Hay Numbaholan nan iJerusalem
1Ya inalin Apo Dios ay ha"in di,
“Umuyyu le'don an amin ad Jerusalem
ta hamadonyuh un wada mah ni' di ohah nan tataguh dih maphod di pangatna an Ha"in di unudona.
Ta wada ay di ta"on un oha ya mabalin an aliwa' nan bahol nan tatagu ta adi' patayon dida!
2Manu ti wadaday mangalih un Ha"in an Dios di dayawonda,
mu layahda.”
3At inali' ay Apo Dios di,
“Inila' an hay anapom ya nan immannung an mangun'unud ay He"a!
Ya minoltam nan tatagum an ahilalayah,
mu hihidya damdaman adida idinong nan ato'atondan pumbaholan!
An un at goh niyal'allay ngohoyda
an adida pohdon an pumhod ta wan He"ay unudonda!
4At hay ninomnom'u ya alyo' di manu ay nin umatdah na ti ayda manangpah an tatagu,
ya dumalat nan anawotwotda ya agguyda inila nan Uldin Apo Dios ya nan pohdonah atonda.
5At umuya' ta nan a'ap'apuy umuy'u pi'hapitan ti inilada nan pohdon Apo Dios.
Mu ta"on un dida ya indinongdan adida unudon Hiya!
6At hiyah ne na'at an din'ugdan amin hi Apo Dios an inyal'allanah nan nun'appuhiy ato'atonda.
At hiyanan do'ol di buhul an umuy an mamatoy ay dida
an umatdah nan atata'ot an layon an wah inalahan,
unu umatda goh hinan atap an ahuh nan mapulun an ma'alih wolf,
ya umatda goh hinan lepard an lumane'le'od hinan babluy ta malgom hinan tagun ah'upanda,
ya pinatoyda,
ya numpuhitda.”
7At inalin Apo Dios di,
“Anaad ta aliwa' di baholyun iJudah?
Ya wan din'uga' ay da'yu ta nan bulul di dinayawyu,
ya ta"on hi un'u indat an amin di mahapulyu
mu hay inatyu ya paddungnay inlugtapana' ta immuy ayuh nan abung di binabain puta.
8Mi'id di nun'abhiwanyuh nan buta'al an kabayu
an paddungnay hay ahawan nan heneggonyuy gunyu a'ammangon.
9At hiyanan moltao' da'yun iJudah hinan umat hinan pangatyu.”
Hiyah ne hinapit Apo Dios.
10Ya inalin goh Apo Dios di,
“At honogo' nan buhulyu ta umalidan mumpama"ih nan intanomyun greyp ta ammunay un ohah ang'angonda,
ya nunlongohda nan hapang an nipaddungan nan tatagun agguy niddum ay Ha"in.
11Ti nan i'Israel ya iJudah ya din'uga' an Dios.”
Hiyah ne hinapit Apo Dios.
12Ya inali' an hi Jeremiah di,
“Nan tatagu ya layah di imbagadan inaliday,
Adi ditu'u moltaon ay Apo Dios,
at mi'id di ma'at ay ditu'uh nappuhin umat hi gubat ya batel!
13Ti nan propetan Apo Dios ya ma'aladyahda an bo'on nan hinapit Apo Dios di ipa'innilada,
at an amin di nappuhin impa'inniladah ma'at ya olom ya ma'at goh ay dida!”
14At inalin Apo Dios ay ha"in di,
“Dumalat nan umat hina an hinapit nan tatagu
ya pumbalino' nan ibaga' an hapitom ay didah ay apuy,
ya nan tatagu di mipaddung hi mitungu an gohbon nan apuy.
15Ti ninonomnom'un la'tot ya ipa'ali' di mangubat ay da'yun malpuh nan adagwin babluy,
ya danen himpamabluy ya nabayag di awadanda, ya mun'abi'ahda,
ya mi'id di ma'awatanyuh hapitda.
16Ya nidugah di abalinandan mi'gubat ti pumatoy di panada,
17ya hay umalianda ya diday mangan hinan inlia'yu,
ya nan bungan di intanomyun bungbungaan
ya ta"on nan bakayu, ya nan kalniluyu.
Ya hanan ma'ugtul di allupnan babluyyun pundedenlanyuh mangibaliw ay da'yu ya pumpa"ida,
ya numpatoyda nan imbabaluyyu.
18Mu ta"on hi un umat hinay ma'at ya wadaday ma'angang ay da'yu ta adi ayu mami'id an amin. 19At nan adi mi'yatoy an tatagu ya hanhanandan alyonday, Anaad ahan ta inyabulut Apo Dios an na'at ay ditu'uy umat hitun nunhegla? Ya hay pambalmu, Jeremiah, ya alyom ay diday, Umat hinay na'at ti din'ugyuh Apo Dios ta nan dayawon di udum an babluy di dinayawyuh tun babluy tu'u. At ad ugwan ya mumbalin ayuh baal di tataguh udum an babluy.”
Hay Padan Apo Dios hinan Tataguna
20Ya inalin Apo Dios ay ha"in di,
“At ibagam hatuh nan holag Jacob an nunhitud Judah
21an alyom di,
Da'yu ya nipaddung ayuh mi'id di nomnomna
an waday matada, mu adi mittig,
ya ingada, mu adi medngol.
22Un gulat at ya Ha"in an Dios di dayawonyu ya ta'tanyuh unudonyu.
Ti undan agguyyu inila an Ha"in di nunlumuh nan panag hinan pingit di baybay
ta way mananih nan danum an malpuh nan baybay?
At ta"on hi un wa'adyaan bumahel nan dalluyun hinan panag ya ibangngadna damdamah nan baybay.
23Mu nidugah di ngohoyyu
ti din'uga' ay da'yu,
24ya mid at goh di alyonyuan,
Dayawon tu'uh Apo Dios ti Hiyay nangipa'alih udan hinan ahapulana
ta mabalin an do'ol di ma'ala tu'uh bungan di intanom tu'u!
25Mu dumalat nan gunyu pumbaholan
ya adi' da'yu wagahan.
26Ti hay udum ay da'yu ya nappuhiy ato'atonda
an umatdah nan munlengon hi hamuti an umuy bumotabota'.
Mu dida ya nan i'ibbayun tataguy lengnonda ta ayda na'nan hamuti.
27Ya umat hinan hape'eng an napnuh na'nan hamutiy aat di nunhituwandan napnuh inakawda ya penlohda.
At hiyanan immadangyanda an nidugah di abalinanda,
28ya mun'atatabadan nun'aputtuda.
Mu gunda iyal'allan mangat hi nappuhi
ti adida bumadang hinan nun'awotwot ya nan nun'anguhu.
29At hiyanan Ha"in an Dios di mummoltan dida
an dumalat enen ato'atonda ta wan iballoh'un dida.
30Ti do'ol nan ma'ma'at eten babluy an nidugah an umipahiga ahan
31ti layah nan ipa'innilan nan numbino'ob'on an propeta,
ya bo'on Ha"in di unudon nan papadi,
ya wan popohdonyu nan ato'atonda.
Mu hitun umangunuh ya hay pambalyu mahkay?”