1Morarame Eria arotoh toehse Ritonõpo a, wiriwirikane ae kapu aka. Mame toytose Eria Eriseu maro Kiukau poe. 2Mame osema tao ynara tykase Eria tymarono Eriseu a.

— Taro exiko; tonyohse ywy Ritonõpo a Peteu pona jytotohme, tykase.

Yrome ynara tykase Eriseu Eria a:

— Ritonõpo Kuesẽkõ netaryme onetaryme roropa: orumekara sãtã ase, tykase. Naeroro toytose toto Peteu pona.

3Mame urutõ kõ, morotõkõ oximõmãkõ toytose toto Eriseu a oturupose:

— Tuaro mahno? Oesẽ arõko Ritonõpo mana owinoino, seroae ro? tykase.

— Ỹ, zuaro ase, yrome moro poko oturupyra sehtone, tykase Eriseu.

4Mame ynara tykase Eria Eriseu a:

— Taro exiko, tonyohse jexiryke Ritonõpo a, Jeriko pona jytotohme, tykase.

Yrome ynara tykase Eriseu:

— Ritonõpo Kuesẽkõ netaryme onetaryme roropa, ynara ãko ase oya: Orumekara ase rahkene, tykase.

Naeroro toytose toto Jeriko pona.

5Mame urutõ kõ oximõmãkõ, morotõkõ toytose toto Eriseu a oturupose:

— Zuaro mahno? Seroae oesẽ arõko Ritonõpo owinoino mana, tykase toto.

— Ỹ, zuaro ase, tykase Eriseu, — yrome moro poko oturupyra sehtone, tykase.

6Mame ynara tykase Eria Eriseu a:

— Taro rokẽ exiko. Tonyohse ywy, tuna Joatão pona jytotohme, tykase.

Yrome tozuhse ynororo Eriseu a:

— Ritonõpo Kuesẽkõ netaryme, onetaryme roropa orumekara ase rahkene, tykase.

Naeroro toytose ro toto. 7Morarame 50me urutõ kõ toto ekahmãko kynexine tuna Joatão ehpikoxi. Totypohse Eria maro Eriseu tuna ehpio. Mokaro urutõ kõ 50mãkõ xikihme toh nexiase ameke pyra. 8Mame tupõ jaraõ tupokase Eria a, tamẽse eya, mame moro ke tuna totapase eya. Typipohse tuna ahtao tãtapiakase, mame Eriseu maro takuohse toto nono tonorẽ poro. 9Moroto ynara tykase Eria Eriseu a:

— Kaxiko ya, oty se hma ya ekarotohme oya jaropyra ro Ritonõpo ahtao, tykase.

— Ritonõpo Zuzenu se rokẽ ase orẽpyra jehtohme aomipona, omyakãme jehtohme, tykase Eriseu.

10Ynara tykase Eria:

— Moro, onekaropohpyry tupime ekarotohme oya. Yrome moro apoĩko mase jeneryhtao, tarose jahtao owinoino, jenepyra awahtao anapoipyra mase, tykase.

11Oturũko ro toh nexiase toytorykohtao; mame mõtoino rokẽ tapiakase toto kahu a apoto ao tutuyhmase kawaru tomo a, toto rãnakuroko. Mame wiriwirikane a Eria tarose kakoxi kapu aka. 12Moro eneryke Eriseu a tykohtase ynororo:

— Papa! Papa! Izyraeu tõ ewomane! Arypyra mase!

Mame Eria onenepyra ropa toehse ynororo.

Mame tãtasamaryke tupõ tyxihkase Eriseu a irãnakuroko. 13Eria zuponỹpyry tanỹse eya, nono pona aepukahpyry. Toeramase ropa ynororo tuna Joatão ehpikoxi ropa. 14Eria zuponỹpyry ke tuna typipohse eya. Ynara tykase:

— Otoko Ritonõpo nae, Eria esemy?

Mame tuna totapase ropa eya, tãtapiakase moro irãnakuroko, mame tãtakuohse ynororo tuna Joatão mõpozakoxi.

15Mame mokaro urutõ kõ 50mãkõ Jeriko põkõ moro eneryke tyya xine ynara tykase:

— Eria jamitunuru Eriseu maro mana! tykase toto. Toytose toto tõseporytohkõme imaro. Tosekumuru po typorohse toto Eriseu ẽpataka, “Imehxo mase,” katohme, 16mame ynara tykase toto:

— Taro ynanase 50me orutua komo, jamihme exiketomo. Yna enyohko oesẽ zupise. Otarame Ritonõpo Zuzenu a tarose ynororo ypy emory pona, otarame jakanahmã pona tarose, tykase toto.

— Arypyra, oenyohpyra xine ase. Ytopyra ehtoko, tykase Eriseu.

17Yrome kakehpyra toto exiryke, kuremỹme taropose toto eya. Oseruao ẽmepyry taropose toto Eria zupiry poko repe. Yrome onenepyra tokurehse toto. 18Mame toeramase ropa toto Jeriko pona ropa. Moroto Eriseu kynexine toto eraximãko. Ynara tykase ynororo eya xine:

— Ytopyra ehtoko, ase oya xine.

19Mame orutua kõ, Jeriko põkõ toytose oturuse Eriseu maro:

— Tuaro mase, sero pata kure repe, yrome tuna rokẽ popyra nase, ipokoino poeto tõ exipyra ro ahtao epukãko.

20Naeroro ynara tykase Eriseu:

— Sautu tyriko kasana kasenato aka, mame enehko ya, tykase. Tonehse eya xine, 21mame toytose Eriseu tuna enatyry pona, tuna kuaka moro sautu tomase eya, ynara tykase ynororo:

— Ynara ãko Ritonõpo Kuesẽkõ mana: “Sero tuna kurãkãko ase, taroino anaorihmapopyra ropa mana, poeto tõ epukara roropa exĩko mana sero tuna pokoino.”

22Mame moro tuna tukurãkase rahkene. Kure mana seroae ro, Eriseu omihpyry ae ro.

23Morarame Eriseu toytose Jeriko poe Peteu pona. Osema ae aytoryhtao ahno, nuasemãkõ tutũtase pata poe, ipoihtõko toh kynexine, eunohnõko, ynara tykohtase eya xine:

— Ytoko taroino, merehkusasame exikety! Onuhko ty! tykase toto.

24Toeramase Eriseu toto enese:

— Awãnohtorỹko Ritonõpo mana, tykase. Mame uusa tõ asakoro tutũtase itu htae toto esekase. Tosekase toto 42mãkomo.

25Morotoino toytose Eriseu ypy Karameru pona. Imeĩpo Samaria pona toytose ynororo.