Tane Iakob bola Aran bedewe alene Leiban obampa iwoa nata Lea ita Reitel naimon. Me ioto sa malesamopia baiwa Leiban mampe nolalena enawa 14 dialen. Ita God me dieno bosiawa ene leulene alen mamba bolawe. Me leulene aleidie into Esau apanawa do insamone nuawa saidalen. Ipawa me apanawa do onau enapue kadimopua sawa.
God sau euda Iakob osowe itude
9Iakob bola Padan Aram bedewe wandie leulene bola debama Betelwa wiseno God me mampe segalene sau euda osowe itun. 10Ita God wanase,
“E eboa ipa Iakob
ebo sa tauma dialeide
tane eboa sanaa ipa Israel.”
Ita me ebowa ituna Israel. 11Tane God me mampe wanase,
“Ne ipa God Mukamukaua
e otootoite obana uara segantopu
do dana debamalepi
ita uwa daitada segantopu.
Tane mo bedeuwo isiwa warere segantopue apana oniamompa.
12Tane tawo umanawa ne Abraam ita Aisak sauamona
ne e eneepa ita do e dana
ando muntompa tawo ema wanamopa.”
13Sape God Iakob mampe gagaloleno dialeno ene alen. 14God gagalolena aupawa oso Iakob seu dauma wadene eindodene ita osowe wain memene pulowa God mampe itun ita do ia olib esapa memene en. 15Iakob God nata sape gagalotona baiwa bola sa ebowa Betel itun.
Reitel bolen
16Ema aupe Iakob bola Betel ene antoie andoma bola debama Epra bedewe wimopua Reitel oto dauwa eten. Ita oto mulepona babisane poka etaidasan. 17Me oto gamoa babisadio poka debamaia wisen ita oto muleidio oniedia iwa wanase, “Mai saitaa e oto mona gamosaana.” 18Tane walama sawo Reitel boida baiwaledie oto ebowa ituna Benoni. Tane me mamba otopa ebowa itune wanase, Beniamin. 19Sape Reitel boleno bola debama Epra intawa aleidia waiwe dobontoiena. Tane bola debama Epra ipa Beteliem ebowa tontawa. 20Ita Iakob Reitel dobontoiena osowe seu dauma wadene eindoden. Mo seu sa ewompe me bowa insempa baiwa.
Aisak bowa
22Tane Iakob obampa mona wisiawa uduudu 12.
23Me manainapa Lea gamomona ipa:
Ruben me Iakob otopa tautuwa,
Simion, Liwai, Iuda, Isaka ita Sebulun.
24Tane manainapa Reitel obaampa mona ebou ipa:
Iosep ita Beniamin.
25Tane Reitel nolawa iwa ebowa Bila obampa mona ipa:
Dan ita Napitali.
26Ita Lea nolawa iwa ebowa Silpa obampa mona ipa:
Gad ita Asea.
Mo ipa Iakob obampa mona bola Padan Aram bedewe waimoie muntona.
27Tane Iakob leulene mamba Aisak mampe wisen bola Mamre, Kiriat Aba tampe. Bola sa tauma ebowa waia Ibron. Tane sape mapo Abraam Aisak nata ware rua waimoie. 28Ita Aisak sape wandio enawa 180 waden. 29Tane me wandio ena debamaia dialeno gulaulene boleno aleupa alen nosinosiwa mampo. Tane me obaampa Esau ita Iakob dobontoiena.