1Ki machita paba itolas namen dyinyo a kakakteh a maynamot do chimpo mana an kangonchiw kaparin dan nyaya. 2Ta masigorādo a chapatak nyo na a nawri a araw a kangay ni Āpo Jesos, ki maychihat anchi a akmas kangayaw no manakanakaw an mahep. 3Anchan ibahey no tawo a matalna danaw byay da kan araba danaw pakariribokan da, ki nawri dananchiw no maychihat a kangay dyira no makarārayawaw. Makapachiditdit sa pabanchi a akmas dyaw a kapenpenan so kaynyin no magpasikalaw a maymanganak. 4Ki inyo a kakakteh, myan kamo paba do sari, as kan masdaāwan kamo pabanchi do kawaraw no nawri a araw akmas kasdāaw nyowaw an myan manakanakaw. 5Ta inyo a tabo, ki pinaysēdang ni Āpo Dyos aktokto nyo, as kan pinayparin naynyo a tawotawo do sēdang kan tawotawo do māraw. Myan kamo pabad ahep mana sari akma siras dyaya manganohed di Jesos. 6Dawa, sichangori, pakaychehen nyo abaw kapanganohed nyo a akmas pariparinen daw no kadwan a dya manganohed, basbāli a machita makaridam kamo kan nāw nyo a igpet inawan nyo. 7On, syirto a makaycheh saw tawotawo an masari dana. Siraw maboboken, ki maybobok sa an mahep, ta nawriw ōras no kapaychaynoynom da. 8Ki maynamot ta omyan ta na do sēdang, masisīta a nāw ta mangigpet so inawan ta. Machita nawriw sarāpa ta do barōkong ta iyaw kapanganohed ta kan adaw ta, kan machita dya madyiwadyiway namnāma ta maynamot do kaisalakānan ta. Ta an komwan, myan akmay pinakatabahos ta a mangay-aywan so aktokto ta.* 9On, ta pinidi aba yaten no Dyos a mangdidiw so soli na, an dya isalākan na yaten a maynamot di Āpo ta a si Jeso-Kristo. 10On, nadiman si Jesos a maynamot dyaten tan machichasa tanchi dya aran sibibyay ta mana nadiman tanchi anchan mangay. 11Dawa, nyaw panghapan na a maysin-aahwahok kamo pakono kan maysinsisidong kamo pakono akmas dān nyowaw a pariparinen.

12Changori, kakakteh, akdawen namen dyinyo a bigbigen nyo saw maytaytarabākwaw a mangay-aywan kan manginanawo dyinyo a maynamot do kawnot nyo di Āpo. 13Itoroh nyo dyiraw rakoh a pammadāyaw kan kadaw nyo maynamot do tarabāko da. Mabyay kamo pakono a nāw nyo a machikapya do katakatayisa dyinyo.

14Kakakteh, ikakaāsi namen dyinyo a ballaāgan nyo saw masasadotaw, kan patoreden nyo saw mamwamohenaw, as kan sidongan nyo saw makapkapsotaw so kapanganohed. Ipaboya nyo ānos nyo do tabo a tawotawo. 15Bahsen nyo sabaw namarinaw dyinyos marahet, basbāli a nāw nyo a mamarin so maganay dyirad rārayay nyo saw kan do aran sino a tawo. 16Pirmi kamo pakono a masoyot. 17Aryan nyo abaw maydasal, 18as magyāman kamo do aran āngo a kayayan nyo, ta nawriw chakey no Dyos dyinyo a manganohed dana di Kristo Jesos.

19Penpenpenen nyo abaw Masantwan a Ispirito an myan chakey na ibahey dyinyo. 20Oyawen nyo abaw minsāhi a ipakatoneng da dyinyo no mangnanawo saya dyinyo maynamot do panakabalin Ispirito Santo. 21Ki sintiren nyo sa tabo ibahebahey daya dyinyo tan matonngan nyo an oyod a yapo do Dyos. Sigorādohen nyo a onotan an āngo iyaw maganayaw. 22Ditditen nyo saw aran āngo a kītan marahet.

23Si Āpo Dyos pakono a manoroh so kapachikapya iyaw mangpasingpet kan mangpasanto dyinyo. Iya pakono mangaywan so inawan nyo, aktokto nyo, kan iyaw ispirito nyo tan aba polos pakapilāwan nyo do kangay anchi ni Jeso-Kristo a Āpo ta. 24Sigorādohen namen nyaya, ta chapatak namen a mapagtalkan nanawagaw dyinyo, as kan parinen na sanchi a tabo nya.

25Kakakteh, akdawen namen a paydasal nyo yamen.

26Asa pa, pachiabrasa nyo yamen do tabo saw a kakakteh ta daw, as pakomostaan nyo sa.

27A maynamot ta myan toray ko a yapo do Āpo, ibilin ko dyinyo a ibāsa nyo nyaya tolas dyirad tabo saw a manganohed.

28Myan pakono dyinyo parābor a yapo di Āpo ta a Jeso-Kristo. Amen.