ⅠA a ba lɔ, k'awɔɔ gʊaa deem ɩ mim m kan a mim kɩ, ta a tɩr a ʊ durnya dʊdɔkənno zi kʊ ŋ nɩ dʊdɔ bɩ ba, a lɔ a bɩr mim bɩ dam wosogʊɔɔ wɔɔ wɔ ʊ, kʊ ŋ n'a dɩnda? ⅡAwɔɔ n a dɔ a ʊ, wosogʊɔɔ wɔɔ n nɩ zɛm bɩ durnya dʊdɔ ka ra? Bɩ, k'awɔɔ n nɩ zɛm bɩ durnya dʊdɔ ka, bɔ m awɔɔ bɩr a dam ma an nɩ minno poorero nɔɔm dɩndarɛ? ⅢAwɔɔ n a dɔ a ʊ, wɔɔ zɛm bɩ malɛɛkarɔ dʊdɔ ka ra? Bɩ, bɔ m kɛɛrɛ wɔɔ bɩ her mɩsɩrbaa naa minno dʊdɔ karɛ? ⅣKan naa kɩ haay, kʊ minno nɔɔn duro b'a da ʊ, b'awɔɔ gʊɔɔ kʊ kristagʊɔɔ bɩr dɩgarɛ ŋ ma hɔsɩ a sokʊma nɔ ʊ rɔ wɔɔ sa a ŋ ba a dʊdɔkənno. ⅤNaa do nyannɩ ba awɔɔ m na? Awɔɔ k'a m danyɩnɔ Krista nɔ ʊ rɔ wɔɔ, a ɩ yɩrɛ ɩ ʊ, awɔɔ gʊaa deem taan… ba ʊ, mindɔrɛzaa, k'a mim banka awɔɔ barla ra? ⅥA n a ga m, kʊ danyɩnɔ n ta kʊ m dʊdɔkənno taa y, an lɛ da bɩ, a bɩ zore kʊ ŋ nɩ ta kʊ m basɩrakənno taa y. ⅦSɩra nɔ ʊ, awɔɔ kʊrɔ ma maam-maam, ta k'awɔɔ nawʊm kʊ m dʊdɔkənno taa bɩ minto. Kʊ hɔ k'a bɩ tɩrga n y'a ba awɔɔ m, awɔɔ nɩ fɩr yɩrɛ, a jɩra ta b'ʊ bɩ m. Kʊ hɔ n n'a yɔrɛ awɔɔ m, awɔɔ n yɛ ma, k'a jɩra sɔ. ⅧBɩ, awɔɔ bɩr yɛm hɔɔ nɔɔn duro ma y, awɔɔ mɩŋŋɔɔ nɩ hɔ k'a bɩ tɩrga bam, an nɩ koor bam, bɩ, naa ba awɔɔ nawʊrɛ a danyɩnɔ m. ⅨAwɔɔ dɔ mɩŋŋa a ʊ, gʊɔɔ kʊ ŋ n'a bʊnyaa bam nɔ wɔɔ bɩncɛ bɩ nyɩntam Woso cirbəə b'ʊ ra? A bɩ bra bɩmba a mɩŋŋɔɔ nɩ y. K'a dɔ a ʊ, jaandənno, kan wosobaawɔnnɔ yaadənno kɩ, muno lannɔbənno, muno zinobənno, yaarɔ wʊta kan kʊ kɩ zannɔ, Ⅹkonno, mɩnyɔɔzannɔ, bɛɛmirewaasɩzannɔ, gʊɔɔ tɔzarlɛzannɔ, hɔyonno, ŋ bɩncɛ bɩ nyɩntam Woso cirbəə b'ʊ y. ⅪAwɔɔ gʊɔɔ gɔsɩnnɔ nyɩnta ŋn'ɩ hɔɔ nɔɔn duro bam biisi. Bɩ, Woso awɔɔ hu bɔ, an mimbʊnyaarɔ nɔɔn duro gʊ awɔɔ ma, an awɔɔ bɔ ʊ a hɔ, k'a a so awɔɔ ʊ, a awɔɔ ba tɩrga a mɩm ʊ, Zuuba Yeezuu Krista tɔ ma, Sɛnt-Ɛspri paŋŋa nɔ ʊ.

ⅫGʊaa a da ma an a hɩ, a ʊ: «Zaa ta ʊ kʊ mɔɔ n hɔ haay woo… ba.» Sɩra m, bɩ, hɔ haay bɛɛ n mɩŋŋa gʊaa n'a bam wa. Mɔɔ m da ma, m a hɩ, m ʊ: «Zaa ta ʊ kʊ m hɔ haay ba.» Bɩ, mɔɔ b'a tom hɔ niŋŋə n mɔɔ ba a lɔ y. ⅩⅢGʊaa bɩ do a da ma an a hɩ sɔ, a ʊ: «Hɔbɩrɛ da n y'a ʊ gʊaa nɔ tɔ ma, n nɩ gʊaa nɔ da hɔbɩrɛ tɔ ma sɔ. Bɩ, Woso zɛm bɩ hɔbɩrɛ kan gʊaa nɔ bɩ kɩ zaar ba.» Sɩra m, bɩ, n nɩ wɔɔ mɛ bɩ da jaandarɛ minto y, wɔɔ mɛ bɩ, ta an a wʊ ʊ Zuuba hɔ, Zuuba n ta ʊ wɔɔ mɛ bɩ daahan minto. ⅩⅣBɩ, Woso k'a Zuuba Yeezuu mɩm bɔ ʊ bɩ, a wɔɔ mɩm bɔŋ ʊ sɔ a paŋŋa bɩ m. ⅩⅤAwɔɔ n a dɔ a ʊ, awɔɔ mɛrɔ wɔɔ Krista mɛ vəŋŋəro m na? Mɔɔ yɛrɛ m Krista mɛ vəŋŋə sa m a ba lʊmɩŋŋahɛɛrɛzaa mɛ vəŋŋə ra? Ayy…, fɩɩga! ⅩⅥAwɔɔ n a dɔ a ʊ, kʊ gʊaa a zɛ kʊ ra kan lʊmɩŋŋahɛɛrɛzaa kɩ, a zaa bɩ kan lʊ bɩ kɩ a ba n y'a ʊ deem na? Bala, Wosoci a hɩ a ʊ: «Ŋ hɩɩya haay a ba gʊaa deem.» ⅩⅦBɩ, gʊaa k'a a zɛ kʊ ra kan Zuuba kɩ bɩ, a a ba ɛspri deem kan kɩ. ⅩⅧNaa minto bɩ, k'a a si jaandarɛ lɛɛ. Mimbʊnyaarɔ vantɔɔ kʊ gʊaa nɩ ŋ bam nɔ wɔɔ n a so a mɛ ʊ jilli y. Bɩ, jaandarɛzaa bɩ, mimbʊnyaa an n'a barɛ a mɛ bɩ m. ⅩⅨGɛɛ, awɔɔ n a dɔ a ʊ, awɔɔ mɛ bɩ Sɛnt-Ɛspri cɛ m, Woso n a ka awɔɔ ʊ, an n'awɔɔ heer ʊ ra? Bɩ minto bɩ, awɔɔ bɛɛ y'a so a mɩŋŋɔɔ ʊ dɔ ra? Woso y'a so awɔɔ ʊ. ⅩⅩBala, Woso hɔ bɔ gʊta an awɔɔ bʊmbɔ m. Bɩ minto bɩ, k'a hɔ k'a n'a lɛ bɔm Woso ʊ bɩ ba a mɛ bɩ m.