ጌኤዦ ማፃኣፖ

1«ሃሢ ጋዓንቴ ታጊዳፓ ናንጎና ሃቶ ማዔ ዓሳ ታና ሚኢጫኔ፤
ዔያቶኮ ዓዶንሢ ታኣኮ ማራቶ ሄንቃ
ካናቶና ዎላታዖ ሶኦፓኒ ኮይሱዋ ዓሲኬ።
2ዎልቃ ላቤያና ዑፃ ዔያቶኮ ዖኦፔያ ማዔሢሮ
ታና ዔያታ ዓይጎዋ ማኣዱዋሴ።
3ሜታሢና ናዮና ሚርጌሢሮ
ዓሲ ናንጉዋ ዳውሎ ዔያታ ዓኣዺ ዓኣዺ
ሚሢኮ ፃጲ ኮይ ኮይ ዻዓኔ።
4ዳውሎይዳ ሶኦጌ ሶኦጌ ጋዓ
ዱማ ዱማ ዒላዦ ዔያታ ማንፃኔ፤
ዓኣፁዋያ ማዔ ሳሪንጎ ፃጶ ዔያታ ሙዓኔ።
5ዓሲ ዉሲ ዒላቲ ዒላቲ ዳውሳሢጉዲ
ዔያቶዋ ሃንጎ ዓሶ ባኣካፓ ዳውሲ ዳውሶኔ፤
6ዔያታ ናሽኪባኣዖ ፔኤኮ ናንጎ ቤዞ ዴኖ ዔቶና
ማጎ ዴማ ቆኦፓዼ ዔቶይዳ ማሄኔ።
7ሃሣ ዔያታ ካያ ሃንቲ ሃንቲ ሃሬጉዲ ጫኣጋኔ፤
ጊንሣ ቶሾ ዴማኣ ዶጪ ዶጪ ዎርቃኔ።
8ዢራፓና ጳርቂንቲ ጳርቂንቲ ዓጫፓ ዔያታ ዳውሲንቴሢሮ
ሱንሢ ባይቂ፥ ማሊሢባኣያ ማዒ ዔያታ ናንጌኔ።»
9«ታኣኒ ዔያቶኮ ሚኢጪ ዓማሎ ባኣዚ ማዔኔ።
10ሻኣኪንቲ ታ ኮይላፓ ዔያታ ሺኢካኔ፤
ፔቴታዖ ቦርሲንቲባኣያ ታ ቤርታ ዔያታ ጩታኔ።
11ፆኦሲ ዎልቆ ታኣኮ ላቢሲ ታና ዻውሲሴሢሮ
ዔያታ ቢፃላ ቶሌ ፓሮጉዲ
ታ ዑፃ ፂኪ ሺራኔ።
12ጎሪ ዲቺቦኦ ናኣታ ታና ማንጌኔ፤
ቶኮ ታኣኮ ዔያታ ኮሪ ኬኤሪ
ሜቶ ታና ሄሊሳኒ ጊኢጊንቴኔ።
13ታ ሃንታ ጎይፆ ዲርቂ
ታና ባይዛኒ ዔያታ ኮዓኔ፤
ዬያ ማዺፆ ቃዛ ባኣዚያ ዔያቶ ባኣሴ።
14ዲጲ ዑሪ ጌላሢጉዲ
ኬኤሎ ዲፆ ታኣኮ ዔያታ ዳርዚ ጌሌኔ፤
ቢያ ባኮ ሜንሢ ባይዚ ባይዚ ታጊዳ ዔያታ ሙኬኔ።
15ሚርጌና ታ ዲቃቴኔ፤
ቦንቻ ታኣኮ ዢባሬ ዢባርሻያጉዲ ማዒ ዓኣዼኔ፤
ታኣኮ ዻቂንቶኮዋ ሃጊ ማዓ ዎዛ
ሊኢሎጉዲ ላኣሊንቲ ባይቄኔ።»
16«ሜታሢ ታኣኮ ኮሺ ሚርጌሢሮ
ሼምፓሢ ታኣኮ ሃይቃኒ ዑኪ ሜታዼኔ።
17ዋንቶ ዋንቶ ዶዲ ሃርጌ
ሜጌፆ ታኣኮ ጋኣጫኔ፤
ሜታሢያ ታኣኮ ታና ሃውሺሱዋሴ።
18ሃርጋ ታኣኮ ዖይዼሢሮ
ዓፒላ ታኣኮ ጉርሚ ፑርቴኔ፤
ሆሌ ዓርቃ ማኣዖጉዲ ታና ጩኡሊ ዓርቄኔ።
19ፆኦሲ ታና ዾቃላ ዢቢ ኬኤሬሢሮ
ሲላሊና ዲቢንሢና ታ ማላኔ።»
20«ታ ፆኦዛሢዮ! ታ ኔ ባንሢ ዒላቴኔ፤
ኔ ታኣም ጋዓንቴ ማሂባኣሴ፤
ዔቂ ታ ኔና ሺኢቄኔ፤
ጋዓንቴ ኔ ታኣም ዋይዚባኣሴ።
21ኮሺ ኔ ታኣም ዶዴኔ፤
ኔኤኮ ዼኤፖ ዎልቆና ኔ ታና ዳውሴኔ።
22ዢባራ ዔቂሲ ዔካንዳጉዲ ኔ ታና ማሄኔ፤
ዓልጎ ዢባሬናኣ ኔ ታና ቡምባልሴኔ።
23ዓሲ ቢያም ዓቱዋያ ማዔ ሃይቢም
ኔ ታና ዓኣሢ ዒንጋንዳሢ ታ ኔና ዔሬኔ።
24ሎኦሚ ሜቄ ዓሲ ሜታዺ ማኣዶሮ
ኩጮ ፔኤሲ ዔቂሲ ዒላታዛ
ዶዳ ዓሲ ዓኣ?
25ታኣኒ ሜታዼ ዓሶ ዬኤኪባኣዓዳ?
ማንቆ ዓሶዋ ሚጪንቲ ታኣኒ ማኣዲባዓዳ?
26ኮሺ ባኣዚ ዴንቃንዳኔ ጌይ ታ ማላዛ
ፑርታ ባኣዚ ታና ሄሌኔ፤
ፖዒ ታኣም ኬስካንዳኔ ጌይ ታ ካፔንቴ
ሮኦራ ታኣም ዹሜኔ።
27ማሊፆና ታ ሜታዼኔ፤
ኮሹሞ ታ ዴንቃኒ ዳንዳዒባኣሴ፤
ኬላ ኬላ ዋኣዪፃ ታኣኮ ሚርጊ ሚርጊ ዓኣዼኔ።
28ዑፃ ታኣኮ ዓቢ ሚቼምቱዋንቴ
ዖዪፆና ካርቴኔ፤
ዓሳ ቡኪንታ ጶኦኮይዳኣ ዔቂ ማኣዶ ታ ዖኦጫኔ።
29ዓሲዳፓ ዱማዺ ዉኡኮኮ ታ ጌርሲ ማዔኔ፤
ቱኡቲኮዋ ታ ላጌ ማዔኔ።
30ታኣኮ ካርቴ ዑፃ ጎኦጊ ጎኦጊ ኬዳኔ፤
ዑፃ ታኣኮ ቆሦና ዔኤታኔ።
31ዎዞ ታኣኮ ታ ፔጋሲ ዔርዛ
ፔቴ ሻዦና ዋርቆ ጎኦሎና ዲንካሢና
ሃሢ ታኣኮ ዖዪፆ ታ ቃዪ ዋይዚሳ ዓንጋሞ ማዔኔ።»