Ɩ́ sɑ Tɑcɑɑ hətɛ.

Tɑcɑɑ təmlɛ nyə́mɑ mɛ ɩ́ sɑmɩ-ɩ.

2Mpɑ mɛ ɩ wɛ Tɑcɑɑ Ɩsɔ təyɑɣɑ tɑɑ

nɑ ɩ tɑɣɑ tɔɔ tɔ,

3ɩ́ sɑ Tɑcɑɑ.

Mpi tɔ, ɩ kɛ́ kʋpɑŋ.

Ɩ́ yoonɑ ɩ hətɛ tɑɑ,

pə tɑɣɑ pʋlʋ, ɩ kɛ́ kʋpɑŋ.

4Yɑkɔpʋ kɛ Tɑcɑɑ ləsɑɑ.

Ɩsɛɣɛlɩ kɛ ɩ pəsɑ ɩ nyəm.

5Mɑ nyəmɑ́ sɩ tɑ́ Ɩsɔ Tɑcɑɑ n kɛ́ sɔsɔ,

n kəlɑ tɩɩŋ tənɑ.

6Pɑɑ mpiɣi n cɑɑkɩ, n lɑkɩ-wəɣɩ.

Pɑɑ ɩsɔtɑɑ nɑ ɑtɛ.

Pɑɑ teŋkunɑɑ tɑɑ, pɑɑ lumɑŋ sɔsɔɔŋ tənɑ tɑɑ.

7Nyɑ́ kpɑɑsəɣənɑ ɩsɔŋmʋntʋ kɛ tɛtʋ tɔɔ,

nɑ ń tisiɣi cɑlɑnɑɑ nɑ tɛʋ,

nɑ ń ləsəɣɩ heelim kɛ pə təsɩɩlɛ tɑɑ.

8Nyɑ́ kʋnɑ Icipiti kɑncɑɑlɑɣɑ ɑpɑlʋpiyɑ.

Pɑɑ yəlɑɑ nyənsɩ, pɑɑ tɔlɑ nyənsɩ.

9Nɑ ń lɑ́ kɔkɔlɔ nyəmnɑɑ nɑ piti təmɑ kɛ Icipiti tɑɑ,

sɩ pə́ sɛɣɛsɩ Icipiti wulɑʋ nɑ ɩ nyə́mɑ.

10N yoonɑ piitimnɑɑ pɑɣɑlɛ,

nɑ ń kʋ ɑwulɑɑ toŋtʋnɑɑ.

11Ɩsɩɩ Amolii nyə́mɑ wulɑʋ Sihoŋ,

nɑ Pɑsɑŋ nyə́mɑ nyəŋ Hoki,

nɑ Kɑnɑɑŋ ɑwulɑɑ tənɑ.

12Ɩlɛnɑ ń hɑ́ pɑ tɛtʋnɑɑ kɛ Ɩsɛɣɛlɩ nyə́mɑ

nɑ tə́ pəsɩ pɑ nyəntʋ.

13Tɑcɑɑ nyɑ́ hətɛ yɑɑkɩ tɑm tɔɔ kɛ́.

Lʋlʋŋ lʋlʋŋ kɑ tɔɔsəɣɩ nyɑ́ tɔɔ.

14Mpi tɔ, Tɑcɑɑ n kɑ́ hʋʋnɑ nyɑ́ yəlɑɑ kɛ́.

N kɑ wɛɛnɑ nyɑ́ təmlɛ nyə́mɑ pətɔɔtəlɛ.

15Piitimnɑɑ tɩɩŋ ntɛ́ liɣitee nɑ wʋlɑ.

Yəlɑɑ lupənɑ-ɩ nɑ pɑ niŋ.

16Tɩɩŋ ɩnɩ ɩ wɛnɑ nɔɔsɩ, ɩɩ yɔɣɔtəɣɩ.

Ɩ wɛnɑ ɩsɛ ɩɩ nɑɑkɩ.

17Ɩ wɛnɑ ŋkpɑŋŋ, ɩɩ nɩɩkɩ nɑtəlɩ.

Ɩ tɩɩ fɛɩnɑ feesiŋ kɛ ɩ nɔɔsɩ tɑɑ.

18Mpɑ pɑ luki tɩɩŋ ɩnɩ nɑ

pɑ tənɑ mpɑ pɑ tʋɣɩ-ɩ nɑɑni tɔ,

pɑ́ wɛɛ ɩsɩɩ tɩɩŋ ɩnɩ.

19Ɩsɛɣɛlɩ nyə́mɑ mɛ ɩ́ sɛɛ Tɑcɑɑ.

Alɔŋ lʋlʋɣʋ nyə́mɑ mɛ mɩ́ɩ́ sɛɛ-ɩ.

20Lefii nyə́mɑ mɛ ɩ́ sɛɛ Tɑcɑɑ.

Mpɑ mɛ mə nyɑŋnɑ-ɩ tɔ ɩ́ sɛɛ-ɩ.

21Ɩ́ sɑ Tɑcɑɑ kɛ Siyɔŋ tɑɑ.

Ɩ́ sɑmɩ-ɩ Yosɑlɛm timpi ɩ wɛɛ tɔ.

Ɩ́ sɑ Tɑcɑɑ.