁ Ἰησοῦς, Ἐγώ εἰμι. Εἱστήκει δὲ καὶ Ἰούδας ὁ παραδιδοὺς αὐτὸν μετ᾽ αὐτῶν. 6Ὡς οὖν εἶπεν αὐτοῖς ὅτι Ἐγώ εἰμι, ἀπῆλθον εἰς τὰ ὀπίσω, καὶ ἔπεσον χαμαί. 7Πάλιν οὖν αὐτοὺς ἐπηρώτησε, Τίνα ζητεῖτε; Οἱ δὲ εἶπον, Ἰησοῦν τὸν Ναζωραῖον. 8Ἀπεκρίθη Ἰησοῦς, Εἶπον ὑμῖν ὅτι ἐγώ εἰμι· εἰ οὖν ἐμὲ ζητεῖτε, ἄφετε τούτους ὑπάγειν· 9ἵνα πληρωθῇ ὁ λόγος ὃν εἶπεν ὅτι Οὓς δέδωκάς μοι, οὐκ ἀπώλεσα ἐξ αὐτῶν οὐδένα. 10Σίμων οὖν Πέτρος ἔχων μάχαιραν εἵλκυσεν αὐτήν, καὶ ἔπαισε τὸν τοῦ ἀρχιερέως δοῦλον, καὶ ἀπέκοψεν αὐτοῦ τὸ ὠτίον τὸ δεξιόν. Ἦν δὲ ὄνομα τῷ δούλῳ Μάλχος. 11Εἶπεν οὖν ὁ Ἰησοῦς τῷ Πέτρῳ, Βάλε τὴν μάχαιραν εἰς τὴν θήκην· τὸ ποτήριον ὃ δέδωκέ μοι ὁ πατήρ, οὐ μὴ πίω αὐτό;
12Ἡ οὖν σπεῖρα καὶ ὁ χιλίαρχος καὶ οἱ ὑπηρέται τῶν Ἰουδαίων συνέλαβον τὸν Ἰησοῦν, καὶ ἔδησαν αὐτόν, 13καὶ ἀπήγαγον αὐτὸν πρὸς Ἄνναν πρῶτον· ἦν γὰρ πενθερὸς τοῦ Καϊάφα, ὃς ἦν ἀρχιερεὺς τοῦ ἐνιαυτοῦ ἐκείνου. 14Ἦν δὲ Καϊάφας ὁ συμβουλεύσας τοῖς Ἰουδαίοις, ὅτι συμφέρει ἕνα ἄνθρωπον ἀπολέσθαι ὑπὲρ τοῦ λαοῦ.
15Ἠκολούθει δὲ τῷ Ἰησοῦ Σίμων Πέτρος, καὶ ὁ ἄλλος μαθητής. Ὁ δὲ μαθητὴς ἐκεῖνος ἦν γνωστὸς τῷ ἀρχιερεῖ, καὶ συνεισῆλθε τῷ Ἰησοῦ εἰς τὴν αὐλὴν τοῦ ἀρχιερέως· 16ὁ δὲ Πέτρος εἱστήκει πρὸς τῇ θύρᾳ ἔξω. Ἐξῆλθεν οὖν ὁ μαθητὴς ὁ ἄλλος ὃς ἦν γνωστὸς τῷ ἀρχιερεῖ, καὶ εἶπε τῇ θυρωρῷ, καὶ εἰσήγαγε τὸν Πέτρον. 17Λέγει οὖν ἡ παιδίσκη ἡ θυρωρὸς τῷ Πέτρῳ, Μὴ καὶ σὺ ἐκ τῶν μαθητῶν εἶ τοῦ ἀνθρώπου τούτου; Λέγει ἐκεῖνος, Οὐκ εἰμί. 18 Εἱστήκεισαν δὲ οἱ δοῦλοι καὶ οἱ ὑπηρέται ἀνθρακιὰν πεποιηκότες, ὅτι ψύχος ἦν, καὶ ἐθερμαίνοντο· ἦν δὲ μετ᾽ αὐτῶν ὁ Πέτρος ἑστὼς καὶ θερμαινόμενος.
19Ὁ οὖν ἀρχιερεὺς ἠρώτησε τὸν Ἰησοῦν περὶ τῶν μαθητῶν αὐτοῦ, καὶ περὶ τῆς διδαχῆς αὐτοῦ. 20Ἀπεκρίθη αὐτῷ ὁ Ἰησοῦς, Ἐγὼ παρρησίᾳ ἐλάλησα τῷ κόσμῳ· ἐγὼ πάντοτε ἐδίδαξα ἐν συναγωγῇ καὶ ἐν τῷ ἱερῷ, ὅπου πάντοτε οἱ Ἰουδαῖοι συνέρχονται, καὶ ἐν κρυπτῷ ἐλάλησα οὐδέν. 21Τί με ἐπερωτᾷς; Ἐπερώτησον τοὺς ἀκηκοότας, τί ἐλάλησα αὐτοῖς· ἴδε, οὗτοι οἴδασιν ἃ εἶπον ἐγώ. 22Ταῦτα δὲ αὐτοῦ εἰπόντος, εἷς τῶν ὑπηρετῶν παρεστηκὼς ἔδωκε ῥάπισμα τῷ Ἰησοῦ, εἰπών, Οὕτως ἀποκρίνῃ τῷ ἀρχιερεῖ; 23Ἀπεκρίθη αὐτῷ ὁ Ἰησοῦς, Εἰ κακῶς ἐλάλησα, μαρτύρησον περὶ τοῦ κακοῦ· εἰ δὲ καλῶς, τί με δέρεις; 24 Ἀπέστειλεν αὐτὸν ὁ Ἄννας δεδεμένον πρὸς Καϊάφαν τὸν ἀρχιερέα.
25Ἦν δὲ Σίμων Πέτρος ἑστὼς καὶ θερμαινόμενος· εἶπον οὖν αὐτῷ, Μὴ καὶ σὺ ἐκ τῶν μαθητῶν αὐτοῦ εἶ; Ἠρνήσατο οὖν ἐκεῖνος, καὶ εἶπεν, Οὐκ εἰμί. 26Λέγει εἷς ἐκ τῶν δούλων τοῦ ἀρχιερέως, συγγενὴς ὢν οὗ ἀπέκοψε Πέτρος τὸ ὠτίον, Οὐκ ἐγώ σε εἶδον ἐν τῷ κήπῳ μετ᾽ αὐτοῦ; 27Πάλιν οὖν ἠρνήσατο ὁ Πέτρος, καὶ εὐθέως ἀλέκτωρ ἐφώνησεν.
28Ἄγουσιν οὖν τὸν Ἰησοῦν ἀπὸ τοῦ Καϊάφα εἰς τὸ πραιτώριον· ἦν δὲ πρωΐ, καὶ αὐτοὶ οὐκ εἰσῆλθον εἰς τὸ πραιτώριον, ἵνα μὴ μιανθῶσιν, ἀλλ᾽ ἵνα φάγωσι τὸ Πάσχα. 29Ἐξῆλθεν οὖν ὁ Πιλάτος πρὸς αὐτούς, καὶ εἶπε, Τίνα κατηγορίαν φέρετε κατὰ τοῦ ἀνθρώπου τούτου; 30Ἀπεκρίθησαν καὶ εἶπον αὐτῷ, Εἰ μὴ ἦν οὗτος κακοποιός, οὐκ ἄν σοι παρεδώκαμεν αὐτόν. 31Εἶπεν οὖν αὐτοῖς ὁ Πιλάτος, Λάβετε αὐτὸν ὑμεῖς, καὶ κατὰ τὸν νόμον ὑμῶν κρίνατε αὐτόν. Εἶπον οὖν αὐτῷ οἱ Ἰουδαῖοι, Ἡμῖν οὐκ ἔξεστιν ἀποκτεῖναι οὐδένα· 32ἵνα ὁ λόγος τοῦ Ἰησοῦ πληρωθῇ, ὃν εἶπε, σημαίνων ποίῳ θανάτῳ ἔμελλεν ἀποθνῄσκειν.
33Εἰσῆλθεν οὖν εἰς τὸ πραιτώριον πάλιν ὁ Πιλάτος, καὶ ἐφώνησε τὸν Ἰησοῦν, καὶ εἶπεν αὐτῷ, Σὺ εἶ ὁ βασιλεὺς τῶν Ἰουδαίων; 34Ἀπεκρίθη αὐτῷ ὁ Ἰησοῦς, Ἀφ᾽ ἑαυτοῦ σὺ τοῦτο λέγεις, ἢ ἄλλοι σοι εἶπον περὶ ἐμοῦ; 35Ἀπεκρίθη ὁ Πιλάτος, Μήτι ἐγὼ Ἰουδαῖός εἰμι; Τὸ ἔθνος τὸ σὸν καὶ οἱ ἀρχιερεῖς παρέδωκάν σε ἐμοί· τί ἐποίησας; 36Ἀπεκρίθη Ἰησοῦς, Ἡ βασιλεία ἡ ἐμὴ οὐκ ἔστιν ἐκ τοῦ κόσμου τούτου· εἰ ἐκ τοῦ κόσμου τούτου ἦν ἡ βασιλεία ἡ ἐμή, οἱ ὑπηρέται ἂν οἱ ἐμοὶ ἠγωνίζοντο, ἵνα μὴ παραδοθῶ τοῖς Ἰουδαίοις· νῦν δὲ ἡ βασιλεία ἡ ἐμὴ οὐκ ἔστιν ἐντεῦθεν. 37Εἶπεν οὖν αὐτῷ ὁ Πιλάτος, Οὐκοῦν βασιλεὺς εἶ σύ; Ἀπεκρίθη Ἰησοῦς, Σὺ λέγεις, ὅτι βασιλεύς εἰμι ἐγώ. Ἐγὼ εἰς τοῦτο γεγέννημαι, καὶ εἰς τοῦτο ἐλήλυθα εἰς τὸν κόσμον, ἵνα μαρτυρήσω τῇ ἀληθείᾳ. Πᾶς ὁ ὢν ἐκ τῆς ἀληθείας ἀκούει μου τῆς φωνῆς. 38Λέγει αὐτῷ ὁ Πιλάτος, Τί ἐστιν ἀλήθεια;
Καὶ τοῦτο εἰπών, πάλιν ἐξῆλθε πρὸς τοὺς Ἰουδαίους, καὶ λέγει αὐτοῖς, Ἐγὼ οὐδεμίαν αἰτίαν εὑρίσκω ἐν αὐτῷ. 39Ἔστι δὲ συνήθεια ὑμῖν, ἵνα ἕνα ὑμῖν ἀπολύσω ἐν τῷ Πάσχα· βούλεσθε οὖν ὑμῖν ἀπολύσω τὸν βασιλέα τῶν Ἰουδαίων; 40Ἐκραύγασαν οὖν πάλιν πάντες, λέγοντες, Μὴ τοῦτον, ἀλλὰ τὸν Βαραββᾶν· ἦν δὲ ὁ Βαραββᾶς λῃστής.

*18:1 ο 95.9% ¦ — NA SBL WH 0.3%

†18:1 των 93.1% ¦ του NA SBL 1.3%

‡18:2 ο 57.6% ¦ και ο ANT BYZ HF 36.7% ¦ — NA SBL WH 0.3%

§18:3 φαρισαιων 96.2% ¦ εκ των φαρισαιων CT 0.4%

*18:4 εξελθων ειπεν 96.7% ¦ εξηλθε και λεγει CT 1.4%

†18:5 ο ιησους 96.9% ¦ — NA SBL WH 2.5%

‡18:5 ειστηκει ¦ ιστηκει TH WH

§18:6 οτι 94.5% ¦ — CT 5.5%

*18:6 απηλθον 99% ¦ απηλθαν TH WH 0.3%

†18:6 επεσον 98.3% ¦ επεσαν CT 1.3%

‡18:7 αυτους επηρωτησε 72.4% ¦ επηρωτησεν αυτους CT 5.2%

§18:7 ειπον 98.8% ¦ ειπαν NA SBL WH 0.3%

*18:8 ιησους 80.5% ¦ ο ιησους TR 14.4%

†18:10 ωτιον 97.3% ¦ ωταριον CT 0.6%

‡18:11 μαχαιραν 50.3% ¦ μαχαιραν σου BYZ HF TR 44.6%

§18:13 απηγαγον αυτον 86.8% ¦ ηγαγον CT 0.4%

*18:14 απολεσθαι 92.1% ¦ αποθανειν CT 6.6%

†18:15 ο 97% ¦ — CT SCR 2.9%

‡18:16 ειστηκει ¦ ιστηκει TH WH

§18:16 ος ην γνωστος τω αρχιερει 98.3% ¦ ο γνωστος του αρχιερεως CT 0.1%

*18:17 η παιδισκη η θυρωρος τω πετρω 97.4% ¦ τω πετρω η παιδισκη η θυρωρος CT 1.1%

†18:18 ειστηκεισαν ¦ ιστηκεισαν TH WH

‡18:18 μετ αυτων ο πετρος 92.2% ¦ και ο πετρος μετ αυτων CT 1.7%

§18:20 ο 92.5% ¦ — CT 1.9%

*18:20 ελαλησα 90% ¦ λελαληκα CT 4.4%

†18:20 συναγωγη 82.2% ¦ τη συναγωγη TR 12.6%

‡18:20 παντοτε 77.6% ¦ παντες CT 12.9%

§18:21 επερωτας 95.8% ¦ ερωτας CT 3.3%

*18:21 επερωτησον 92.8% ¦ ερωτησον CT 5.3%

†18:22 των υπηρετων παρεστηκως 94.4% ¦ παρεστηκως των υπηρετων CT 0.5%

‡18:23 ο 96.5% ¦ — CT 1.2%

§18:23 δερεις 62.9% ¦ δαιρεις PCK 36.7%

*18:24 απεστειλεν 83.8% ¦ απεστειλεν ουν CT SCR 8.3%

†18:25 ουν 67.7% ¦ — CT TR 30.5%

‡18:27 ο 69.7% ¦ — CT 25.3%

§18:28 πρωι 57.1% ¦ πρωια BYZ TR 37.3%

*18:28 αλλ ινα 96% ¦ αλλα CT 3.1%

†18:29 πιλατος ¦ πειλατος TH WH

‡18:29 προς αυτους και ειπε 81.8% ¦ εξω προς αυτους και φησι CT 1.7%

§18:29 κατα 99.1% ¦ — WH 0.1%

*18:30 ειπον 98.7% ¦ ειπαν CT 0.5%

†18:30 κακοποιος 99.2% ¦ κακον ποιων CT 0.3%

‡18:31 ο 97.2% ¦ — WH 0.3%

§18:31 πιλατος ¦ πειλατος TH WH

*18:31 ουν 81.9% ¦ — NA SBL WH 1.2%

†18:32 εμελλεν 59.6% ¦ ημελλεν ANT BYZ CT HF TR 40.3%

‡18:33 εις το πραιτωριον παλιν 88.7% ¦ παλιν εις το πραιτωριον CT 7.5%

§18:33 πιλατος ¦ πειλατος TH WH

*18:34 αυτω ο 85.3% ¦ — CT 1.1%

†18:34 αφ εαυτου 98.8% ¦ απο σεαυτου CT 1%

‡18:34 σοι ειπον 89.8% ¦ ειπον σοι CT 0.7%

§18:35 πιλατος ¦ πειλατος TH WH

*18:36 ιησους 88.7% ¦ ο ιησους TR 10.8%

†18:36 αν οι εμοι ηγωνιζοντο 93.4% ¦ οι εμοι ηγωνιζοντο αν CT 2.8%

‡18:37 πιλατος ¦ πειλατος TH WH

§18:37 ιησους 56% ¦ ο ιησους BYZ CT TR 42.5%

*18:37 εγω 94% ¦ — CT 4.3%

†18:38 πιλατος ¦ πειλατος TH WH

‡18:38 αιτιαν ευρισκω εν αυτω 95.7% ¦ ευρισκω εν αυτω αιτιαν CT 1.5%

§18:39 υμιν ¦ ημιν PCK [Note: Morrill does not document the PCK variant in his collation.]

*18:39 υμιν απολυσω 82% ¦ απολυσω υμιν CT 8.7%

†18:39 υμιν απολυσω 74.3% ¦ απολυσω υμιν CT 10.9%

‡18:40 παλιν παντες 52.3% ¦ παντες PCK 31% ¦ παλιν CT 12.3%