ዲቦራንታ ባርቄንታ ዓይናዼ ዓይኑሞ
1ዬኖ ኬሎ ዲቦራና ዓቢኢኒያሜ ናኣዚ ባርቄና ሂዚ ጌይ ዓይናዼኔ፦
2ናንጊና ናንጋ ጎዳም ጋላታ!
ዒስራዔኤሌ ዓሳ ዖሎ ዖላኒ
ጉቤ ዒናፓ ዔቄኔ፤
ዴራኣ ዎዛዺ
ፔ ማሊሢና ናሽኪ ዔቄኔ።
3ዒንሢ ካኣታ ዎዛዹዋቴ!
ዒንሢ ዎይሣ ዓሳኣ ዒና ዔኪ ዋይዙዋቴ!
ናንጊና ናንጋ ጎዳ ማዔ ዒስራዔኤሌ ፆኦዛሢም
ታ ዓይናዻንዳኔ።
4ናንጊና ናንጋ ጎዳሢዮ!
ሴዒሬ ዹካፓ ኔ ዔቃኣና
ዔዶኦሜ ዓጫፓ ኔ ኬስካኣና
ሳዓ ዓጊፄኔ፤
ጫሪንጫፓ ዒርዚያ ዋርቄኔ።
ሂዮ! ዋኣፃ ሻኣሮይዳፓ
ሊካ ሾኦቴኔ።
5ሲና ዹኮ ፆኦዛሢ ቤርቶይዳ
ናንጊና ናንጋ ጎዳ ማዔ ዒስራዔኤሌ ፆኦዛሢ ቤርቶይዳ
ዹካ ዓጊፄኔ።
6ዓናቴ ናኣዚ ሻምጋኣሬንታ ያዔላንታ ዎዶና
ሲሳራ ዓጮኮ ኮርሞ ዓሳ
ዬኖ ዓጮና ዴንዱዋሴ፤
ጎይፆ ዴንዳ ዓሳኣ ዓኣሺንቲ
ሺርሻ ጎይሢና ዴንዳኔ።
7ዔናኣሬ ዲቦራ! ዒስራዔኤሌ ካታማ
ዓሲባኣያ ማዔኔ፤
ኔኤኒ ዒስራዔኤሌኮ ዒንዶ ማዒ
ዔቄ ዎዶ ሄላንዳኣና
ዒዛ ባዔ ማዒኬ ዴዔሢ።
8ዒስራዔኤሌ ዓሳ ቤርታ ዔያታ ዔሩዋ
ሜሌ ፆኦሲ ዶኦሬ ዎዶና
ዓጬሎይዳ ዖልዚ ኬስኬኔ፤
ዖይዲታሞ ሺዮ ዒስራዔኤሌ ዓሶይዳፓ
ጊቲማና ዎርሢና ዓርቂ ኬስኬ ዓሲ ፔቴታዖ ባኣሴ!
9ዒና ታኣኮ ዒስራዔኤሌ ፖኦሊሶ ዓይሣዞንሢናኬ፤
ዬያጉዲ ዎዛና ናሽኪ ዔቄ ዓሶናኬ፤
ናንጊና ናንጋ ጎዳም ጋላታ!
10ዒንሢ ኮኦሪንቴ ቦኦሬ ሃሮ ቶጋ
ኮኦሮ ዑፃ ጌሦና ሚዛጶ ባኮይዳኣ ጊኢጊ ዴዔ ዓሳ፤
ሃሣ ጊንሣ ዒንሢ ቶኮና ሃንታ ዓሳ
ዬያ ባኮ ኬኤዙዋቴ።
11ሂንዳ ዋይዙዋቴ!
ዋኣፆ ዱዎ ዔቶ ኮይላ ዋይዚንታ
ሚርጌ ዓሶኮ ዑኡዛ
ናንጊና ናንጋ ጎዳ ዖሎና ባሼሢ ዔርዛያኬ፤
ሃሣ ዒስራዔኤሌ ዓሶኮዋ ባሺፆ ኬኤዛያኬ።
ዬካፓ ናንጊና ናንጋ ጎዳኮ ዴራ ፔኤኮ ካታማፓ ካታማፓ ኬስኪ ካታሞ ጌሎ ካሮ ባንሢ ኬዴኔ።
12ዲቦራ ዔቄ! ዔቄ!
ዔቄ! ዓይኑሞዋ ዓይናዼ!
ዓቢኒዔሜ ናዓሦ፥ ባርቄ ዔቄ!
ሞርኮ ዲዓኒ ዔቂ ቤርታ ዴንዴ!
13ዬካፓ ጉሙርቂንታያ ማዔ ዓሳ ቢያ
ፔኤኮ ሱኡጎ ባንሢ ኬዴኔ፤
ናንጊና ናንጋ ጎዳኮ ዴራ ዖሎም ጊኢጊንቲ
ዒዛ ባንሢ ሙኬኔ።
14ፖኦሊሳ ዔፕሬኤሜፓ፥ ጊንሣ ሃሣ ዓማሌቄፓኣ ሙኬኔ፤
ሃንጎዋታ ሃሣ ቢኢኒያሜፓ ሙኬኔ።
ፖኦሊሶ ዓይሣ ዓሳ
ማኪሬፓ ኬዲ ሙኬኔ፤
ዖሎኮ ሱኡጋኣ ዛብሎኦኔፓ ኬዴኔ።
15ዪሳኮኦሬ ዓሶ ሱኡጋ ዲቦራና ዎላ ሙኬኔ፤
ሂዮ! ዪሳኮኦሬንታ ባርቄንታ ሙኬኔ፤
ዶኦጮ ባንሢያ ዔያቶ ጊንፆ ዴንዴኔ።
ጋዓንቴ ሮኦቤኤሌ ዓሳ ላምዖ ቤሲ ፓቂንቲ
«ዴንዶሞ ሃሾይ?» ጌይ ዔያታ ማሌኔ።
16ዔያታ ፔ ማራቶና ዎላ ዓይጋ ኔጌይ?
ማራቶ ጊንቾ ዑኡዞ ዋይዛኒዳ?
ሂዮ! ሮኦቤኤሌ ዓሳ ላምዖ ፓቂንቴኔ፤
«ዴንዶሞ ሃሾይ?» ጌይ ዔያታ ማሌኔ።
17ጋኣዴ ዓሳ ዮርዳኖሴ ሱካ ዓቴኔ፤
ዳኣኔ ዓሳኣ ዋኣፆ ካኣሚሎ ኮይላ ዓቴኔ፤
ዓሴኤሬ ዓሳ ባዞ ዓጫ ዓቴኔ፤
ዋኣፆ ካኣሚላ ዔቃ ቤዞይዳ ዴዔኔ።
18ዛብሎኦኔንታ ኒፕታኣሌኤሜንታ ዴራ ጋዓንቴ
ፔ ሼምፓሢ ሚጪንቱዋዖ ጌሜሮይዳ ዖልቴኔ።
19ዋኣፃ ዓልቃ ቤዞ ሜጌዶይዳ
ካኣታ ሙኪ ታዕናኬይዳ ዖልቴኔ፤
ሃሣ ካኣናኔ ካኣታኣ ዖልቴኔ፤
ሹጮ ቢሮ ዔያታ ዲዒ ዔኪባኣሴ።
20ጫሪንጮይዳ ዓኣ ዦኦጋሢ ሃንታዖ
ሲሳራና ዎላ ዖልቴኔ።
21ቂሶኔ ዎራ ፒፂ ዔያቶ ዴንዴኔ፤
ዬይ ሚናኣ ቂሶኔ ዎሮ ዲጳ ዔያቶ ሙዔኔ፤
ታኣኒ ጫርቂ ቤርቲም ዴንዳንዳኔ!
22ዖሎ ፓራሢ ቦጎድ ቦጎድ ጌይ ሙኬኔ።
23ናንጊና ናንጋ ጎዳኮ ኪኢታንቻ ኬኤዛዖ፦
«ሜሮዜ ጋዳንቁዋቴ!
ዒኢካ ናንጋ ዓሶ ቢያ ጋዳንቁዋቴ!
ዔያታ ናንጊና ናንጋ ጎዳ ዛላ ዔቂባኣሴ፤
ዒዛ ዛሎ ዖልታኒያ ኬስኪባኣሴ» ጌዔኔ።
24ቄና ዓሢ ሄቤሬ ማቻ ያዔላ
ላኣሎ ቢያይዳፓ ባሼ ዓንጂንቴያ ማዖም፤
ዓፒሎና ማዦና ማኣሮይዳ ናንጋ ዓሶፓ
ቢያ ባሼ ዓንጂንቴያ ማዖም።
25ሲሳራ፦ «ዋኣሢ ታና ዑሼቴራ?» ጋዓዛ
ዒዛ ጋዓንቴ ዲኢቂ ዒዛም ዒንጌኔ፤
ሚዛጶ ዓንዶና ሜጲ ዒዛ ዒንጌኔ።
26ዬያጉዲ ጊንሣ ፔቴ ኩጫ ፃውኖ
ሚዛቆ ኩጮና ጊታሢኮ ሞቶሾ ዔኪ
ሲሳራኮ ቶኦኮ ዒዛ ጳርቂ ዳኣፄኔ፤
ዋዮ ጩኡሞናኣ ጳርቂ ፃጴኔ።
27ዒዚ ዒዞኮ ቶኮ ዴማ ባሺንቲ ሎኦሜኔ፤
ዒኢካ ዒዚ ሎኦሚ ላሄኔ፤
ሎኦሜ ቤዛ ዒማካ ዒ ሃይቄኔ።
28ሲሳራኮ ዒንዳ ፔ ማኣሮኮ ፑልቶና ዛጌኔ፤
ፑልቶ ካሮ ጎኦቦና ባኮኮ ፂኢኖና ሂርጊ ዒዛ ዛጋዖ
«ታናዖኮ ሳርጌሎ ዖይታ ዎይቲ ኔጌይ?
ፓራሢኮ ሹቁሎ ካኣና ዎይቲ ባይቄይ?» ጌይ ዒዛ ዖኦጬኔ።
29ዔሮ ላኣላ ዒዞም ማሂ ኬኤዜኔ፤
ዒዛ ጋዓንቴ ሂዚ ጌይ ማሌኔ፦
30«ዔያታ ሄኤዶ ዲዒ ዔኮና ባኮ ጊሽታኣናንዳኔ፤
ፖኦሊሶፓ ፔቴ ዓሲም ፔቴ ሃንጎ ላምዖ
ዉዱሮ ናይ ዔያታ ዒንጋያ ናንዳኔ፤
ሲሳራም ዔያታ ሚዛጲ ማኣዖ ዒንጋንዳኔ፤
ሃሣ ታኣማኣ ዔያታ ባቃና ታ ማይንታንዳ
ማይሊ ኮሾና ማኣዖ ዔኪ ሙካንዳኔ።»
31ናንጊና ናንጋ ጎዳሢዮ!
ኔኤኮ ሞርኮ ቢያ ዬያይዲ ባይዜ፤
ኔና ናሽካ ዓሳ ጋዓንቴ
ፆፆርቃ ዓቢጉዲ ፖዖንጎ።
ዬካፓ ዓጬላ ዖይዲታሚ ሌዔ ዖልዚባኣያ ኮሺ ዴዔኔ።