Luda yã takada kũ Bisã yão ZIA YÃ 7

Sèedakɛna Luda zↄ̀blerinↄa

1Abire gbɛra ma malaika gbɛ̃nↄn siikↄ̃nↄ è zɛzɛna andunia kusuru siikↄ̃nↄa, ń baadi a kusuru ĩa kũna, de ĩa sún pá zĩtɛ ke ísira ke lí kearo yãi. 2Akũ ma malaika pãnde è, à bò à fùtɛ ifãboki kpa, à Luda Wɛ̃̀ndide sèedakɛbↄ kũna. À lɛ́ gbãna zù malaika gbɛ̃nↄn siikↄ̃ kũ ò ń gbá zɛ́ ò zĩtɛ kũ ísirao yaka pìnↄi 3à pì: Àsun zĩtɛ ke ísira ke línↄ yakaro ari ò sèeda kɛ ó Luda zↄ̀blerinↄ mì'arɛnↄa. 4Akũ ò gbɛ̃ kũ ò sèedaa pìi kɛ̀ḿmanↄ lɛ́ òmɛnɛ, ń gbɛ̃nↄn dúbu basuppla awɛɛsiikↄ̃mɛ. Ò bò Isaraila buri sĩnda pínki gũn.

5Yuda burinↄ gbɛ̃nↄn dúbu kuri awɛɛpla

Rubɛni burinↄ gbɛ̃nↄn dúbu kuri awɛɛpla

Gada burinↄ gbɛ̃nↄn dúbu kuri awɛɛpla

6Asa burinↄ gbɛ̃nↄn dúbu kuri awɛɛpla

Nafatali burinↄ gbɛ̃nↄn dúbu kuri awɛɛpla

Manase burinↄ gbɛ̃nↄn dúbu kuri awɛɛpla

7Simɛↄ burinↄ gbɛ̃nↄn dúbu kuri awɛɛpla

Levi burinↄ gbɛ̃nↄn dúbu kuri awɛɛpla

Isaka burinↄ gbɛ̃nↄn dúbu kuri awɛɛpla

8Zɛbuluni burinↄ gbɛ̃nↄn dúbu kuri awɛɛpla

Yusufu burinↄ gbɛ̃nↄn dúbu kuri awɛɛpla

Biliaminu burinↄ gbɛ̃nↄn dúbu kuri awɛɛpla.

Buri sĩnda pínki kakarana ludambɛ

9Abire gbɛra ma gbɛ̃nↄ è dasidasi, oni fↄ̃ ò ń lɛ́ dↄ̃ro. Ò bò bùsu sĩnda pínki gũn, buri sĩnda pínki gũn, gbɛ̃ sĩnda pínki gũn, buriyã sĩnda pínki gũn. Ò zɛzɛna gbà kũ Sãnɛ Bↄ̀rↄↄo arɛ. Ò utagyaba pura dadana, ò zaa lánↄ kũkũna ń ↄĩ. 10Òtɛn wiki gbãna lɛ́ òtɛn pi:

Surabanaa dì bo ó Luda kũ à vutɛna gbàaa

kũ Sãnɛ Bↄ̀rↄↄo kiamɛ.

11Malaikanↄn zɛzɛna ò lìka gbà kũ gbɛ̃ zↄ̃kↄ̃nↄ kũ pↄ́ bɛ̃nɛ mɛ̀n siikↄ̃nↄi ń pínki, akũ ò kùtɛkutɛ gbàa pì arɛ ò donyĩ kɛ̀ Ludanɛ 12ò pì:

Aami! Ó Luda mɛ́ à tↄ́ vĩ kũ gakurio

kũ ↄ̃ndↄ̃o kũ sáabuo kũ bɛ̀ɛrɛɛo

kũ ikooo kũ gbãnao gↄrↄ sĩnda pínki. Aami!

13Akũ gbɛ̃ zↄ̃kↄ̃ↄ pìnↄ doke ma la à pì: Dínↄn gyabapuradari díkĩnanↄ ũu? Ò bò máa? 14Ma pìnɛ: Baa, mↄkↄ̃n mɛ́ ń dↄ̃. Akũ à òmɛnɛ: Gbɛ̃ kũ ò bò wɛ́tãmma zↄ̃kↄ̃ↄ gũnnↄmɛ. Ò ń utagyabaa pìnↄ pìpi Sãnɛ Bↄ̀rↄ aru gũn à pura kũ̀.

15Abire yãin ò kú Luda gbà arɛ,

òtɛn doi a kpɛ́n fãnantɛ̃ kũ gwãanio.

Gbɛ̃ kũ à vutɛna gbàaa pìi dì a kuta kúńla.

16Nà ke ími ni ń dɛ doro,

ifãntɛ̃ ni ń lɛ́ro, gu ni wãḿmaro,

17zaakũ Sãnɛ Bↄ̀rↄ kũ à kú gbà guragura ni kɛ ń Dã̀ri ũ,

ani dońnɛ arɛ ari ísɛ̃ wɛ̃̀ndide bokia,

gbasa Luda ni ń wɛ́tɛ̃ warawarańnɛ pínki.