1Chihnan kho ahin sap teng jatei ding gon, chule thil hetkhen nan lhang asap teng ngaijin. ✡ 2Lampi pam le lhangvum dung a, chihna chu ading le’in ahi. 3Khopi lutna kelkot phung dung a, kholen tinchang maija, chule kotjum lutna thei jousea lhang asam in ahi. 4“Mijouse jah-a kakou ahin, mihem chapa jouse kakou ahi. 5Milham ho nahiu vin, lunggel them hina din kihil un, mingol ho jeng in jong lunglut in ngaijun. 6Ngaitem un, keiman thil phachom tah nahil uvinge, kakam sunga kon thudih jengbou pot ding ahi. 7Ajeh chu kakam in thudih bou aseiji ding, adihlou sei kiti hi kakam in ajahda ahi. 8Kakam akon thu kisei jouse adih ahin, akikal le ache khel ding ima umlou ahi. 9Kathu hil hekhen theipa chun adih akisan ding, hetthemna neipa dinga chu adih bou ahi. 10Sumlepai sang in kathu hil kilhen un, Sana thengsel sanga jong hetna naki lhen joh diu ahi. 11Ajeh chu sana kijem pah sanga chihna hi thupi ahin, na lungdei chan toh kitekah thei ahipoi.

12Chihna hi keima kahin chingthei tah’a um kahi, hetna le thil hetkhen themna nei kahi. 13Pakai ginna chun thilse ahotbol in, hijeh chun keiman kiletsahna le hoithona, thil aphalou, ahilou louva thu kisei chan chu kathet ahi. 14Keima’a kon hin, chihna giltah le phachom tah’a kihilna aum in, asung thua hetna le thahat chu keija bou um ahi. 15Keijal’a lenghon vai-apoh ahin, keijal’a bou vaihom ten adih’a thu tanna anei ahi. 16Keijal’a alen alal ten vai ahop jiu, chule keijal’a bou alal ten vai apoh theiyu ahi. 17Keima eingailu ho kangailun, giltah’a eihol ten eimu tei jiuvin ahi. 18Keima haona le jabolna jousen eijui in, phattheina le haona chun eidalha jipoi. 19Ka thilpeh hohi sana sanga phachom ahin, sana thengsel sanga jong hoijoa, chule kanatoh jong sum le pai sanga phajo ahi. 20Keima thudihtah’a lamlha jing kahin, thutanna adih lam jeng chu kaho-ji ahi. 21Keima eingailu hon gou alo diu kasem peh in, agou kholnau jouse kasuh dimpeh-jin ahi.

22Pakaiyin atil abulla athilsem apat ei-umsah ahin, khanglui apat athilsem masapen kahitai. ✡ 23Atil-a leiset kisem masang, kum asang sang masanga pat keima tundohsa chu kahi tai. 24Kapen chun anim-atong lai jong ana um pon, twi putna jouse jong khatcha ana um poi. 25Mol le lhang kigol toh masang, chule thinglhang jouse kisemtoh masanga pat ana um kahitai. 26Pathen in leiset le tollhang asem masang, vannoija leigum kisemdoh masanga pat um kahi. 27Pathen in vanho atundoh masanga um kahin, twikhanglen kuol khum vanthamjol alhundoh masanga jong um kahitai. 28Pathen in chunglam’a vanthamjol ho atundoh ahin, leinoiya pat twi aput dohsah masanga jong um kahin, 29Twikhanglen geigol jong alet lhahna lou dinga asem toh, twipi jeng in jong athu angaina dinga asem toh, leiset khompi jouse jong atundoh masanga pat um kahi. 30Keima tah jong akom-cha’a khut them bang um kahin, nitin le phattin in akom-a kapansan kipatah in kaum jing in ahi. 31Pathen in mihemte chenna dia leiset atundoh ahin, keima jong kipah tah-in kaum in, mihemte lah’a thanopnan kadim e.

32Hijeh chun kachate ho kasei ngaijun, kathu ngaija ka lampia che jing ho kipah ding’u ahi. 33Kathuhil ho ngaijun lang ching theijun, kahilchah-nau hi tuh chah jing un. 34Ka thusei ngaija mihem chu anunnom hi ding, amachun nitin’a kakot phunga anga jing ding, ka kotpi phunga tatlouvin ading in ahi 35Ajeh chu keima eimudoh chan chun hinna akimu tan, chule Pakaija kon in hepina achang'un ahi. 36Amavang keima eidonlou chan chun, ama le aman gimna akimu jin, keima ei hot chan chun, thina jeng angai chat ahibouve.”