Voyo ra kuluphiro
Wira wa Daudi.
1Nirinda, ee Mlungu,
mana ninachimbirira kpwako.
2Ninamuamba Mwenyezi Mlungu, “Uwe ndiwe Mlungu wangu,
vitu vyosi vinono nrivyo navyo vila kpwako uwe.”
3Atakatifu ario kpwenye tsi ndio akulu
nami nahamirwa kukala phamwenga nao.
4Anaoadamira milungu yanjina
anadzienjerezera tabu,
mino sindamwaga sadaka za milatso za milungu yanjina,
wala kuhadza madzina gao.
5Mwenyezi Mlungu, uwe ndiye seemu yangu, na ndiwe unijaliyaye,
mtalo wangu u salama mwako mikononi.
6Tsi uriyoniphakira ni nono,
kpwa kpweli nina urisi mnono.
7Namtogola Mwenyezi Mlungu kpwa sababu ananilongoza,
na usiku zamiri yangu inanionya.
8Ninamanya kukala Mwenyezi Mlungu a phamwenga nami wakati wosi,
kpwa kukala a phephi nami takuna chochosi ndichonihenda nikakame.
9Kpwa hivyo moyo wangu ukahererwa, nami nina raha.
Nami nadzisikira kukala ni salama.
10 Kundaniricha kahi ya ariofwa,
wala kuricha mtumishio muaminifu aole mbirani.
11 Unanionyesa njira iphiyayo uzimani.
Nami nahamirwa kukala phephi nawe
na uphande wa mkpwonoo wa kulume kuna manono siku zosi.