1Do chatatdo naw a katawen a nakapagāri ni āri Syros do Persya,* naipakatoneng paltiing di Daniel a pinangaranan da so Beltesassar. No minsāhi na, ki oyod, kan maynamot do rakoh a gobat. No nakapakaāwat na so nyaya minsāhi, ki naipakatoneng dya do parmata no chakey na a batahen.

2Do dāwri, yaken a si Daniel, ki nagdongdong-aw ako so tatdo a kalawas. 3Komninan akwaba so aran āngo a naitatārek a makan. Nangisobo ako aba so karni mana palek, as kan nangosar ako aba so bangbanglo do inawan ko do irahem no tatdo a kalawas.

4Do chadadwa naw a poho kan apat a karaw do manma a bohan do tawen, myan ako a naytēnek do payisaw no rakoh a oksong a Tigris. 5Tomnangay ako, ki naboya ko asaw a mahakay a nakalaylay so mapino a tela, kan nakabarīkis so pōro a balitok a yapo do asa yanan a mayngaran so Ophas. 6Masileng iyaw inawan na akmas mangīnaw a bato a mayngaran so berilo. Maranyag iyaw rōpa na akmas kimataw, kan siraw mata na, ki akmay gomilgilāyab a apoy. Tachay kan kokod na sa, ki akmay napasileng a tombāga, kan no bosis na, ki akmay ariwāwa no tawotawo.

7Yaken lang a si Daniel nakaboya so parmataw. Siraw myanaw dyaken, naboya daba, ki naychihat a nadidiw daw taywara a kāmo, kan nayyayo sa a tomnayo. 8Dawa, natokos ako a naychatanyi a magboybōya so nyaya makaskasdāaw a parmata. Nabo danaw kayit ko, kan taywara dana a somnohaw rōpa ko a araba polos maparin ko. 9Sinpangan na, nadngey ko nakapaychirin na, as do kapangadngey ko dya, naynepdep ako a naysasakeb do tana.

10Do nakatayoka no nawri, myan kakamay a napaycharang dyaken. Pinagbakabāka na yaken a maychamirpirpir ako pa. 11Binata dyaken no tawowaw do parmata a kāna, “Daniel, chadaw naymo no Dyos. Adngeyen mo a maganay ibahey kwaya. Maytēnek ka, ta natoboy ako a mangay dyimo sichangori.” Do nakaibahey na dyaken so nya, naytēnek ako a maychamirpirpir pa.

12Somarono, binata na dyaken a kāna, “Mamo kabam Daniel. Nangrogi pa do manōmaw a araw disidido ka na a nangidasal so kapakaāwat, as kan inpakombaba mo inawan mo do salapen no Dyos mo, nadngey imo no Dyos. Changori, nangay ako a maynamot do dasal mo. 13Ki iyaw prinsipi no pagāryan no Persya, ki binalat na yaken so dadwa poho kan asa karaw. Sinpangan na, yangay yaken a sinidongan ni Migel† a asa a pangōlo dan anghilis maynamot ta binabalay na yaken no prinsipi do pagāryan no Persya. 14Sichangori, nangay ako a mangilawlawag dyimo so maparin anchi dyirad tawotawo mo saya do masakbayan. Ta iyaw parmataya, ki maynamot do chimpo a mangay panchi.”

15Do kadama naw a mangibahey dyaken so nya, ki naysasakeb ako do tana, kan nableg ako. 16Sinpangan na, sinalid no akmaw tawo bibi ko, kan iniwangan ko dangoy ko kan naychirin ako. Binata ko do maytēnekaw do salapen ko a kon ko, “O āpo ko, maynamot do dyaya a parmata a naboya ko, taywara kabakel ko kan arabaw kayit ko. 17Maypāngo a yaken a pachirawatan mom āpo, iyaw machisarīta dyimo? Nabo danaw kayit ko, kan malidyatan ako a omanges.”

18Ki inigpet narana yaken no akmaw tawo, kan natorohan ako so kayit. 19Binata na dyaken a kāna, “Mamo kaba, imo a tayawara a chadaw no Dyos. Myan pakono kaydamnayan no kapangtokto mo! Tomored ka, kan maypayit ka.”

Do nakapaychirin naw dyaken, naypayit ako kan binata ko a kon ko, “Maychirin ka pa mo āpo ko, ta tinorohan mo na yaken so kayit.”

20Binata na dyaken a kāna, “Chapatak mori an āngo ta nangay ako dyimo? Machita ko manma a maybidi a machilāban do prinsipi no Persya. As sinpangan na, mangay anchi iyaw prinsipi no Gresya. 21Ki sakbay a komaro ako, ibahey ko dyimo iyaw naitolas do Libro no Kaoyodan. (Abaw somidong dyaken a mangkontra siras nya saya prinsipi malaksid si Migel a prinsipi nyo a Israel.”