Luda yã takada kũ Bisã yão ZABURA 135

Dikiri táakilɛnaa

1Aleluya!

À Dikiri tↄ́ bo!

À Dikiri sáabu kpá, ákↄ̃nↄ a zĩkɛrinↄ!

2Ákↄ̃nↄ kũ adì zĩ kɛ Dikiri bɛanↄ,

á gbɛ̃ kũ adìgↄ̃ zɛna ó Luda ↄnnnↄ.

3À Dikiri tↄ́ bo, zaakũ à mana,

à a táaki lɛ́, zaakũ abirekũ mɛ́ à nna.

4Dikiri Yakubu burinↄ sɛ̀ a pↄ́ ũ,

à Isarailanↄ dìtɛ a gbɛ̃ yenyĩdenↄ ũ.

5Má dↄ̃ kũ Dikirin zↄ̃kↄ̃,

ó Luda mɛ́ à de tãnanↄla ń pínki.

6Dikiri dì yã kũ à yei kɛ

musu kũ zĩtɛo,

ísira gũn kũ a lↄ̀nↄo.

7Àdi tó legũ sisi ari andunia lɛ́zɛkia,

àdi tó legũ ma kũ a pinaao,

àdi bo kũ zàga'ĩao a pↄ́katɛkin.

8À Misila daudunↄ dɛ̀dɛ

kũ pↄ́kãde nɛ́ káakunↄ pínki.

9À sèedanↄ kũ daboyãnↄ kɛ̀ Misila,

à wɛ́ tã̀ Firi'auna kũ a ìbanↄa ń pínki.

10À burinↄ làka dasi,

à kína gbãnadenↄ dɛ̀dɛ,

11Amↄrinↄ kína Siↄ̃

kũ Basã kína Oguo

kũ Kanaanↄ bùsu kínanↄ ń pínki.

12À ń bùsu sì à kpà

a gbɛ̃ Isarailanↄa túbi ũ.

13Dikiri, n tↄ́ dìgↄ̃ kun gↄrↄ sĩnda pínki,

Dikiri, n yã nigↄ̃ dↄ gbɛ̃nↄgu ari ó buria.

14Zaakũ Dikiri ni tó a gbɛ̃nↄ bo mana,

ani a zↄ̀blerinↄ wɛ̃nda gwa.

15Burinↄ ń tãnanↄ pì kũ andurufuuo kũ wuraao,

bisãsiri ↄzĩnↄmɛ.

16Ò lɛ́ vĩ, ama òdi yã oro,

ò wɛ́ vĩ, ama òdi gu ero,

17ò sã vĩ, ama òdi yã maro,

òdi wesa boro.

18Ń pìrinↄn lɛɛlɛ kũńwomɛ

kũ gbɛ̃ kũ òtɛni ń náani kɛnↄ ń pínki.

19Isarailanↄ, à Dikiri sáabu kpá!

Haruna burinↄ, à Dikiri sáabu kpá!

20Levi burinↄ, à Dikiri sáabu kpá!

Dikiri vĩnakɛrinↄ, à Dikiri sáabu kpá!

21Arubarikademɛ Dikiri ũ zaa Zaiↄ̃,

àkũ kũ à kú Yurusalɛmu.

Aleluya!