Hay Luwalu ta Mipabangngad di Pumhodan nan Babluy
Hete ya psalm an intudo' Asaph, ya hay intud'ana ya nan ap'apun di muntudtuduh kanta, ya hay tunena ya “Tulag an Habhabung an Lilies.”
1He"an Pahtul nan holag Israel an mangipangpanguluh nan holag Joseph
ya donglom ni' tun iluwalumin He"a an inumbun hinan numbattanan nan duwan anghel an ma'alih cherubim,
ya mumpattig'ah
2nan holag da Ephraim, ya hi Benjamin, ya hi Manasseh
ta ipattigmu ni' nan nidugah an abalinam,
ya umali'a ta baliwan da'mi.
3Haggungon ni' goh da'mi, O Dios,
ya ipattigmu nan pamhodmun da'mi,
at mabaliwan ami!
4O Apo Dios an na'abbagbagtu,
uya'anah bimmubungtam hinan luwalun nan tatagum?
5Nan paddungnay impitanudmun dida ya nan nunlungdayaanda,
ya nan lugwada di hiyay impa'inummun dida,
6ya henen inatmun da'mi ya ten hinhannulon da'mih tun tatagun heneggonmi,
ya gun goh da'mi aba'abatlan hinan buhulmi.
7Haggungon ni' goh da'mi, O Dios an nidugah di abalinana,
ya ipattigmuy pamhodmun da'mi,
at mabaliwan ami!
8Ya umat amih nan greyp an inuwalmud Egypt ta indalhinmu an intanom hinan adagwin luta
an numpakakmu nan tatagun bimmabluy hidi ta da'miy nihukat.
9Ya leneneham nan babluy,
ya pinaphodmu ya un da'mi iyuy an ihinah di,
ya ten linumhod di lamutmi,
at nunhinap ami mahkay hitun babluy an indatmu.
10Ya himmapang henen intanommu,
at linidumana nan aduntuduntug,
ya ta"on nan pa"ongol an cedar ya lenengbawan nan hapangna.
11Ya immatam nan hapangnah dih nan baybay,
at nan pa'attubun hapangna ya lenengbawanda nan Wangwang an Euphrates.
12Mu anaad nin ta numpa"im nan nunlene'woh an allupmi
ta omod un an amin nan way maluh ya nun'akawda nan bungan di greyp?
13Ya tigom adya an paddungnay nun'a'an nan laman ya nan udumnan a'animal nan intanommin greyp,
ya nun'igatinda goh!
14O Apo Dios an na'abbagbagtun wad abuniyan,
al'alu'onmi He"a ni' ta tigom tun aatmi!
Ya uhdungan da'mih nad abuniyan,
ya ihamadmun tigon ta igohgoham tun ay greyp!
15Ya hinalimunam tun intanommu an ten dimmo'ol di hapangna,
ya nidugah di bi'ahda ti hinalimunam ya binaliwam dida!
16Mu ten nun'alngoh ya nun'oghob tun greyp,
at ten mun'a'ubahda an dumalat nan bumungotmuh nangihingalam ay dida.
17Ya ipapto'mu ni' nan pento'mun tatagum an pohpohdom
an din hinalimunam an intanom,
18ta way atonmin adi mahkay man'ug ay He"a,
at pabi'ahon da'mi ta way atonmin gun munluwalun He"a.
19O Apumin Dios an na'abbagbagtu, haggungon ni' goh da'mi
ta ipattigmun da'mi nan pamhodmu,
at mabaliwan ami!