ECCLESIASTES
Tukakinyen Book In ECCLESIASTES
Book in Ecclesiastes fahkak nunak lun sie “Mwet Luti Lalmwetmet.” Mwet se inge akilen lah moul lun mwet uh fototo, ac oasr na amei inmasrlon mwet uh oayapa pus na ma sesuwos ac ma in akfohsyauk nunak lun mwet uh. Ke ma inge el pangon mu “moul uh ma lusrongten.” El tuh tia kalem ke oakwuk lun God, su kol ac karingin moul lun mwet uh. Tusruktu ne ouinge, el sang kas in kasru lal nu sin mwet uh elos in insianaung in orekma, ac in engankin mwe kite lun God ke kuiyalos ac ke lusen na moul lalos.
Pus na inmasrlon nunak lun mwet luti lalmwetmet se inge sikyak ke kas in sufan ac aktoasrye mwet uh. Tusruktu sripa se ma pwanang book se inge oan in Bible uh pa in akkalemye lah ouiyen lulalfongi ma Bible uh srumun uh arulana yohk kalmeya, ac fal nu sin mwet ma selulalfongi ac liye na layen koluk ke ma uh. Ke mwet uh ac rit book se inge elos ac mau akilenak nunak lalos sifacna kac, tusruktu elos ac konauk lah Bible se na ma fahkak nunak inge pa oayapa ase finsrak lasr in God su mwe aksasuye moul lun mwet uh, ac oayapa arulana akkalemye lah oasr sripen moul lun mwet uh.
Takla Lun Koanon Book Se Inge
Ya oasr sripen moul lun mwet uh? 1:1—2:26
Kas lun mwet uh ke moul 3:1—11:8
Kas in kaliya 11:9—12:8
Kas in orani kalmac yohk 12:9–14
Ya Oasr Kalmen Moul Uh?
1Pa inge kas lun sie Mwet Luti Lalmwetmet, wen natul David, su tuh tokosra in Jerusalem.
2Mwet Luti Lalmwetmet el fahk lah ma nukewa ma lusrongten na lusrongten! Moul uh wangin sripama na lusrongten se. 3Kom orekma ac kemkatu in moul lom nufon, na mea oasr ma kom konauk kac? 4Sie fwil uh somla ac sie fwil sifil tuku, a faclu nuna ouiya ah na. 5Faht ah srakna tak ac srakna tili, na sa na in folok nu ke acn se ma el ac sifil takak we. 6Eng uh tuh eir me ac som nu epang, ac sifil tuk — raun na raun. 7Infacl nukewa sororla nu meoa, a meoa soenna sessesla. Kof uh folok nu yen infacl uh mutawauk we, ac sifilpa sororma. 8Saflaiyen ma nukewa pa totola — sie totola na yohk su wangin kas fal in aketeya. Mutasr tia muti ke ma kut liye, ac insresr tia muti ke ma kut lohng. 9Ma sikyak meet ac sifilpa sikyak. Ma orekla tari ac sifilpa orek. Wangin ma sasu in faclu nufon. 10Mwet uh fahk, “Liye, ma sasu se pa inge!” Tusruktu sutuu, sikyak tari meet, oemeet liki na kut isusla ah. 11Wangin mwet esam ma tuh sikyak in pacl meet ah, ac in pacl fahsru wangin mwet fah esam ma sikyak in len ingela.
Mwet Luti Lalmwetmet Sac El Suk Kalmen Moul
12Nga, Mwet Luti Lalmwetmet, su tuh muta Jerusalem ac tokosra fin acn Israel nufon. 13Nga nunkala ku sik mu nga ac tuni ac lutlut ke ma nukewa ma mwet uh oru fin faclu.
God El ase orekma na toasr nu sesr mwet uh in oru. 14Nga liye tari ma nukewa ma orek faclu, ac nga fahk nu sum, nufonna wangin sripaoana ukweyen eng uh. 15Kom tia ku in aksuwosyela ma kihla; kom tia pac ku in oek ma wangin uh.
16Nga fahk nu sik sifacna, “Nga sie mwet na fulat, ac nga arulana lalmwetmet liki kutena mwet su leumi Jerusalem meet likiyu. Nga etu na pwaye lah mea lalmwetmet ac etauk.” 17Nga tuh sulela ku sik in etu ke kalmen etauk ac kalmen lalfon, oayapa ke lalmwetmet ac wel. Tusruktu nga konauk lah ma inge oana ukweyen eng uh. 18Lalmwetmet lom fin yokelik, na fosrnga lom ac yokelik pac. Fin yokelik etauk lom, ac yokelik pulakinyen keok sum.