Hay Luwaluh Pumpabadangan ay Apo Dios
1Apo Dios, anaad ta bataanan da'min He"a,
ya anaad ta paddungnay un'a mipo"oy hinan awadan di ligatmi?
2Ti mumpahpahiya nan nun'appuhiy pangatdan tatagu,
ya paligligatonda nan nun'awotwot,
mu didaat di mun'abituh nan inyammada.
3Ti iyamlongdan ipabagtu nan nun'appuhin ninomnomdan aton,
ya pohpohdondan umam'am,
ya idutandah Apo Dios.
4Ya adida ibilang hi diosda unu nomnomon hi Apo Dios
an dumalat nan nidugah an pumpahpahiyaanda.
5Mu gun pumhod damdamay nitaguanda,
ya mumpahpahiyada an adida nomnomon nan Uldinmu,
ya undaat goh udot ngongohhoyon an amin nan buhulda.
6Ya hay ninomnomda ya alyonday,
“Mi'id di nappuhih ma'at ay da'mi an hay amlongmiy wadah enggana
ti mi'id ahan nappuhih ma'at ay da'mi!”
7Ya hiya ya an amin di hapitona ya idut, ya layah, ya nan atata'ot,
ya nan nomnomonah ma'at ya nan gulu ya nan nappuhin ma'at.
8Ya mipo"oydah nan nibataan ta mumbota'dah maluh hi patayonda
an ta"on un nan mi'id ah baholna.
9Ya umatdah nan layon an mumbota' hi dapopona,
ya hohoddona nan agogohgoh ta wa ay di paddungnay ma'na ya nungguyuddan ilayaw.
10Ya matu"in nan ma'na ti mabi'bi'ahda ya un hiya,
11ya alyon hanan nappuhiy pangatday,
“Mi'id inilan Apo Dios hinan at'aton tu'u ti nahanian di angahna,
at adi ditu'u tigon!”
12At, Apo Dios, moltaom hanan tatagu,
ya adim ni' aliwan ta badangam nan agogohgoh!
13Anaad nin ta hanan nappuhiy pangatda ya pihulon da'a?
Ti hay ninomnomda ya alyonday,
“Adi ditu'u moltaon ay Apo Dios!”
14Mu He"a, Apo Dios, ya i'innilam nan umipaligligat ya umipalungdaya,
at humalyaom dida!
Ya He"ay pangidenolan nan mi'id di abalinanda,
ya He"a goh di bumadang hinan nguhu!
15At pogpogom di abalinan nan tatagun mangat hi nappuhi,
ya moltaom didan dumalat nan nappuhin gunda aton ta nangamung unda ma'amin an mapogpog!
16He"ay Alih mi'id pogpogna,
mu nan tatagun mundayaw hi udum an dios ya mapogpogdah tun babluymu.
17Apo Dios, inila' an donglom di luwalun nan mahmo' an tatagu ti al'alu'om dida,
ya abulutom nan odowonda.
18Ya baliwam nan nguhu ya nan ma'abohlan,
at mi'id mahkay di mana'ta'atot ay dida.