Hay Tulag Apo Dios hinan Tataguna
1Palpaliwan goh ya inalin Apo Dios ay ha"in an hi Jeremiah di, 2“Ha"in an Dios an dayawonyun holag Israel ya ipa'innila' ay he"a ta itudo'mun amin nan gun'u ipa'innilan he"a ta ma'ohhah liblu. 3Nomnomonyu ti udum hi algaw ya pa'anamuto' nan tatagu' an i'Israel ya iJudah nan babluy an indat'uh din o'ommoda. Ha"in an Dios di ad hapit ay date.”
4Ya hiyatu goh di hinapit Apo Dios hi ma'at hinan i'Israel ya iJudah 5an inalinay,
“Ha"in an Dios ya donglo' di kilan nan tatagu
an dumalat nan nidugah an ta'otda.
6Ya undan muntungawday linala'i?
Mu anaad ta nan mun'abi'ah an linala'i ya paddungnay muntungaw di tigawdah ha'it di nomnomdah nan na'at,
ya immuphatdan amin hi ta'otda?
7Manu ay ya awniat nunnaud di ma'at an mi'id ah nipaddungana ahan,
ti awniat nidugah di punligatan nan tatagu' an holag Israel.
Mu hay umangunuh ya baliwa' dida.
8At ipungo' nan paddungnay pakuh bagangda,
ya ta"on goh nan paddungnay bangkelengda,
ta adida mahkay mumbalin hi baal di udum an tataguh udum an babluy.
9At Ha"in mahkay an nidugah di abalinanan Dios di punhulbianda,
ya nan pot'o' goh an holag David di alida.
10At da'yun holag Israel ya adi ayu tuma'ot ya adi ayu numanomnom
ti la'tot ya pa'anamuton da'yu nongkay ay Ha"in
an ta"on un niyadagwin babluy di niyayanyu.
At iyanamut'u da'yu ya nan holagyu ta lumenggop ayu mahkay,
ya mi'id mahkay di mana'ta'atot ay da'yu.
11Ti wadaa' an mamaliw ay da'yu,
at pa"io' hanan babluy an nangiwa'ata' ay da'yu.
Mu adi' da'yu nongkay ubahon an un'u da'yu gilaton ya anggay
ti adi mabalin hi nonong ya adi ayu mamolta.”
12Ya inalin goh Apo Dios hinan tatagunay,
“Nan hugatyun nidugah an himmalom ya adi umadaog
13ti mi'id di mabalin hi pangagahyu,
ya mi'id di mangipapto' ay da'yu.
14Ti an amin nan tataguh udum an babluy an gunyu numpabadangan
ya inaliwan da'yu mahkay an adi da'yu nomnomnomon ay dida.
At Ha"in di paddungnay ma'abbungot an buhulyu an himmalom di inat'un nanugat ay da'yu
ti dumalat nan do'ol an numbaholanyu ya nan nun'appuhin pangatyu.
15Ya adi ayu munlilin dumalat nan punholholtapanyu ti da'yuy ad bahol!
16Mu nan aton nan buhulyu ya nan mamloh hi gina'u ya hiya goh di ma'at ay dida,
at an amin nan buhulyu ya mabaludda goh ta miyuydah udum an babluy.
17Mu da'yu ay an iZion ya paphodo' nan hugatyu ta mumbangngad nan maphod an punle'nayu
an ta"on hi un ad ugwan ay ya hay pannigdan da'yu ya ninganuy ayun mi'id di managgung ay da'yu.”
18Ya inalin goh Apo Dios di,
“Pa'anamuto' nan tatagu' hinan babluyda tuwali ta ipaphod'u dida ya nan numpunhituwanda,
ya umat goh hinan numpunhituwan nan tatagu.
Ya maha"ad goh nan palasyuh din naha"adana tuwali,
at mipaphod henen babluyda.
19At mun'am'amlongdan mungkantah punyamanandan Ha"in.
Ya tigo' ta mahlagda ta dumo'olda,
ya mawaday pange'gon di tatagun dida an adida mahkay mapihul.
20Ya mumbangngad nan ongol an abalinanda ta umat hidin nabayag,
ya mumbangngaddan himpamabluy an mundayaw ay Ha"in,
ya moltao' an amin nan mangipadah an mamalpaligat ay dida.
21Ya hay mun'ap'apun dida ya nan oha goh damdama ay dida,
ya hiyay mabalin an meheggon ay Ha"in hinan awada'
ti adi mabalin an meheggon ay Ha"in hi un'u adi abuluton.
22At hiyanan diday tatagu',
ya Ha"in di Dios hi dayawonda.
23Mu Ha"in an Dios ya nidugah di bumungta' hinan mumbahol
an umat hinan mabi'ah an puo' di ato' an mangubah hinan tatagun nappuhiy pangatda.
24Ti hay bungot'u ya adi nonong ya na'ubah an engganah un ma'at an amin nan ninomnom'u.
Mu udum hi algaw ya ma'awatanyu nan pohdo'.”