1Durinya na nan linba kur be li ni tee Yennu yare.

Li tingbouŋ nan wunba kur be li ni tee Yennu yare.

2Ki u nan tingbouŋ ki paan mɔkgbeŋa paak,

ki teen li fiakir ki li be nyun tiŋ po.

3Ŋmee mɔk yaak nba saa fit do Yennu kunkonn paaki?

Ŋmee saa fit kɔɔ u kasii ŋasaakak ni?

4See binba toona ŋan, ki bi tee popeenn damm,

ki tee binba ki jiantir yenbis, ki bia ki sent faak mɔsona.

5Yennu saa teen piisin bi paak, ki tinnib.

Yennu saa wann nan bi kaa biiti.

6Li niboorue tee binba jiantir Yennu,

wunba ki Jakɔb mun din jiantir na.

7Lootir gana. Lootir yaayoo ni gana na,

ki kpanbarjaann na n kɔɔ.

8Ŋmee tee kpanbarjaann maŋi?

Ŋɔɔe tee Yennu, ki mɔk paŋ ki kɔn ki nyant tɔbii,

ki tee Yabint daanɔ.

9Lootir gana. Lootir yaayoo ni gana na,

ki kpanbarjaann na n kɔɔ.

10Ŋmee tee kpanbarjaann maŋi?

Ŋɔɔe tee Yabint daanɔ Yennu,