ዓይኑሞ ሱኡጋሢ ዓይሣ ጎይፆና ዓይናዺንታ ዳውቴ ዓይኑሞ
ዓሲኮ ፑርቱሞ
(ዓይኑ. 53)
1ዔኤዮ ዓሳ ፔ ዒኖና፦ «ፆኦሲ ባኣሴ» ጋዓኔ፤
ዬያጉዴ ዓሳ ማኣሳኔ ዓሲኬ፤
ዔያታ ሻኣካ ማዾ ማዻኔ፤
ዔያቶ ባኣኮይዳ ኮሺ ባኣዚ ማዻ ዓሲ ፔቴታዖ ባኣሴ።
2ማሊ ጶቂሣ ዓሲንታ
ናንጊና ናንጋ ጎዳ ኮዓ ዓሲያኣ ዓኣቶ ዴንቃኒ
ናንጊና ናንጋ ጎዳ ጫሪንጫፓ ሊካ ዓሶ ዛጌኔ።
3ጋዓንቴ ዓሳ ቢያሢ ዣኣሌኔ፤
ጉቤሢ ፔቴ ማዒ ፑርቴኔ፤
ዔያቶይዳፓ ፔቴ ዓሲታዎ ኮሺ ማዻይ ባኣሴ።
4ናንጊና ናንጋ ጎዳ፦ «ፆኦሲ ዔሪ ሺኢቁዋ ዓሶኮ
ታኣኮ ዴሮ ዓዳ ካሣጉዲ ሙዓ
ፑርቶ ማዻ ዓሶኮ ማሊ ጶቂሣ ዒኔ ባኣዓዳ?» ጋዓኔ።
5ናንጊና ናንጋ ጎዳ ፂሎ ዓሶ ባኣካ ዓኣሢሮ
ዔያታ ዓኣ ቤዛ ዓኣዖ ዲቃቲ ጋፔኔ።
6ዒንሢ ማንቆ ዓሶኮ ማሊፆ ዹቃኒ ማሌያታቴያ
ናንጊና ናንጋ ጎዳ ጋዓንቴ ዔያቶኮ ጊቲማሢኬ።
7ዒስራዔኤሌ ዓሶም ዻቂንታ ፂዮኔይዳፓ ሙካቴ ዓይጎ!
ናንጊና ናንጋ ጎዳ ፔ ዴሮኮ ዲዒንቴ ባኮ ማሃ ዎዶና
ያይቆኦቤ ዎዛዻንዳኔ፤
ዒስራዔኤሌ ዴራኣ ዒላሻንዳኔ።