No Jerosalem do Nakatayoka no Nakarārayaw Na
1Ay, āngwa nakabo no balitok so kasileng na!
Iyaw pōrwaw a balitok, ki naypaposasaw dana!
Siraw masantwanaw a bato, ki naychawpit dana sa
do kāda kanto dan kalkalsāda.
2Siraw mapategaw a mahahakay no Sion
a magbalor so pōro a balitok do nakarahan,
ki sichangori naibidang dana sa a angang
a pinarin dan kakamay no magdamdamili.
3Aran siraw bolaw saw a chito,
ki pasosohen da saw anak da.
Ki siraw tawotawo kwaw, nayparin sa a maranggas
a akma saw manomanok a ostrich do let-ang.
4No rida no tagībi, ki machidket
do kamanghahanyit na do kawaw na.
As machikakaāsi saw adedekey so kanen da,
ki abaw manoroh dyira.
5Siraw nagpaspasken a mababaknang,
ki maypiypisipis dana sa so kapteng do kalkalsada.
Siraw naylaylay so mapīno kan mangīna a laylay,
ki maychahel dana sa so maisobo da do basōra.
6Iyaw kadōsa dan tawotawo ko,
ki mangamangay pa kan kadōsa no tawotawo do Sodoma
a narārayaw do apagripat
a dya polos a pinarin tanoro no tawo.
7Siraw prinsipi no Jerosalem,
ki abos pakapilāwan a maporporo kan yilo,
as kan maydaydak kan gatas.
No inawan da, ki mabayabaya kan mabaya a lawang.
Mataer sa akmas kapintas no sappiro a mangīna a bato.
8Ki sichangori, mabahebaheng rōpa daw kan īro.
Mailāsin sa paba do kalkalsāda.
Kominbet danaw kodit da a nachidket do tohang da
a nayangyangan a akmay irotong.
9Maganaganay dana saw nadimanaw do ispāda
kan siraw madimanaw do kapteng
a komkomyoos so bodek a maronronot
do kabo danan maisobo a yapo do hakawan.
10Do bōkod a tanoro dan māsisyen a mababakes,
ki napīlit sa a nanglaneg siras mismo a anak da
a pinayparin da sa kanen da
do nakarārayaw dan tawotawo ko.
11Pinabtak dana ni ĀPO tābo kasoli na.
On, pinado naw kataywara no kasoli na.
Napasdeb so apoy do Sion
a namatawos siras pondasyon na.
12Siraw ar-āri do tanaya mana aran sino do lōbongaya
ki anohdan daba a myan makasdep
a aran sino a kakontra mana kabōsor
do rowangan na saw no Jerosalem.
13Ki naparin do gatogatos dan propīta na sa
kan do gatogatos dan papādi na.
Ta do irahem dan ahad saw no syodad,
napawyog sa so raya dan malilinteg.
14Changori midibidi dana sa do kalkalsāda
a akma say nabolsekan.
Do kataywara da a namanchaan so raya dan nadiman,
abaw makaitored a mangsalid so laylay da.
15Inyagay dan tawotawo dyira a kon da,
“Komaro kamo! Malapos kamo!
Maypateng kamo! Saliden nyo aba yamen!”
Dawa, nayyayo sa kan nayadiyadis do nasnasyon,
ki abaw pinalobōsan da a nachiyan dyira.
16Si ĀPO a mismo napaychawpit sira.
Bibyangan na sa paba.
Apabaw dāyaw a naitoroh dyirad papādi,
kan apabaw anyib a mangay dyirad panglakayen.
17Mabkohan danaw mata namen a
a manyidechideb so sidong a dya mawara.
Yapo do paytatalamadan namenaw, boyaen namen
kawara no nasyonaw a dya makaisalākan dyamen.
18Sipsipotan dan kabōsor siraw garaw namen
tan dyi kami a makayam do kalkalsāda.
Masngen danaw tawsan namen.
Nabidang danaw araw namen. Īto danaw pandan!
19Siraw manglakat dyamen,
ki malyalisto sa pa kan siraw agila do hanyit.
Linakatan da yamen do katokotokonan,
kan pinanaya da yamen a talahen do let-ang.
20Iyaw pinidi ni ĀPO a pakayapwan anges namen,
ki natolo dyirad asdok da.
Iniktokto namen a an myan kami do anyino na,
ki machipagyan kami dyirad nasnasyon.
21Sigi, masoyot kan magragsak ka sichangori,
imom Balāsang no Edom a omyan do tana a Os.
Ki mangay panchi dyimo kopaw no kaokom.
Mabok kanchi, kan mabahasan a silalābos.
22Komabos anchiw kadōsa mom Balāsang no Sion.
Paybabalay nabanchi ni ĀPO kaakaw mo a sibabahod.
Ki dosāen nanchi imo do gatogatos mom Balāsang no Edom,
kan ipakatoneng nanchiw karahet mo.