1Chihna kiti hin a-in akisahdoh in, khompi sagi jen atungdoh tan ahi. 2Chihna kiti hin, neh le chah ding gancha phabep akitha jin, lengpi twi jong lhumkeijin ahel-in, chule chihna kiti hin an-nehna ding dokhang jeng jong atungdoh tan ahi. 3Munsang laiya kon’in khopi sung mihoa kon chun, mikou din asohte asol in ahi. 4Koi hileh milham a umjouse, “Kakom’a hung hen,” tin akousah in ahi. Chule koi hileh alungthim bei tapou chu, kou-un, ati. 5“Hung un, kaneh ding khel in neuvin, kadon ding khel in lengpitwi don un. 6Milham in umhih'un, giltah in hetkhenna neijin hinkho mang un,” ati. 7Mi munem’a noisea, adih bolsah teiding gopan jong kisuh khahna aneilo-bep ahi. 8Hijeh chun mi munem pum-a adih bolsah teiding go-hih in, ajeh chu nahin mudalo thei ahi. Hinlah miching chu hil lechun nangailua pang jo-ding ahi. 9Miching chu nahil chan’a ching cheh cheh ding, hibang chun midih jong nahil chan’a ching cheh ding ahi. 10Pakai ginna hi chihna bulpi ahin, mithengpa hetna nei chan chun giltah’a thu ahetdoh ahi. ✡ 11Ajeh chu keima jal’a na hinkho sao chom ding, na hinkho sunga nakum jong kibe tei ding ahi. 12Na chihna chu nangma goh-keuseh ding ahin, midang noisena nanei le mona chu na changseh a nakipoh ding ahi. 13Numei ngol kiti chu akam tam in, amanu chu pannabei le jum helou ahi. 14Amanu chu a-in kot phunga atoujin, kholai jenga jong mundoh lai a bou atoujin ahi. 15Amanun mi ama kincheh a kisalel akom’a hung kijot hochu “akou jin,” 16Chule milham ho kom’a chun kakom’a hung un tin, akouvin, lungthim beija umjouse tin akoujin ahi. 17“Aguh’a kidon twi hi alhum in, aguh a kineji changlhah jong lungkim umtah ahi,” ati. 18Hinlah golhangpa chun hiche mun hi thina ahi ti, aheji pon, numeinu insunga lhung jinhon jong noimi-gam mithi kholna’a lhalut ahilam-u, akihet phahji tapouve.