Bibeli Luayãtaalá Soũↄ 135

Dii táasilɛa

1Àleluya!

À Dii tↄbↄ!

À Dii táasilɛ aà zĩkɛnaↄ!

2Á gbɛ̃́ pↄ́ i zĩkɛ wá Lua uaↄ,

á gbɛ̃́ pↄ́ iↄ sĩ Dii kpɛ́ kpɛɛlɛↄ,

3à Dii tↄbↄ, asa a maaɛ,

à lɛ́mawà, asa bee mɛ́ na.

4Dii Yakↄbu buiↄ sɛ̀ a pↄ́ ũ,

à Isailiↄ dìlɛ a gbɛ̃́ yenzideↄ ũ.

5Má dↄ̃ kɛ́ Dii zↄ̃ↄ,

wá Lua mɛ́ dɛ diiↄla píi.

6Dii ì yã́ pↄ́ kàagu kɛ musu ń zĩ́lɛo,

ísia guu ń tↄↄlɛ nↄnauo.

7Ɔ̃mɛ ì to lou sisi tↄↄlɛ lɛ́wa,

ì to lou ma ń pílɛao,

ì bↄ ń zàa'ĩanao a làasiu.

8À Egipiↄ yoaↄ dɛ̀dɛ

ń pↄtuo nɛ́ sɛ̃́iaↄ píi.

9À seelaↄ ń dabudabuↄ kɛ̀ Egipi,

à Falaↄ̃ↄ ń a gbɛ̃́ↄ fù píi.

10À buiↄ mìdɛ dasi,

à kía gbãadeↄ dɛ̀dɛ.

11Amↄleↄ kí Siↄ̃ ń Basana kí Oguo

ń Kanaa bùsu kíaↄ píi.

12À gbadà ń ń bùsuo,

a kpà a gbɛ̃́ Isailiↄwa.

13Dii, n tↄ́ gaa vĩo,

Dii, n yã́ aↄ dↄ gbɛ̃́ↄgu gↄↄpiiɛ.

14Asa Dii a yãkɛkɛ a gbɛ̃́ↄnɛ,

i a zↄ̀blenapiↄ wɛ̃nagwa.

15Buipãleↄ ń diiↄ pì ń ã́nusuo ń vuaoɛ,

gbɛ̃nazĩna ↄgbɛↄnɛ.

16Aa lɛ́ vĩ, aali yã'oo,

aa wɛ́ vĩ, aali gu'e sↄ̃o.

17Aa swã́ vĩ, aali yãmao,

an lɛ́ ĩ́ana vĩo.

18An pinaↄ gↄ̃ńwaɛ

ń gbɛ̃́ pↄ́ lɛ́ ń náaikɛↄ píi.

19Isailiↄ, à Dii sáaukpa!

Aalona buiↄ, à Dii sáaukpa!

20Levii buiↄ, à Dii sáaukpa!

Dii vĩakɛnaↄ, à Dii sáaukpa!

21Wà Dii sáaukpa Siↄna,

à bɛkpà Yelusalɛũ.

Àleluya!

Notes

*135:8 Bↄa 12.29

†135:9 Bↄa 7.3

‡135:11 Nao 21.21-24, 33-35

§135:15 Soũ 115.4-8, Zia 9.20