1«ሌዋታኔ ጌይንታ ባዞ ቦዓሢ
ዓንጊ ኪሬና ባዛፓ ኔ ዓርቃኒ ዳንዳዓ?
ዒንዲርዞ ሱሲና ኔ ዒዛኮ ቱካንዳ?
2ዒዛኮ ሲኢዾይዳ ዱንዶ ዓኣሢ
ባንጋሎዋ ዒዛኮ ዓንጊ ኪሬና ጫርጊ ዓርቃኒ ኔ ዳንዳዓ?
3ዒዛ ማኣሪ ሃሻንዳጉዲ ዒ ኔና ሺኢቃንዳ?
ኮሺ ዑኡሲና ዒ ኔና ሺኢቃዳ?
4ናንጊና ዓይሌ ማዒ ኔኤም ማዻኒ
ኔኤና ዎላ ዒ ጌስቲ ጊኢጋንዳ?
5ካፒጉዲ ዒዛ ኔ ቱጊ ጌሢ
ዉዱሮ ናኣቶ ኔኤኮ ዓማልሳንዳጉዲ ቃዛኒ ዳንዳዓ?
6ሞላሢ ኮርማ ዓሳ ዒዛ ባሺ ዔካንዳኔ ጌይ
ዎላ ማንዲንታ?
ቲቂያ ዎሊና ዒዛ ዔያታ ጊሽታ?
7ኔ ኮዔ ካራና ዒልዖ ዒዛኮ ጫርጊ ዑራኒና
ቶኦኮዋ ዒዛኮ ኔ ዓጬ ዓንጊና ጫርጊ ዑራኒ ዳንዳዓ?
8ሂንዳ ዳንዳዓቴ ኩጮና ዒዛ ካኣሜ፤
ኔ ዒዛ ዓርቃኒ ማዺ ሺሬ ባኮ ፔቴታዖ ዋላዓኬ፤
ላሚ ዒዛ ኔ ዓርቃኒያ ኮዓዓኬ።»
9«ሌዋታኔ ዓርቂ ቃዛኒ ማዺንታ ባኣዚ ቢያ ጉሪኬ፤
ዒዛ ዛጌሢ ቢያ ዒጊቹሞና ጎጋይቃኔ።
10ዒዛይዳ ፑርታ ባኣዚ ማዺሢ ዬያይዲ ሜታያ ማዔቴ
ዓካሪ ታኣም ዋይዚ ዒፃኒ ጫርቃንዳይ ዖናዳይ?
11ጫሪንጮኮ ዴማ ዓኣ ባካ ቢያ ታኣሮኬ፤
ዓካሪ ታ ማሃንዳጉዲ ታኣም ታልዔሢ ዖናዳይ?»
12«ሌዋታኔኮ ቶኮንታ ዶዶ ዎልቆንታ
ሚዛጳ ዑፆ ዛሎ ታ ኬኤዙዋዖ ሃሻዓኬ።
13ዒዛኮ ዾዾ ዒልዖ ሹካኒ
ሃሣ ባንጋሎዋ ዒዛኮ ሾኦላኒ ዖ ዳንዳዓይ?
14ኮሺ ዒጊቻ ዓጫ ዓኣ ዻንጎ ዒዛኮ ቡሊ
ባንጋሎዋ ዒዛኮ ሾኦካኒ ዳንዳዓይ ዖናዳይ?
15ዒዛኮ ጊኢሮ ዒልዓ ዎሊ ሄሊሲ ጌሦና ጊቲማጉዲኬ፤
ኮሺ ዎሊ ዓርቄያ ማዔሢሮ ዓንጊጉዲ ዶዳያኬ።
16ፔቴይ ሜሌሢና ዎላ ዳዳዼያታሢሮ
ዔያቶኮ ባኣኪና ዢባሬታዎ ዓኣዻኒ ዳንዳዑዋኣሴ።
17ቢያሢ ዎላ ዓርቂንቴያታሢሮ
ዓይጎ ባኣዚያ ፔቴታዖ ዔያቶ ዱማሳኒ ዳንዳዑዋኣሴ።
18ዒዚ ፒኢዝጋ ዎዶና
ፖዒ ዜኤሊንሢ ጴዻኔ፤
ዓኣፓ ዒዛኮ ፆርቄ ዓቢጉዲ ፖዓኔ።
19ዻንጋፓ ዒዛኮ ታሚ ሎስታ ኬስካኔ፤
ታሚ ቄንሢያ ፂንቂ ጴዻኔ።
20ዲስቴ ዴይሦና ናኣቦይዳ ሻርሻ ጩባሢጉዲ
ሲኢዻፓ ዒዛኮ ጩቢ ኬስኪ ጴዻኔ።
21ዒዛኮ ዑኡዞ ዖይዹማ ቃኣጫ ዔዔኤሣኔ፤
ታሚ ሎስታ ዒዛኮ ዻንጋፓ ኬስካኔ።
22ዒዛኮ ዴዔ ባቃና ዎልቄና ዓኣያኬ፤
ዓኣፖ ካራኣ ዒዛኮ ሚርጌና ዒጊቻያኬ።
23ዓሽካ ዒዛኮ ዎሊ ዑፃ ናቲንቴያ ዳዶታሢሮ
ዑፃ ዒዛኮ ዓንጊጉዲ ዶዳኔ።
24ዒና ዒዛኮ ሹቺጉዲኬ፤
ዶዱማኣ ዎንሢ ሹቺጉዲኬ።
25ዬይ ቦዓሢ ዔቃ ዎዶና
ዎልቆ ዓሳታዖ ዒጊጪ ጎጎጋይቃኔ።
26ዓይጎጉዴ ጬንቻ ዓፓሮንታ ዎርሢንታ
ሂኢሺንታ ጫርጎ ባኣዚያ ዔኤቢ ዒዛ ዎኦቱዋሴ።
27ዒዚ ዓንጎ ማኣቲጉዲ ሜንሣኔ፤
ሞኦኖ ዓንጎዋ ሙርዔ ሚሢጉዲ ጋኣጫኔ።
28ሂኢሺ ዱኮናቴታዖ ዒጊጪ ዒ ጳሽኩዋኣሴ፤
ዎራ ሹቺ ዒዛ ኮይላ ጎቦጉዲኬ።
29ኮኦሎ ዒዚ ዓዳ ማኣቲ ማሂ ዛጋኔ፤
ዓሳ ዒዛ ዎርፆና ዶርባኣና ዒ ቦሂ ሚሚኢጫኔ።
30ዾቃሎይዳ ዒ ኮላዻኣና ዓጬ ማዔ ዒልዓ ዒዛኮ
ሳዖ ማራሻጉዲ ጳላኔ።
31ባዞ ዋኣፆዋ ፔንታ ዋኣሡጉዲ ቡርቂሻኔ፤
ዖቲ ጋርካ ፔንታ ዛይቴጉዲያኣ ዒ ቡርቂሻኔ።
32ዒዚ ዓኣዻ ጎይፃ ፖፖዓኔ፤
ባዞ ዋኣፆዋ ዒ ዱባሳኔ።
33ዒዚ ዒጊቹሞ ዔሩዋ ማዢንቲታሢሮ
ዓጪዳ ዒዛ ማላ ማዢንቲ ፔቴታዖ ባኣሴ።
34ሚርጌና ዼኤፖ ማዔ ማዢንቶታዖ ዒ ቦሃኔ፤
ዒዚ ካዮ ቦዖ ቢያኮ ዑፃ ካኣቲኬ።»