Bibeli Luayãtaalá Zelemii 2

Isailiↄ bↄa Dii kpɛ

1Dii yã'òmɛɛ à mɛ̀: 2Gɛ ǹ yã́ɛ bee kpàwakɛ Yelusalɛũdeↄ swã́u.

Ma Dii ma mɛ̀,

á wɛ̃ndiagↄↄ gbɛ̃kɛ pↄ́ á vĩmanↄ dↄmagu

gↄↄ pↄ́ á yemazi ma nↄ dafu ũ.

Gↄↄ bee á tɛmazi guwaiwaiu,

gu pↄ́ wi pↄ́tↄ̃uo.

3Aa ku ma mɛ̀ndo yã́iɛ,

aamɛ ma buapↄ́ káauↄ ũ.

Ma gbɛ̃́ pↄ́ ń mↄmↄↄ tàae è,

ↄ̃ músi ń lé.

Ma Dii mámɛ má ò.

4À swã́sɛ ma yã́i, á Isailiↄ,

á Yakↄbu buiↄ píi.

5Ma Dii ma mɛ̀,

tàae kpele á deziↄ èa,

ↄ̃ aa zã̀kũmanↄi?

Aa tɛ̀ tã́aↄzi, ↄ̃ aa gì ↄi.

6Ma ń bↄ́lɛ Egipi ma dↄaanɛ́ guwaiwaiu

ń sɛ̃gbão ń bùsu tↄ̃ↄ'ɛdeo

ń bùsu iminadeo ń gusisi pãsĩo,

gu pↄ́ gbɛ̃e lí a baa vĩo mɛ́ gbɛ̃e líↄ kuuo,

kási aai ma gbɛao.

7Ma suńnↄ tↄↄlɛ táaedeu la,

aaliↄ a libɛↄ ble ń a pↄmaaↄ.

Kɛ́ aa kà, aa ma bùsu gbãlɛ̀,

aa tò à gↄ̃̀ pↄ́ pↄ́ má yeio ũ.

8An sa'onaↄ i ma dↄ̃o,

ma ikoyãdanɛdeↄ i ma dↄ̃o,

an dↄaanaↄ bↄ̀ ma kpɛ,

an ãnabiↄ ãnabikɛkɛ̀ ń Baali gbãao,

aa tɛ̀ pↄ́ pↄ́ lí kã́fĩakɛnɛ́oↄzi.

9A yã́i má mↄ́ ń á yã́o sↄ̃,

mɛ́ má mↄ́ ń á nɛ́ↄ ń á tↄũnaↄ yã́o.

Ma Dii mámɛ má ò.

10À bua ísiawa e Sipi bùsuu à gwa.

À gbɛ̃́ zĩ Kedaa bùsuu à a yã́ tàasika,

í gwa tó yã́ɛ bee taa kɛ̀ we yãa.

11Buie a diiↄ lìlɛ yãae?

Kási an tã́apiↄá Lua no.

Ma gbɛ̃́ pↄ́ má dɛ Lua gawide ũ,

ma gbɛ̃́ↄ ma lɛũkpakɛ̀

ń pↄ́ pↄ́ lí kã́fĩakɛnɛ́oↄ.

12Á musudeↄ, à to yã́pi diwá,

á mɛ i seenata à gↄ̃ sã̀iii.

Ma Dii mámɛ má ò.

13Asa ma gbɛ̃́ↄ duunakɛ̀ lɛɛ plaɛ.

Mámɛ má nibↄna í wɛ̃nide ũ,

ↄ̃ aa ma to we,

aa gɛ̀ wà biaↄ yↄ̃̀ ńzĩaɛ,

bia tɛfɛɛna pↄ́ aa fↄ̃ í dilɛoↄ.

14Isailiↄá zↄↄnɛe?

Wà ń í zↄble guu nɛe?

Bↄ́yãi aa gↄ̃̀ pↄvĩaↄ ũ sai?

15Nↄ̀ↄmusuↄ pàlamá aa pũ̀namá,

ↄ̃ aa ń bùsu yàa,

an wɛ̃́lɛↄ tɛkũ̀, gbɛ̃e ku we lↄo.

16Mɛfisideↄ ń Tapanɛsideↄ ń mi wànɛ́.

17Ámɛ a yã́pi ì ázĩaɛo lò?

Ma Dii á Lua, kɛ́ má zɛmikũaɛ́,

ↄ̃ a ma to we.

18Bↄ́yãi álɛ gɛ́ Egipi Sioo í miii?

Àkɛa álɛ gɛ́ Asili Uflata í miii?

19Á vãikɛa a wi á musuɛ,

á pↄ̀ↄbↄzãkɛa a wɛ́tɛ̃a iɛ́.

À làasookɛ, í dↄ̃ kɛ́

á bↄa ma Dii á Lua kpɛ vãi,

mɛ́ á kua vĩakɛamɛɛ sai ĩ́i.

Ma Dii Lua Zĩgↄ̃de mámɛ má ò.

Isailiↄ dɛa nↄ náaisai ũ

20A ma zuu gbòo á nↄɛ à gɛ̃̀gɛ̃,

a ma baↄ kɛ̃̀kɛ̃,

a mɛ̀ á zↄblemɛɛo.

Sĩana guu i gbãsĩkɛ sĩ̀sĩ lɛsĩ píi musu

ń lí yɛ̀lɛlɛↄ píi gbáuo.

21Ma á bá vɛ̃ɛli maa náaide ũɛ.

Kpelewa a kɛ̃a,

a gↄ̃ vɛ̃ɛli bↄlɛnzĩaɛ ũi?

22Baa tó a zu'ò ń saoo

ń mↄsↄnao maamaa,

á tàae tèbateba a láamɛɛo.

Ma Dii Lua mámɛ má ò.

23Kpelewa á fↄ̃ o i gbãlɛo,

i kɛ Baaliↄnɛ kɛ̀kɛo ni?

À yã́ pↄ́ á kɛ̀ swadↄↄiↄ gwa,

à làasookɛ á yãkɛapiↄwa.

I gɛ́ le à su la,

lán yiongo núnu pↄ́ a mɛ fɛ̀lɛwa,

24lán sɛ̃̀a zàa'ĩn da pↄ́ dↄ́ɛkɛ̀ ń gbáao,

àlɛ gↄ̃ ĩ́ana sɛsɛwa.

Démɛ a fↄ̃ à aà lɛ́ liaa gↄↄ pↄ́ aà mɛ fɛ̀lɛi?

Zàa'ĩn sa pↄ́ lɛ́ aà wɛɛlɛↄ kpasao,

aa aà e a gↄↄwaɛ.

25Ásu àↄ kpálɛkɛńzi

e á kyale gɛ́ yaa á gbáu,

á kòlo giigagao.

Ń beeo a mɛ̀ a zɛkɛo,

wá ye dii zĩ̀loↄziɛ,

sema wà gɛ́má.

26Lá wí ì kpã́i kṹ, tó wà bↄ̀wà,

màa wa wida Isailiↄwa,

an kíaↄ ń ń gbãadeↄ

ń ń sa'onaↄ ń ń ãnabiↄ.

27Aaì o líɛ: Wá maen n ũ,

aaì o gbɛɛ: Ḿmɛ n wá í.

Aa bↄ̀ ma kpɛ, aai zɛmanↄo.

Gↄↄ pↄ́ taasi ń lé,

ↄ̃ aaì mɛ mà fɛlɛ mà ń suaba.

28Dii pↄ́ á kɛ̀ ázĩaɛↄ ku máɛ?

Aa fɛlɛ á taasikɛgↄↄ,

tó aa fↄ̃ á suaba!

Asa á Yudaↄ,

á diiↄ dasi kà á wɛ̃́lɛↄwa.

29Bↄ́yãi álɛ zↄakaimazii?

Ápii a bↄ ma kpɛɛ.

Ma Dii mámɛ má ò.

30Ma ĩadà á deziↄwa pãɛ,

aai totoapi yãdao.

Aa lɛ̀lɛ ń ãnabiↄwa

lán nↄ̀ↄmusu pↄkaalɛnawa.

31Á gbãgbɛ̃ↄ, à wɛ́tɛ ma yã́i.

Ma gↄ̃ Isailiↄnɛ gbáa

ge gubeebee ũ yã̀?

Bↄ́yãi ma gbɛ̃́piↄ ì mɛ

waↄ ń bɛbɛa kɛɛ,

wa mↄ ma kĩ́i lↄo ni?

32Nↄamblebↄ yã́ a fↄ̃ sã wɛ̃́ndiague?

Zãkɛzĩ pↄ́ↄ yã́ a fↄ̃ sã nↄ dafugue?

Kási ma yã́ sã̀ ma gbɛ̃́ↄgu

à gↄↄplakɛ̀.

33Á yenzi ɛsɛ vĩɛ fá!

Baa káalua sà zↄ̃ↄ,

á á yãkɛa dadaɛ̀.

34Wì taaside yãesaide au e á pↄkasaↄwa,

i kɛ a ń lé á kpɛ́u,

aalɛ á pↄ́ↄ sɛ́lɛn sↄ̃o.

35Gia ń beeo i mɛ á yãe vĩo,

ma pↄ a paázio.

Lá a mɛ̀ i duunakɛo,

má yã́kpalɛkɛánↄɛ.

36Bↄ́yãi iↄ liaaliaa à á yãkɛa lilɛi?

Egipiↄ widawá,

lá Asiliↄ kɛ̀ɛ́wa.

37Á bↄ we à su ń ↄo dia á musuɛ,

asa gbɛ̃́ pↄ́ álɛ ń náaikɛpiↄ,

ma gińziɛ, á dↄnlɛ emáo.