1ꞌBá la ị́jọ́ ụ̃tị̃ ĩꞌdi ásị́ gâlé,
wó Úpí la fẽ la ꞌbã idé ru rá rĩ gá nĩ.
2ꞌBá la icó ũrãlé la ị́jọ́ ĩꞌdidrị̂ kí pírí múké,
wó Úpí la ꞌbá ꞌbã ásị́sị́ŋá ụ̃ꞌbị̃ nĩ.
3Ífẽ ãzị́ míní lẽlé ngalé rĩ kí Úpí drị́,
ãzíla kí ru idé rá.
4Ãko pírí Úpí ꞌbã ũꞌbãlé rĩ kí ꞌbã ãzị́ cí,
átã ꞌbã ꞌbá ũnzí rĩ kí sĩ ụ́ꞌdụ́ lị́kị̃ drị̂ drị̃ tẽjó.
5 Úpí ngụ̃ ꞌbá pírí ãfó ru ásị́ gá rĩ kí ũnzí,
icó kí aꞌbelé drị̃rịma kóru ku.
6Lẽtáŋá kí ãꞌị̃táŋá be kí ꞌbá trũ ị́jọ́ ũnzí agá,
Úpí ụ̃rị̃jó rĩ la ꞌbá fẽ ị́jọ́ ũnzí aꞌbejó nĩ.
7Gẹ̃rị̃ ꞌbá drị̂ drĩ kí Úpí ní ãyĩkõ fẽ rá,
ĩꞌdi átã mẹ́rọ́ꞌbá ĩꞌdidrị̂ kí fẽ uꞌálé ĩꞌdi be ásị́ ị̃gbẹ̃ sĩ.
8Ãko were ịsụ́lé gẹ̃rị̃ pịrị rĩ sĩ rĩ ĩꞌdi múké,
ndẽ málĩ ịsụ́lé ŋãnã gẹ̃rị̃ ũnzí sĩ rĩ rá.
9ꞌBá la ị́jọ́ ụ̃tị̃ ĩꞌdi ásị́ gâlé rá,
wó Úpí la gẹ̃rị̃ ĩꞌdiní ru idéjó rĩ drị̃ ce nĩ.
10Ị́jọ́ ãfũlépi úpí tị gá rĩ ĩꞌdi ũkpó trũ,
lẽ tị la ꞌbã lị ị́jọ́ mũlũmbẽ sĩ ku.
11 Úpí lẽ kị́lọ̃ sĩ ãko kí ụ̃ꞌbị̃jó rĩ ꞌbã adru kí múké-múké;
ãko pírí kí ꞌbã ãnzị ꞌba adru kí ĩꞌdi ꞌbã ꞌbãlé rĩ áni.
12Ũpi ta kí ị́jọ́ ũnzí ku,
ãꞌdusĩku ũpĩ ĩꞌbadrị̂ la acá ũkpó ru la ị́jọ́ pịrị rĩ sĩ.
13Úpí la uꞌá ãyĩkõ sĩ la ꞌbá ị́jọ́ pịrị rĩ jọlépi rĩ sĩ,
ĩꞌdi ꞌbá ị́jọ́ pịrị rĩ jọlépi rĩ ꞌbã ị́jọ́ ꞌbã ãmbógó ru.
14Adrã úpí drị̂ la drã ají,
wó ꞌbá ũndũwá ru rĩ la ĩꞌdi ásị́ ịgbẹ rá.
15Ãyĩkõ úpí mẹ́lẹ́tị gá rĩ la ídri fẽ,
ĩꞌdi ꞌbã mũkẽ ĩꞌdi cécé ụ̃rụ́ꞌbụ̃ uzogó fẽlépi áyi sĩ rĩ ani.
16Ĩꞌdi múké ãndânĩ adrujó ũndũwá ru ãzíla vãtáŋá trũ,
ndẽ adrujó gólũdĩ ãzíla sílĩvã trũ rĩ rá.
17ꞌBá ãlá rĩ kí acị́ gẹ̃rị̃ kí agụlépi ị́jọ́ ũnzí gá ku rĩ kí agâ sĩ,
ꞌbá ĩꞌdi ꞌbã gẹ̃rị̃ tãmbalépi rá rĩ la ru ídri tãmba rá.
18Ãfó la ꞌbá agụ lị́kị̃ gá,
úríndí ị́pị́pị́ŋá drị̂ la ꞌbá fẽ aꞌdélé rá.
19Ĩꞌdi múké ru irijó vụ̃rụ́ ꞌbá lẽmẽrí rĩ kí agá,
ndẽ ãko arálé ará-arâ rĩ kí awajó ꞌbá ãfó trũ rĩ kí abe rĩ rá.
20ꞌBá ímbátáŋá arelépi rá rĩ la adru málĩ trũ,
ꞌbá ásị́ ꞌbãlépi Úpí drị̃ gá rá rĩ la adru drị̃lẹ́ba rú.
21ꞌBá ũndũwá ru rĩ ála ĩꞌdi nị̃ ị́jọ́ ĩꞌdiní lịlẹ́ pịrị rĩ sĩ,
ị́jọ́ ĩꞌdi ꞌbã jọlé rĩ la ꞌbá kí imbá rá.
22Ũndũwã ĩꞌdi kídí ídri drị̂ rú ꞌbá ũndũwá trũ rĩ ꞌbanî,
wó ꞌbá azalépi aza-azâ rĩ kí imbájó rĩ ĩꞌdi sáwã izaŋá.
23ꞌBá ũndũwá trũ rĩ ꞌbã ásị́ la ĩꞌdi imbá sĩ ru tị tã mbajó,
ị́jọ́ ĩꞌdi ꞌbã jọlé rĩ la ꞌbá kí imbá rá.
24Ị́jọ́ jọlé ásị́ ị̃gbẹ̃ sĩ rĩ ĩꞌdi cécé ãnụ́ áni,
ĩꞌdi ị̃lị́-ị̃lị́ ru ꞌbá ꞌbã úríndí ní ãzíla ĩꞌdi ꞌbá ụrụꞌbá ꞌbã ãlá ru.
25Gẹ̃rị̃ ãzí la iꞌdá ími drị̃lẹ́ gá ꞌdâ ãlá ru,
wó ãsị̃ŋá gá ĩꞌdi ími agụ drã gá.
26Ãkónã ꞌbã vị́ la ꞌbá fẽ ãzị́ ngalé nĩ,
ãꞌdusĩku ꞌbá ꞌbã tị ꞌbã lẽjó ãkónã najó rá rĩ sĩ.
27ꞌBá ãzị́ kóru rĩ ĩꞌdi ị́jọ́ ũnzí itú nĩ,
ĩꞌdi tị ko cécé ãcí kolépi bẹ̃kụ̃bẹ̃kụ̃ rĩ áni.
28ꞌBá ũnzí rĩ la fẽ ãcóŋá ní kpẹ̃lé nĩ,
káláŋá la fẽ la wọ̃rị̃ mgbã rĩ la iré rá.
29ꞌBá ãgọ̃bị̃ rú rĩ la ĩꞌdi ꞌbã jĩránĩ ulé,
ãzíla ĩꞌdi drị̃ la ce gẹ̃rị̃ ũnzí rĩ gá.
30ꞌBá ꞌbá ũbĩlépi mịfị́ sĩ kámị́-kámị́ rĩ la ị́jọ́ ũnzí itú,
ꞌbá ru tị mũlépi mgbe-mgbe cí rĩ la fẽ ị́jọ́ ũnzí rĩ la ru idé rá.
31Drị̃ꞌbị́ imve ĩꞌdi kõfíyã dị̃zã iꞌdalépi rĩ,
ála ĩꞌdi ịsụ́ ídri ãlá rĩ sĩ.
32ꞌBá ũmbã rụlépi gbõrú ku rĩ ndẽ ꞌbá ũkpó trũ rĩ rá,
ãzíla ꞌbá ru ũmbã ụtrị́lépi rá rĩ ndẽ ꞌbá táwụ̃nị̃ ãmbógó rĩ ꞌdụlépi rĩ rá.
33ꞌBá kí jẽgê ꞌbe rá sĩ ị́jọ́ Ãdróŋá ꞌbã lẽlé rĩ nị̃jó,
wó Úpí la ị́jọ́ múké rĩ umvi nĩ.