1Ma Luda, ma Luda,

à kɛ̀ dera n ma tonn?

Ma wiki lɛ̀,

à kɛ̀ dera ńdi su ma sura baroo?

2Ma Luda,

ma lɛ́ zùnyĩ fãnantɛ̃, ama ńdi wemaro,

ma wiki lɛ̀mma gwãani dↄ, mádi yĩtɛro.

3Ń kú adona ń vutɛna kpatan,

mↄkↄ̃n kũ Isarailanↄ dì n sáabu kpá.

4Mↄkↄ̃mmɛ ó dizinↄ náani kɛ̀,

ò n náani kɛ̀, akũ n ń mìi sì.

5Ò lɛ́ zùnyĩ, akũ ò boki lè,

ò n náani kɛ̀, akũ wé'i dí ń kũro.

6Kↄ̀kↄ fítinnan ma ũ, bisãsirimɛ ma ũro,

òtɛni ma sↄ̃sↄ̃, òtɛni ma gya bo.

7Gbɛ̃ kũ òtɛni ma gwanↄ tɛni ma fobo,

òtɛn lɛ́zuki kɛma,

òtɛni ń mì kɛ dékũdekũ òtɛn pi:

8Lákũ àtɛn Dikiri náani kɛ nà, à a sura ba,

tó a yã kàagumɛ, à a mì sí.

9Mↄkↄ̃mmɛ n ma bo ma da nɛ̀sɛn,

n ma gwa aafia ma yↄ̃migↄrↄ.

10Má na n ↄĩ zaa nɛ́'isↄmmɛ,

ma Ludamɛ n ũ zaade má kú ma da nɛ̀sɛn.

11Ǹsungↄ̃ kú kũmao zã̀ro,

zaakũ wari kɛ̀ kãni kũmao,

gbɛ̃ke kun à kpámairo.

12Ò likamai dasidasi lán zùsanↄ bà,

ò ma kaguraa kɛ̀ lán Basã bùsu zùsa gbãnanↄ bà.

13Òtɛn lɛ́ atɛ̃ma lán músu ↄ́ↄdↄri

kũ òtɛn pↄ́ kɛ yákiyakinↄ bà.

14Ma gbãna tà lán í kↄtɛnaa bà,

ma mɛ̀ gupɛkinↄ bòkũn pínki,

ma mɛ̀ɛ yↄ̀ lán zↄ́saa bà.

15Ma kòto kori kɛ̀ lán kpɛ̃nɛ kaso bà,

ma nɛ́nɛ nà ma lɛ́ musu,

ò ma wutɛ lán gɛ̀ɛ bà lukutɛ̃n.

16Lɛwannanↄ gã̀ likanamai,

gbɛ̃ vãni pìnↄ nàkarama,

ò ma ↄnↄ kũ ma gbánↄ zↄ̃̀zↄ̃.

17Mani fↄ̃ mà a wánↄ naro pínki,

ò wɛ́ bìribiri, òtɛni ma gwa.

18Ò ma pↄ́kasanↄ kpàatɛkↄ̃nɛ,

ò kàpaa kpà ma uta yã musu.

19Dikiri, ǹsungↄ̃ kú kũmao zã̀ro,

mↄkↄ̃mmɛ ma gbãna ũ,

ǹ mↄ́ ǹ kpámai likalika.

20Ǹ ma bo ń fɛ̃nɛda lɛ́i,

ǹ ma wɛ̃̀ndi sí lɛwanna pìnↄa.

21Ǹ ma bo músu pìnↄ lɛ́i,

ǹ ma si zùsɛ̃ntɛ pìnↄ bɛ̃nɛa.

22Mani n tↄ́ bo ma gbɛ̃nↄ tɛ́,

mani n sáabu kpá kↄ̃kakaranaa gũn.

23Ákↄ̃nↄ Dikiri vĩnakɛrinↄ, à a sáabu kpá,

ákↄ̃nↄ Yakubu burinↄ, à a tↄ́ bo,

ákↄ̃nↄ Isarailanↄ, à mì natɛnɛ.

24Zaakũ adi takaside gya boro,

adi a wɛ̃ndakɛ foboro,

adi mìkpɛrɛ zunɛro,

à sã kpà a wikilɛnaai.

25Mani n sáabu kpá pari kↄ̃kakaranaa gũn,

mani lɛ́ kũ ma gbɛ̃̀nnɛ papa n vĩnakɛrinↄ wára.

26Takasidenↄ ni pↄ́ ble ò kã,

Dikiri ki wɛtɛrinↄ ni a sáabu kpá,

onigↄ̃ kú kũ wɛ̃̀ndiio gↄrↄ sĩnda pínki.

27Andunia lɛ́zɛkidenↄ nigↄ̃ Dikiri dↄ̃ ò arɛ dↄa,

buri kũ ò kunnↄ ni kútɛnɛ ń pínki,

28zaakũ kíblena bi Dikiri pↄ́mɛ,

àdi kí ble buri sĩnda pínkia.

29Andunia aruzɛkɛdenↄ ni donyĩ kɛnɛ ń pínki,

kũ gbɛ̃ kũ ò kú ga lɛ́inↄ,

gbɛ̃ kũ ò gɛ̀ɛ gɛ́kianↄ ni mì natɛnɛ ń pínki.

30Zia gbɛ̃nↄ ni donyĩ,

oni Dikiri yã baba gbɛ̃ kũ oni sunↄnɛ.

31Ò surabana yã o gbɛ̃ kũ òdi ń i kↄ̀ronↄnɛ,

zaakũ à gĩnakɛ à kɛ̀.