Vilongozi na manabii anademurirwa
1Alafu nchiamba,
“Phundzani mwi vilongozi a Jakobo,
mwimwi atawala a nyumba ya Iziraeli.
Dze, simwi mlondwao kumanya haki?
2Mwimwi muriozira manono na kumendza mai,
mwimwi munaoyula ngozi atu angu
na kuusa nyama mwao mifuphani.
3Mwimwi mryao nyama za atu angu,
na kuyula ngozi zao.
Na kuvundza mifupha yao vipande-vipande
na kuakata dza nyama ndizojitwa,
dza nyama ndizotiywa nyunguni.”
4Siku zedzazo andamririra Mwenyezi Mlungu,
ela ye kandaajibu.
Wakati hinyo andaafwitsa usowe
kpwa sababu ya mahendo gao mai.
5Hivi ndivyo Mwenyezi Mlungu aambavyo,
“Kuhusu manabii anaalongoza atu angu chimakosa,
mutu achiapha chakurya, anatangaza, ‘Amani’
ela mutu asiphoapha anadzipanga kupigana nao.
6Kpwa hivyo mundakala na usiku usio na ruwiya
mwedzerwe na jiza msiweze kutabiri.
Dzuwa rindakutswererani nyo manabii
na mutsi undakala jiza kpwao.
7Aonadzi andagbwirwa ni haya,
na apigi a mburuga agbwirwe ni haya,
osi andafunga kanwa zao
mana taphana jibu kula kpwa Mwenyezi Mlungu.”
8Ela mino nkaodzazwa nguvu,
nkaodzazwa Roho wa Mwenyezi Mlungu,
nkaodzala haki na uwezo,
ili nimtangazire Jakobo makosage,
na Iziraeli dambiye.
9Phundzani higa mwino vilongozi a nyumba ya Jakobo
mwimwi atawala a nyumba ya Iziraeli
mwimwi munaomena haki
na kugaluza chochosi cha haki,
10mdzengao mudzi wa Sayuni kpwa kumwaga milatso
na Jerusalemu kpwa kuhenda mai.
11Vilongozie anaamula kpwa kuphokera hongo,
alavyadzi-sadaka anafundza kpwa maripho,
manabiie anatabiri kpwa kuphokera pesa.
Chisha achere mtegemea Mwenyezi Mlungu kpwa kuamba,
“Si Mwenyezi Mlungu a phamwenga naswi,
taphana mashaka ndigohuphaha.
12 Sambi phahi, kpwa sababu yenu,
mudzi wa Sayuni undarimwa dza munda
Jerusalemu indakala gandzo,
na chidzango cha nyumba ya kuvoya Mlungu chindakala tsaka.”