Nan Hapit Apo Dios

Hay Kantan David hi Pundayawnan Apo Dios
Intudo' David heten psalm an mangipabagtun Apo Dios.
1Apo Dios, dayawo' He"a an Dios'u ya Ali',
ya idaydayaw'uh mid pogpogna nan ngadanmu.
2Immannung an dayawo' He"ah abigabigat,
ya idaydayaw'uh mid pogpogna nan anabagbagtum.
3Apo Dios, na'abbagtu'a,
ya He"ay immannung hi madayaw!
Mi'id ah ohah nanginnilah nan aat di ana'abbagbagtum!
4Awniat mada'da'watan an mipa'innilah nan mahayhaynod an holag nan umipanoh'an ina'inatmu,
at diday mangipa'innilah nan tatagu ay danen inatmu an dumalat nan nidugah an abalinam.
5Ya ipa'innilada goh nan anabagbagtum,
ya ha"in ya nonomnomo' nan mun'aphod an ato'atom.
6Ya gunda ibabbaag goh nan nidugah an umipanoh'an gunmu ato'aton,
ya ta"on un ha"in ya hiyah ne goh di ibabbaag'u.
7Ya ibabbaagda goh di aat di amaphodmu,
ya umamlongdan mangikankantah aat di anahamadmu.
8Apo Dios, makulug an ma'ulay'a ya ma'ahhimo"a.
Adi'a mabanbannungot,
ya adi maluman di pamhodmu.
9Maphod di atom hi an amin hi tagu,
ya ma'ulay'an amin hinan limmum.
10Apo Dios, dayawon da'an amin hinan limmum,
ya an amin nan un'unnud ay He"a ya munyamandan He"a.
11Ya gunda goh hapihapiton di anabagbagtun nan pumpapto'am
ya nan anidugah di abalinam,
12ya ta innilaon an amin nan tataguy anidugah di abalinam
ya nan anabagbagtun nan pumpapto'am.
13Munnononnong hi engganay pun'ap'apuwam ta He"ay Alih enggana.
Hi Apo Dios ya ipa'annungnan amin di alyona,
ya mipattig di ama'ulaynah an amin hinan atona.
14Hiya ya bumadang an amin hinan maligligatan,
ya pabi'ahonay nomnom nan munlungdaya.
15He"ay pangitangadan an amin nan matagun limmum hi mahapulda,
ya idatmuy itanuddah nan gutud di panapulanda.
16Ya adida makudangan hi malgom an mahapulda ti idatmun amin.
17Hi Apo Dios ya maphod an amin di atona,
ya nidugah di homo'na.
18Ya donglona nan luwalun nan makulug an mumpahpahmo' ay Hiya,
19ya idatnan amin di mahapul nan un'unnud ay Hiya,
ya donglonay pumpahpahmo'anda ta ibaliwna dida.
20Ipapto'na nan nidugah di pamhoddan Hiya,
mu nan mangamangat hi nappuhi ya ubahona dida.
21Dayawo' hi Apo Dios!
At an amin tu'un limmuna ya dayawon tu'uy ngadanah enggana!

*^ Nan mahhun an letran di alphabet di Hudyu an A ya hiyay te"an di letrah nan mahhun an verse, ya nan miyadwan letran di alphabetda an B ya hiyay te"an di letrah nan miyadwan verse. Ya mahayhaynod nan hinohhan letran di alphabetda an mete"ah A ta engganah negpongana an taw. Ya duwampulu ta han duway letran di alphabetda, ya ta"on hi un anggay di duwampulu ta han ohan verses ten psalm mu magodway verse 13 hinan Biblian di Hudyu ta munduwan verses, at duwampulu ta duwa damdama.