1Ona ekurume ase Sarõ po;

ririome ase jakanahmã po.

2Ririo samo omoxino tõ rãnao, moro sã mase, kuku, nohpo tõ rãnao.

3Masã zoko sã mase wewe tõ rãnao itu htao, moro sã mokyro mana ypyno exikety, imehnõ orutua kõ rãnao.

Typorohse jahtao imaro tãkye ase ipunaka.

Ypyno aexiry anusasamã sã mana ya.

4Jaroase ynororo oseahmatoh taka otuhtoh konõto pona.

Soutatu tõ kamisã sã konõto tanỹse jupuhpyry epoe ynara tymerose: “Opyno ase.”

5Uwa epery asarahtyã enehko ynapyryme yjamihtanohpotohme ropa, masã tõ roropa enahtohme,

ynara exiryke apotũkehnõko ase opyno jehtoh ke.

6Emary opozery wino jupuhpyry zopino mana,

japoĩko mana tomary ke apotunuru wino.

7Nohpo tomo, Jerusarẽ põkomo, õmirykõ etapoko kapau tõ netaryme, kapau nohpory tõ netaryme roropa,

yna onerekohmara oehtohkõme tohrame yna ahtao oximaro.

8Omi etãko ase, ypyno exikety omiryme.

Oehnõko mana axiny, ypy tõ poe yhtõko mana,

somohmã poe pyhseky ãko,

tururume oehnõko ya.

9Ypyno exikety kapau sã mana, kapau mũkuru samo.

Mose apuru moino ypyno exikety mana,

jarao osenuhmãko tapyi taka osenuhmatoh ae.

Tera kuroko jenẽko mana,

10Oturũko mã ypyno exikety ynetaryme.

Osehko xiaro, ynymenekahpyry;

eropa ymaro opyno ase ipunaka.

11Kuenime ehtoh tonahse,

konopo toehkehse roropa,

12ona po emero ekutãko mana.

Eremiatoh toehse mana;

utuku tõ osetãko mana tupito tõ po.

13Fiku tõ epery exipitõko mana,

uwa zoko tõ roropa eperytapitõko mana, typoxine mã kehko.

Owõko kuku, ỹpynu, oryxime exikety, eropa ty!

14Tõtonẽse mase utukuimo samo topu tõ rãnao, eutary aka osenepyra ehtohme.

Oẽmyty enexi; õmiry etaxi,

anusasame õmiry ya mana,

oẽmyty enekure roropa mana.

15Soesoe tõ sapoine, soesoe poenomo, kynarykahpyry ryhmaryino, uwa zoko tõ ekutaketomo.

16Ypyno exikety pyno ase ynymenekahpyryme mana.

Inymenekahpyryme ase roropa.

Toky tõ arõko mana, kaneru tomo, onahpoty pona ririo tõ rãnakuroko,

17ẽmehtoh pona, koko enahtoh pona.

Ỹpynume exikety osehko ropa axiny, tururume kapau samo, kapau mũkuru sã roropa ypy tõ Petea pona.