ባብሎኔ ዓጫ ሎኦማንዳያ ማዒፆ
1ናንጊና ናንጋ ጎዳ ሂዚ ጋዓኔ፦
«ሃና ኔ ባብሎኔኮ ኩሙፆ ዉዱሮ ናዔሌ!
ኬዲ ሲላላ ዴዔ፤
ካኣቱሞ ሻኣሎይዳቱዋንቴ ኬዲ ሳዓ ዴዔ፤
ሃካፓ ሴካ ሚዛጲ፥ ሃሣ ሃጊ ዔቃዞ ጌይንቲፃ ኔኤኮ ዓታንዳኔ።
2ዓካሪ ዎንሢ ዔኪጋፓ ሃኣኮ ዎዼ፤
ኔኤኮ ቶኦኮ ዖሾሢ ቡሌ፥ ዖዶዞ ማኣዓሢያ ኔኤኮ ኬሴ፤
ሺንቺኖ ኔኤኮ ቃኣሪጋፓ ሙርታሢ ጴዺሲ ዎሮና ፒንቄ።
3ዴራ ቢያ ኔኤኮ ካሉሞ ዛጋንዳኔ፤
ፆኦዛ ማዤ ዑፃ ኔኤኮ ጴዻንዳኔ፤
ታኣኒ ዖናኣ ቲኢሩዋዖ ኮሞ ዔካንዳኔ።»
4ኑና ዓውሳሢ ዒስራዔኤሌኮ ዱማዼሢኬ፤
ሱንፃ ዒዛኮ ቢያ ባኮ ዎይሣ ጎዳኬ።
5«ዔና ባብሎኔኮ ዉዱሮ ናዔሌ! ዹሞ ጌሊጋፓ ዚቲዮ ጌዒ ዴዔ፤
ሃካፓ ሴካ፦ ‹ካኣቶኮ ጌኤሾ› ጌዒ ኔ ዔኤሊንታዓኬ፤
6ታኣኒ ታኣኮ ዴሮ ዑፃ ዻጋዼኔ፤
ዔያቶዋ ታኣኒ ዓዳ ዒኢቴ ባኣዚጉዲ ፓይዲ
ኔኤም ዓኣሢ ታ ዒንጌኔ፤
ኔኤኒ ጋዓንቴ ዔያቶ ሚጪንቲባኣሴ፤
ጋርቼ ዓሶ ዑፃታዖ ኔኤኮ ሄርቂ ዎይሢፆ ቃንባሮ ኔ ዴኤፂሴኔ።
7‹ታኣኒ ናንጊና ጌኤሾ ማዒ ናንጋንዳኔ› ኔኤኒ ጌዔኔ፤
ኔኤኒ ማዼ ማዾሮ ዓይጎዋ ኔ ማሊባኣሴ፤
ኔ ማዾኮ ዓኣፓ ዓይጎ ማዓንዳቴያ ማሊ ኔ ጶቂሢባኣሴ።»
8«ኔኤኒ ዔኤቢ ኔኤም ጊኢጌም ሌሊ ናንጋኒ ኮዓዜ፥
ኔና ኔ ጉሙርቂ፥ ኔ ዒኖና፦ ‹ታጉዴያ ዖኦኒያ ባኣሴ፤
ዜኤሪንዶጉዲ ማዒ ታ ናንጋዓኬ፤
ናይ ታኣኮ ሃይቃዓኬ› ጋዓዜሌ
ሃያ ዋይዜ!
9ዎዚ ኔኤኮ ማርሻ ዼኤፒ፥ ዦዋታኣ ሚርጌ ማዔታቴያ
ዬንሢ ላምዖ ባኮንሢ፥ ናይ ሃይቄያ ማዒሢና
ዜኤሪንዶ ማዒሢ ፔቴ ኬሊዳ ዔርቲባኣንቴ ኔና ሄላንዳኔ፤»
10«ኔኤኮ ፑርቱሞና ኔኤኒ ዖቶርቂ
‹ዖኦኒያ ታና ዴንቁዋሴ› ጌዔኔ፤
ኔኤኮ ዔራቶና ጎኦቡሞና ኔና ዻቢሼኔ፤
ኔኤኮ ዒኖና ኔ፦ ‹ታናኬ፥ ታ ጊዳፓ ዓቴም ሜሌ ባኣሴ› ጌዔኔ።
11ኔኤኮ ማርሾና ኔኤኒ ባይዛኒ ዳንዳዑዋ ፑርታ ባኣዚ
ኔኤኒ ቃዛኒ ዳንዳዑዋ ዴኤሢ ሜታ
ኔኤኒ ማሊባኣ ባይሲንታ ዔሪባኣንቴ ኔና ሄላንዳኔ።
12ጎኦንቴ ኔኤም ዻካታዎ ጊኢጋንዳያ ማዔቴ
ኔኤኮ ሞርኮዋ ኔኤኒ ዒጊቻኒ ዳንዳዓንዳያታቴ
ሂንዳ ዓካሪ ኔኤኮ ናኣቱማፓ ዓርቃዖ
ማዺ ማዺ ኔ ናንጌ፥ ሚርጌ ማርሾ ማርሼ።
13ኔኤኒ ዔኬ ዞራ ላላቢሴያፓ ዓቴም ዓይጎዋ ኔና ማኣዲባኣሴ፤
ዓጊኖኮ ፄኤራ ፄኤራ ዦኦጋሢ ዛጊ
ፓይዳ ዓሳ ሂንዳ ሃኒ ሙኮንጎ፤
ኔና ሄላንዳ ሜታሢዳፓ ዔያታ ኔና ዓውሶንጎ።»
14«ዔያታ ዲኢሪ ዲልባጉዴያኬ፥ ታሚ ዔያቶ ሙዓንዳኔ፤
ፔ ቶኦኮ ዔያታ ታሞ ሼኤላፓ ዓውሳኒ ዳንዳዑዋሴ፤
ዓሲ ዓጫ ዴዒ ካሽታ ታሚ ባኣሴ።
15ናኣቱማፓ ዓርቃዖ ዔያቶና ዎላ ኔ ላቤዞንሢ
ዎላ ኔኤኒ ኮርሞ ኮርሜዞንሢ
ማዻኒ ዳንዳዓማ ዬማ ሌሊኬ፤
ዔያታ ፔቴ ፔቴሢ ፔ ቤዞ ዓኣዻንዳኔ፤
ኔና ዓውሳንዳያ ጋዓንቴ ባኣሴ።»