ጌኤዦ ማፃኣፖ ዒሲያሴ ማፃኣፖ 35

ማሂ ሻንቂንቲ ዔውቴ ዴሮ ዎዛ

1ዓሲ ናንጉዋ ዳውሎንታ ሃንጎ ሳዓኣ ዎዛዻንዳኔ፤

ዬያ ዳውሎይዳ ቡኒ ቡናንዳኔ።

2ዳውላ ዹኡቄ ቡኖና ኩማንዳኔ፤

ዎዛ ዓይኑሞ ዔያታ ዓይናዻንዳኔ፤

ዓዳ ሊባኖኦሴ ዹኮጉዲ ዲቃሣያ ዔያታ ማዓንዳኔ፤

ቄርሜሎሴ ዹኮጉዲ፥ ሃንጎ ሳኣሮኔ ዶኦጮጉዲ ሚዛጳያ ማዓንዳኔ፤

ቢያሢ ናንጊና ናንጋ ጎዳኮ ቦንቾንታ

ኑ ፆኦዛሢኮ ዲቃሣያ ማዒፆዋ ዛጋንዳኔ።

3ዒንሢኮ ላቤ ኩጮንታ ኮልኮልቄ ጉኡዦዋ ዶዲሹዋቴ።

4ዒጊጫ ዒና ዓኣዞንሢም፦ «ዓካሪ ዒንሢ ፆኦዛሢ

ዒንሢ ሞርኮ ኮሜ ዔካኒና ዔያቶ ዻቢንቶኮ ኮይሳሢ ዒንጋኒ

ሙኪ ዒንሢ ዒዚ ዻቂሻንዳሢሮ ዶዱዋቴ! ዒጊጪፖቴ!» ጎዑዋቴ።

5ዒማና ዓኣፖ ባይቄ ዓሳ ዛጋንዳኔ፤

ዋዮ ባይቄ ዓሳኣ ዋይዛንዳኔ።

6ቶኮ ዎቦ ዓሳ ጌንዖጉዲ ፂካንዳኔ፤

ዻንጎ ባይቄ ዓሳ ዎዛ ዓይኑሞ ዓይናዻንዳኔ፤

ዓሳ ናንጉዋ ዳውሎይዳ ዋኣሢ ዑርታንዳኔ።

7ሙርቁንፆጉዴ ማኣሻላ ቦቆሊ ማዓንዳኔ፤

ሜሎ ሳዓ ዓልቃ ዋኣሢና ሎጫንዳኔ፤

ዉኡካሢ ፂካ ቤዞይዳ ዓኣዔ ማኣቲና ማጫሬና ኬስካንዳኔ።

8ዒኢና ዳልጊ ጎይሢ ኬስካንዳኔ፤

ዱማዼ ጎይሢያ ጌይንታንዳኔ፤

ዬይ ጎይፃሢ ፆኦሲ ዓሶም ማዓንዳኔ፤

ጌኤሺ ማዒባኣ ዓሲ ዬኖ ጎይፆና ዓኣዹዋሴ፤

ዔኤዮ ዓሳኣ ዒዞና ዓኣዻኒ ዳንዳዑዋሴ።

9ዞቢ ማዔታቴያ ሜሌ ፑርታ ቦዖ ዬይና ዓኣዹዋሴ፤

ዬኖ ጎይፆና ሃንታዞንሢ ፆኦሲ ዓውሴ ፃጶ ሌሊ ማዓንዳኔ።

10ፆኦሲ ዓውሴ ዓሳ ማዒ ጊንሣ ሙካንዳኔ፤

ፆኦሲ ቦንቾም ዓይናዺ ዓይናዺ ፂዮኔ ዔያታ ጌላንዳኔ፤

ቢያ ዎዴና ዎዛዼ ጎይሣ ዔያታ ናንጋንዳኔ፤

ኮሹሞና ዎዛና ዔያታ ዴንቃንዳኔ፤

ዖዪሢና ሂርጋና ዔያቶፓ ሃካንዳኔ።

Notes

35:3 35፡3 ዔብ. 12፡12።

35:6 35፡6 ማቲ. 11፡5፤ ሉቃ. 7፡22።