Maazo kuhusu maisha
1 Baha nguma nono kuriko marashi ga gali.
Baha siku ya kufwa kuriko siku ya kuvyalwa.
2Baha kuinjira nyumba ya hanga
kuriko kuinjira nyumba ya sharee.
Mana hinyo ndio mwisho wa chila mwanadamu
na osi ario moyo ni amanye.
3Baha sonono kuriko chitseko,
mana sonono nkumuhenda mutu akale na ikima.
4Mwenye ikima nkuririkana kuhusu chifo
ela mzuzu nkuaza raha.
5Baha kudemurirwa ni mwenye ikima
kuriko kuphundza wira wa azuzu.
6Mana kpwakpwa za azuzu
ni dza miya idodorekayo mohoni na tayiivwisa chitu.
7Kpwa kpweli kuonerwa nkumuhenda mwenye ikima mzuzu,
na kuhongbwa nkubananga moyo.
8Baha mwisho wa utu kuriko mwandzowe,
na baha moyo wa kuvumirira kuriko wa kudzikarya.
9 Usitsukirwe upesi,
mana tsukizi zikala moyoni mwa azuzu.
10Usiuze, “Kpwa utu wani mambo kala ni manono pho kare kuriko siku zizi?”
Mana riro ni swali ra chanache.
11Ikima ni nono kuriko urisi,
nayo ina manufwaha kpwa nyo ario moyo.
12Kpwa mana urindzi wa ikima ni dza urindzi wa pesa,
na fwaida ya marifwa ni hino:
kukala ikima nkumfwaidi iye ariye nayo.
13Ririkana vinono kuhusu kazi ya Mlungu.
Mana ni ani awezaye kugolosa utu ambao iye akauhenda umyoke?
14Kala na raha siku za kuongokerwa, na siku za mai tambukira kukala Mlungu wahenda hiri na ro ranjina piya, ili mwanadamu asiweze kutabiri ndigokpwedza badaye.
15Kahi ya maisha gangu gasigodumu, náona mambo higa: náona mutu wa haki anafwa mapema dzagbwe ana haki, na mutu mui anaishi maisha mare dzagbwe ni mui. 16Phahi, usikale wa haki kutsupa chiasi, au kukala wa ikima kutsupa chiasi. Kpwa utu wani unalonda kudziangamiza mwenye? 17Usikale mui kutsupa chiasi, na usikale mzuzu. Kpwa utu wani ufwe kabila ya wakatio? 18Phahi gbwira ro lagizo ra kpwandza na ro ra phiri piya. Mana amuogophaye Mlungu andakala na chiasi.
19Mwenye ikima ana nguvu kuriko atawala kumi ario mudzini.
20Kpwa kpweli takuna mutu phapha duniani mwenye haki ambaye nkuhenda manono siku zosi, bila kuhenda dambi.
21Usiphundze chila chitu ambacho atu anagomba sedze ukasikira mtumishio anakulani. 22Kpwa mana uwe mwenye unamanya urivyogomba mai kano nyinji kuhusu atu anjina.
23Wakati wosi nájeza niwezavyo kuhenda ikima ilongoze kufikiriya kpwangu na mahendo gangu. Nchiamba, “Naaza kukala na ikima.” Ela taiyawezekana. 24Ikima i kure na ni vigumu kuiphaha. 25Kpwa hivyo náamua kuchunguza, kuelewa, kuendza ikima na kumanya mana ya mambo gahendekago. Kala nalonda nimanye napho uyi ni upumbavu na uzuzu ni koma. 26Chitu chimwenga ambacho námanya chiutsungu zaidi ya chifo ni hichi: ni mchetu ambaye ni dza muhego, ambaye moyowe ni dza chimia na mikonoye ni dza silisili. Mutu ammendzaye Mlungu andadzitivya na mchetu iye, ela mwenye dambi andagbwirwa. 27Mimi muhubiri nakuambira, higa ndigo nrigomanya niriphohenda uchunguzi wangu. 28Náenderera kuendza mambo gago, ela siphahire chitu. Kahi ya alume elufu mwenga náphaha mmwenga tu ariye wa haki, ela kahi ya achetu osi, sionere hata mmwenga ariye wa haki. 29Lola, hiri ndiro nriromanya kukala Mlungu wamuumba mwanadamu akale wa haki, ela nyo enye nkuhenda gara alondago.