Nan Makulug ya Nibahhaw an Pundayaw
(Jer. 51:15-19)
1Ya ha"in an hi Jeremiah ya himmapita' goh an inali' di,
“Da'yun holag Israel ya donglonyu nan alyon Apo Dios
2ti inalinay,
Adiyu iyunnud hinan aton nan tataguh udum an babluy an nan aat di mattigdad dayay
pangitigandah un ngadan di ma'at ay didah udum di algaw.
At adi ayu tuma'ot hinan ulgudondan ma'at
an ta"on hi un hiyay ta'tan nan tataguh udum an babluy.
3Ti hanan umat hinay pangatda ya mi'id di hulbina
ti hay atonda ya li'ayonda nan ayiw hi inalahan,
ya pina'tandah bulul.
4Ya inamyudandah silver ya balitu',
ya inhamaddan pun'ilanha ta adi magah.
5Ya henen bulul ya umat hinan kinnahuh payaw an adi humapit,
ya gahin hi un mipi'ug ti adi dumalan.
At adiyu ta'tan dida ti mi'id di ologdan mangat hi nappuhin da'yu
unu mi'id goh ah ibadangdan da'yu.”
6Ya nunluwalua' an inali' di,
“Mu He"a, Apo Dios, ya mi'id di nipaddungam ti nidugah di anabagtum,
ya nidugah di abalinam!
7He"ay alih nan numbino'ob'on an himpamabluy hitun luta,
at mi'id di ohah nala'la'eng mu He"a an ta"on hi un nan papadi!
At He"ay way biyangnan dayawon di tataguh tun luta.
8Ti an amin nan mundayaw hinan bulul ya mi'id di nomnomda an nun'awe'we'da
9ti na'innilan nan umat hi bulul ya un hay taguy nangiyamma an unda pina'otan nan ayiw.
At amyudandah silver an na'alad Tarshish ya balitu' an na'alad Uphaz.
Ya linubungandah nan umat hi lubung di ali an inabol di nala'eng an mun'abol.
10Mu He"a, Apo Dios, di immannung an Dios an munnononnong di aatna ya alpuwan di itaguan,
ya He"a goh di alih enggana.
Ya wa ay ta bumungot'a ya umalyog tun luta ta mun'apa"iday abablubabluy.
11Ya inalim goh di ibaga' hinan Hentil an bo'on nan bulul di nunlumud abuniyan ya tun luta. At la'tot ya mun'apa"idan amin ta ma'ubahdah tun luta.
12Ya innayun'u goh an inaliy,
Mu hi Apo Dios ya limmuna tun luta ya ad daya
an dumalat di abalinana ya ananomnomana,
13ya wa ay ta impa'idulna ya mungkakaludukud ad daya.
Ya Hiya goh di mangipatuluh bunut,
ya awni ya impa'alinay ilat, ya udan, ya puo' an malpuh nan nangiyamungana.
14At hiyatuy mangipattig an hay tagu ya mi'id di inilada
an adida umat hi anala'eng Apo Dios.
At nan mun'ammah nabalitu'an an bulul ya mabainanda
ti hanan gunda iyamma ya mi'id di yahyah ya abalinanda.
15Ya mid ahan di hulbida ti unda bulul ya anggay.
Ti unda hay ma'ab'abatlan hinan adatngan di amoltaanda ti ma'ubahda.
16Mu hi Apo Dios an Dios tu'un holag Israel ya adi umat hina
ti Hiyay nunlumun amin an ta"on un nan pento'nah tataguna.
Ya hay ngadana ya Nidugah di Abalinanan Dios.”
Nan Magadyuh an Apa"ian ad Judah
17Ya ha"in an hi Jeremiah ya inali' goh di,
“Da'yun iJudah ya amungonyu nan ita'inyun lumayaw
ti lini'ub da'yu damdamah buhul.
18Ti inalin tuwalin Apo Dios an unyu palpaliwan ya nonong ya pinakak da'yu ta miyuy ayuh udum an babluy,
ya impa'alinay nidugah an punligligatanyu ta way atonyun mangdam hi bungotna.”
19Ya alyon nan iJerusalem di,
“Mahmo' amih tun nidugah an moltami
an umat hinan himmalom ahan an hugatmin pumatoy.
Mu mahapul an edpolmi
20an ta"on hi un nun'apa"iy abungmi.
Ya nun'a'atoyday imbabaluymi,
at mi'id di bumadang ay da'min mangiyammah abungmi.”
21Ya inali' ay diday,
“Ten mi'id di nomnom nan mangipangpangulun da'yu
an adida unudon di ibagan Apo Dios.
At hiyanan way ohan da'yu an ay kalnilun ipapto'da ya ninganuy ta miwa'at ayu.
22Ya den dimmatongdah appit hi iggid hi un hagangon di buhu'an di algaw nan mi'buhul,
at paddungnay immalyog tun luta.
Ya adi madnoy ya umannung an mun'apa"iy abablubabluy hitud Judah,
at la'tot ya ammunay jakal di gun umalih tu.”
Hay Luwalun Jeremiah
23Ya nunluwalua' goh an inali' di,
“Inila', Apo Dios, an hay tagu ya bo'on hiyay nangdon hi nitaguana,
ya bo'on goh hiyay okod hinan ma'at ay hiyah binigat.
24At tugunon ni' da'mi, Apo Dios,
mu adim ni' ahan ipatnay bungotmun da'mi
ti atom ay ya umannung an matoy ami an amin.
25Nan buhulmiy pangipatnaam hi bungotmu
ti dida ya adi da'a ibilang an Dios,
ya bo'on He"ay dayawonda.
Ya ten numpatoyda nan i'ibbami,
ya nidugah di nama"iandah tun babluymi.”