No Kaidasadasal Nyo Dyamen
1Changori, kakakteh, akdawen namen a paydaydasal nyo pakono yamen tan malisto a magwaras do tabo a loglogar iyaw chirinayan Āpo Dyos, as kan siraw tawotawo a makadngey sya, ki rawaten da a dadayen a akmas kadāday nyowaya sya. 2Asa pa, paydasal nyo pa yamen tan isalākan na yamen Āpo Dyos dyirad madyidwaw kan marahet saw a tawotawo. Ta tabo aba tawo, ki myan anohed da.
3Ki si Āpo, ki mapagtalkan, ta payiten naw kapanganohed nyo kan aywanan naynyo a yapo do kararahtanaw a si Satanas. 4On, maynamot do kapachichasa nyowaw dya, ki rakoh iyaw kapagnamnāma namen a nāw nyo a tongtongen a parinen tabo saw a innanawo namen dyinyo.
5Si Āpo Dyos pakono mangirarahan dyinyo so mararahem pa a kapakaāwat nyo kan katahataha nyo so adaw na kan iyaw kapangibtoraw ni Jeso-Kristo.
No Minsāhi Dyirad Masasadot
6Changori, kakakteh, maynamot do toray a intoroh ni Āpo Jeso-Kristo dyamen, bilinen namen inyo a pachibawan nyo saw kakakteh do kapanganohed a masasadot kan dya magtongpal do nanawowaw a rinawat nyo dyamen. 7On, ta oyod a chapatak nyo a sīgod a machita a tahatahan nyo saw pinarin namen. Ta do kayan namenaw dyinyo, ki naysadosadot kami aba. 8Mana komninan kami aba so kanen a matarek, an dyi namen a binayādan. On, ta inpasnek namen tarabāko namen do māraw kan mahep tan dyi kami a nayparin a pakarahmetan no aran sino dyinyo. 9Pinarin namen komwan, ta aran myan kalintegan namen a mangdaw so sidong nyo, ki alit na naytaytarabāko kami tan myan pagtolādan nyo. 10Ta aran do kayan namen paw dyinyo, ki binilin namen dana inyo a, “No aran sino a dya maytarabāko, ki koman aba.”
11Itolas namen dyinyo nyaya, ta myan nadāmag namen a myan saw masasadot dyinyo kan maskeh a maytarabāko. Abaw maganay a chabalay da, an dya machibibyang do byang no matarek. 12Changori, maynamot do toray a intoroh ni Āpo Jeso-Kristo dyamen, ki ibilin namen kan ballaāgan namen saw nawri a tawotawo a machita a maypasingpet sa a maytarabāko tan myan panghapan das bōkod da a chabyay.
13Ki inyo a kakakteh, machita dyi kamo pakono a maōma mamarin so maganay ah. 14As an myan dya magtongpal do inanawo namenaya do dya tolas, ki pachibawan nyo kan ikaskāso nyo paba tan masnekan. 15Ki aran komwan, ibidang nyo aba a asa kabōsor, basbāli a bagbagaan nyo a akmas mamagbagaw so mismo na kakteh.
No Kapanawdyan a Bindisyon
16Sichangori, si Āpo pakono a pakayapwan kapaychapya iyaw pirmi a manoroh dyinyo so kaydamnayan no kapangtokto do tabo a kayayan nyo. Si Āpo pakono iyaw nāw na myan dyinyo a tabo.
17Yaken si Pablo a mismo a naytolas so kapanawdyanaya a pakomosta. Mailasin nyo a oyod a yapo dyaken nyaya a tolas a maynamot ta komwan iyaw kītan kapaytolas ko do kāda tolas ko.
18Myan pakono dyinyo a tabo parābor a yapo di Āpo ta a si Jeso-Kristo.