1Uuru xinukutumehme sã toehse!

Uuru kurã zemime pyra mana!

Topu tõ, Ritonõpo Tapyĩ kyryry sapararahme typahse mã kehko osema tõkehko ae!

2Poetohti tõ Jerusarẽ põkõ uuru kurã sã toh nexiase kyya xine,

Yrome seromaroro oripo sã rokẽ mã toto orino risẽ sã rokene.

3Ropo nohpory itu htaõ suhsu ekarõko typoenomo a.

Yrome wekyry tõ mã awexituruze tõ sã mã toto,

typoenõ pyno pyra sã mã toto.

4Typoenõ orihmapõko mã toto omise ehtoh ke te, tuna se ehtoh ke roropa.

Poetohti xitãko tonahsẽ peneryke,

yrome onekaropyra mã toto.

5Ahno nae torẽnase aexityã tõtukuru poko kure,

yrome orihnõko mã toto,

tomitapãse osema tõ ae;

torẽnase tonahsã kurã poko toh nexiase,

yrome seromaroro ipahtyã poko mã toto

tynapyry zupĩko.

6Wekyry tõ wãnohtoh mã Sotoma põkõ wãnohtopõpyry motye,

axĩ tonahkase toto ahtao Ritonõpo a.

7Yna tuisary tõ poenõ kure rokẽ toh nexiase akurũ karimutumã samo,

jamihme toh nexiase, apotũkehpyra.

Enurukõ zemime sã nexiase kure rokẽ exiryke.

8Seromaroro ẽmytykõ xinukutume mã toehse, sakaramato samo.

Aytorykohtao osema tao toto onenetupuhpyra imehnõ mana.

Toto pihpyry tasarahse samo tõsexihse jehpyrykõ pokona wewe samo.

9Totapase aexityã etonatoh poko,

jetuhkopyra toh nexiase.

Mãpyra mokaro axi hkopyra orihketomo, jetuhxo toehse toto,

tomitapãse toexirykõke, tonahsẽ pyra exiryke.

10Jerusarẽ tonahkase ahtao, nohpo tomo, typoenõ pyno aehtyã,

typoenõkõ tahnose eya xine tõtuhtohkõme.

11Ritonõpo Kuesẽkõ zehno toexiryke apoto tukase eya.

Jerusarẽ tyahkapose eya porehme.

12Ahno tõ emero nono põkõ tõsenetupuhse,

ituisary tõ roropa tõsenetupuhse Jerusarẽ poko:

epetõkara omõsaromepyra mana pata Jerusarẽ omõtoh ae,

tykase toh repe.

13Yrome morara toehse iirypyryme urutõ kõ exiryke,

oturuketõ roropa iirypyryme exiryke,

ahno kurã totapapose eya xine exiryke.

14Tonurãkara sã toytoytose oturuketomo,

urutõ kõ roropa xikurome mã toto ipunaka.

Zupõkõ apory se pyra imehnõ kynexine nuriame exiryke munu ke.

15Ynara tykohtase ahno tomo:

“Mya ytotoko! Nuriame matose! Japopyra exiko!”

Mame toytose toto ahtao imehnõ nonory tõ poro

ynara tykase morotõkõ eya xine:

“Tarona oehtohkõ se pyra ynanase,” tykase.

16Mokaro pyno pyra toehse Ritonõpo nexiase;

sapararahme toto taropose eya.

Mokaro oturuketõ otururu etary se pyra nexiase.

Tamuximãkõ pyno pyra toehse roropa nexiase.

17Typenekehse ynanexiase yna osenuhmary poko yna akorehmananõ eraximary poko;

yna akorehmary eraximãko ynanexiase ahno a repe,

yrome anakorehmasaromepyra nexiase.

18Yna epetõkara yna enẽko toh nexiase ytosaromepyra yna ehtohme osema tõ ae.

Isene yna ehtopõpyry enahsasaka nexiase,

orihsasaka ynanexiase.

19Yna ekahmananõ axĩ tooehse nexiase, pianoimo motye.

Ypy tõ po yna tokahmase eya xine,

tokare pyra yna tapoise roropa eya xine ona tonorẽ po.

20Isene yna ehtoh tapoise eya xine, Ritonõpo nymenekahpyry yna tuisaryme.

Mokyro ynanenetuputyase yna ewomaneme,

yna onyryhmara yna epetõkara ehtohme.

21Atãkyematoko, Etõ põkomo, Uze põkõ roropa,

exianatoko oexianarykõ se awahtao xine.

Yrome okynã pyra oporemãkapotohkõ oehnõko mana, awãnohtohkõme;

toetỹse exiketyme sã exĩko matose

tupoke pyra ytoytõko roropa matose.

22Jerusarẽ põkõ pake tuãnohse mã toto popyra toto ehtoh emetakame.

Jũme pyra taroposẽme exĩko matose Ritonõpo a sapararahme imeimehnõ nonory tõ poro.

Yrome amarokomo, Etõ põkomo tuãnohsẽme exĩko matose Ritonõpo a;

jarãnaka oorypyrykõ ripõko mana.