1Aimo, otato exiko ãmorepatoh poko ya, wenikehpyra roropa exiko ynyripory poko oya. 2Tuaro exiketõ omiry etako, atamorepako toto namorepatoh enetupuhtohme oya. 3Ỹ, tuaro ehtoh ekaropoko, ikohmako opore enetupuhtoh ekaropotohme oya. 4Morohne zupiko, parata zupiry sã oya, mõkomo kurã zonemyhpyry zupiry sã roropa oya. 5Morohne zupiryhtao oya Ritonõpo zuno ehtoh waro exĩko mase. Ritonõpo waro ehtoh enetupuhpitõko roropa mase. 6Kuesẽkõ mokyro tuaro ehtoh ekaroneme kyya xine; Aomiry poe tuaro exĩko sytatose, enetupuhnõko roropa sytatose. 7Zae ehtoh poko exiketõ akorehmãko mana, toto ewomãko roropa mana. 8Zae imehnõ poko exiketõ ewomãko Ritonõpo mana, Tõmipona exiketõ eraseme mana.

9Jomiry etaryhtao oya enetupuhnõko mase zae ehtoh poko, kure ehtoh poko, ajohpe pyra ehtoh poko, enara, mame zae ehtoh riry waro exĩko mase. 10Tuaro exiketyme exĩko mase, azamaro tuaro oehtoh exĩko mana. 11Zae ehtoh waro oehtoh oewomãko mana, tuaro oehtoh ke osewomãko mase 12popyra ehtoh poko pyra oehtohme. Moro pokoino ameke rokẽ exĩko mase ajohpe exiketõ poe: 13mokaro a zae ehtoh turumekase tyyrypyrykõ poko rokẽ toehtohkõme; 14tãkye exĩko mã toto popyra ehtoh poko tahtao xine te, popyra imehnõ ehtoh toto zamaro mana; 15ajohpe mã toto, ajoajohpe roropa mã toto.

16Mame osenekunohpopyra exĩko mase tukuhse awahtao nohpo a imeimehnõ poko exikety a, omi kurã ke sã oeahmaryhtao tymaro oehtohme. 17Mokyro nohpo tynio wenikehkãko mana, tõmihpyry Ritonõpo a moro poko wenikehnõko roropa mana. 18Itapyĩ taka oytoryhtao orihtoh esemary ae ytõko mase; moro ae ytokety ameke pyra exĩko mana aorihtyã esaka. 19Mokyro nohpo maro ytoketõ oehpyra ropa mã toto, isene exiketõ esemary pona ropa. 20Naeroro zae ehtoh poko exiketõ ipoenohko zae ehtoh poko oehtohme roropa. 21Zae exiketõ, azahkuru pyra exiketõ isene exĩko mã toto sero nono po. 22Yrome popyra exiketõ itumehnõko Ritonõpo mana. Ãtaryka mukary sã iirypyrymãkõ oũko mana.