1Ked susuludkuʼn ay-ayatok, ituɏutuɏuyyu pammatiyu kan Apu Jesu Kristu. Amod chi ayuk kan chikayu, ti chikayu mampagalas kan sakon ya chikayu bo isun chi gunggulak si kawachik.

2Chikayu Euodia kan Syntyche, kewayu ta mantimpuyug kayu gapu si pammatiyu kan Apu Jesus. 3Ya ibyegak bo kan chikayu, biɏunku un lakakawachi kan sakon si allayaʼn ugud Apudyus, tuɏunganyu cha allaʼn byebyai ti tuttuwaʼn impapatichaʼn tummuɏung kan sakon si langibyegbyeg-ak si bibiɏuʼn chameg, un isun cha Clement ya cha allaʼn uchum un lakakawachi kan sakon, un lilista losan cha ngachencha si liblun chi biyeg.

4Pasig kayu otyan mangganggalas gapu kan Apu Jesu Kristu. Ked ikasikasinku ibyega un ganggalasonyu! 5Masapuɏʼn ipailayu kilaalusyu kan cha losan un tagu ti tuttuwaʼn allà akit chi mangulilan Apu Jesus. 6Ya achi kayu machanchalagen ulay silu, ngim lu malluwalu kayu kan Apudyus, ibyegayu losan cha kochewonyu kan siya ya ipatiyu bo cha yamanyu kan siya. 7Ked idchon Apudyus chi lumin-awaan chi somsomokyu un lappun tagu si makaipakaawat, siya malapaya si somsomokyu mipagapu kan Jesu Kristu.

8Ha alungus chi allaʼn isuɏatku kan chikayuʼn susulud, siyad isosomokyu cha tuttuwa, lapotog, ustu, mampeɏkas, latagop, machayaw ya cha kabiɏuwan. Ya ulay cha uchum un bibiɏu ya mampabiɏu si somsomok. 9Ya cha losan un ilacheɏyu kan ilawatyu kan chingngeɏyu ya intullongyu kan sakon, hachi koonyu. Ked si Apudyus un mampalin-awa si somsomok, iinggew kan chikayu.

10Amod chi galasku kan Apu Jesus, ti ulay lu labyeyeg, kasinyu sakon tiluɏungan si langipain-anyu si ayatyu kan sakon. Achipunku kalan un laliwatanyu sakon, ngim lappun wayayuʼn mangipaila si ayatyu. 11Achipunku kalan un kuɏang cha masapuɏk, ti piliingsak un maplok ulay silu un awed kan sakon. 12Pilachasku un lakuɏangan ya lasasaweɏ. Ked si sala, ulay silu makwa kan sakon, ulay mabibittin man willu mamassug, ilagammuk chi kopyan maplokan. Ked lappun lilik kan cha masapuɏk, ulay lappun willu masaweɏ. 13Kabyeeɏak losan ulay silu, mipagapu si tuɏung Jesu Kristu un siya mampakoscheɏ kan sakon.

14Ngim manyamalak ti amod chi tuɏungyu kan sakon kan cha allaʼn ligatku. 15Chikayuʼn iPhilippi, ammuyu un chikayu laluɏung kan sakon si ummoyolak ud Macedonia si chamun chi langibyegbyeg-ak si bibiɏuʼn chameg. Chikayu abus chi langatod si losan un masapuɏk un siya isun chi lakakawachiyanyu kan sakon. 16Ulay chi illinggewak ud Thessalonica, impawpaw-ityu tuɏungyu kan sakon. 17Manyamalak kan cha losan un tuɏungyu kan sakon. Ngim piok un ipakaammu kan chikayu un chakampun un hachi singsingtok, ngim siyad singsingtok chi machogchog-an chi gunggulayu. 18Ked si sala, lappun langkuɏangak ngim lasaweɏ, ti ilawatku losan cha impaw-ityu kan Epaphroditus. Ked cha hachiʼn impaw-ityu, isucha mambyanguʼn maichatun kan Apudyus un maplokala ya mampagalas kan siya. 19Si Apudyus, lappun miyisuwan chi kilabyaklangla, ked mipagapu kan Jesu Kristu, idchola cha losan un kasapuɏanyu.

20Ked chaychayawon taku si Apudyus un Ama taku ing-inggala. Amen.

21Pakumustaok cha losan un tagun Apudyus utlat un lamati kan Jesu Kristu. Ked cha susulud taku un inggew kan sakon, pakumustaoncha bo chikayu. 22Siya bo kan cha losan un tagun Apudyus un inggew utla Rome, amod gey cha hachiʼn inggew si byeɏoy chi Ari, pakumustaoncha bo chikayu losan.

23Iluwaluk ta kacheguwan chikayu losan kan Apu Jesu Kristu.