«ባይዚፖ» ጌይንታ ዓይኑሞና ዓይኑሞ ሱኡጋሢ ዓይሣ ጎይፆ ካላሊንቴ ዳውቴ ካላሊ (ዳውቴ ዎዻኒ ማኣሮ ዒዛኮ ማንጋንዳጉዲ ሳኣዖኦሌ ዓሶ ዳኬያና ዒ ዓይናዼያኬ።)
ፆኦሲ ካፓንዳጉዲ ሺኢቂንቴ ሺኢጲሢ
1ፆኦሲዮ! ታኣኮ ሞርኮይዳፓ ታና ዓውሴ፤
ታና ማኣሳንሣኒ ዔቄ ዓሶይዳፓ ካፔ።
2ፑርቶ ማዻ ዓሶይዳፓ ሄሊ ታና ዓይሴ፤
ዓሶ ዎዻ ዓሶይዳፓኣ ታና ዓውሴ።
3ዔያታ ታና ካቲ ዓኣ ጎይፆ ዛጌ!
ፆኦሲዮ! ሚጪንቱዋ ዓሳ
ታ ዻቤ ባኣዚንታ ጎሜያ ታኣኮ ባኣንቴ
ታ ዑፃ ቡኪ ዔያታ ዞርቴኔ።
4ዔያታ ታ ዻቤ ባኣዚ ባኣንቴ ታና ማኣሳንሣኒ ጊኢጊንቴኔ፤
ኔኤኒ ዬያ ዛጊጋፓ ዔቂ ታና ማኣዴ።
5ኔኤኒ ቢያ ባኮ ዎይሣ ጎዳ ማዔ ዒስራዔኤሌ ፆኦዛሢኬ፤
ሜሌ ዴሮይዳ ሜቶ ዓጋኒ ኬስኬ፤
ዔያታ ፔኤኮ ጌኖ ማዾና ማዻ ባኮሮዋ
ሚጪንቱዋዖ ሜቶ ዔያቶይዳ ኬኤሬ።
6ካታሞይዳ ዔያታ ዓዳ ካኒጉዲ
ቦጪ ሃንቲ ሺራኣ ሺራ ፔኤቂ ዒባኒ ማዓንዳኔ።
7ዻንጋፓ ዔያቶኮ ኬስካ ባኮ ኔኤኒ ዋይዜ፤
ዻንጋ ዔያቶኮ ጬንቻ ዓፓሮ ዓኣኔ፤
ዔያታ፦ «ዖኦኒያ ኑኡሲ ዋይዙዋሴ» ጋዓኔ።
8ናንጊና ናንጋ ጎዳሢዮ!
ኔኤኒ ጋዓንቴ ዔያቶ ሚሚኢጫኔ፤
ሜሌ ዴሮ ቢያ ቶኦቺ ኔ ዛጋኔ።
9ታኣኮ ዶዱማሢዮ! ታና ኔ ካፔ፤
ፆኦዛሢዮ! ኔኤኒ ታኣኮ ፑኖ ካያሢኬ።
10ፆኦሲ ፔ ማኣሪፆና ታኣና ካኣማንዳኔ፤
ታ ጎዳሢ ታ ሞርኮኮ ሎኦሚፆ ታና ዻዋንዳኔ።
11ናንጊና ናንጋ ጎዳ ማዔ ኑ ጊቲማሢዮ!
ታኣኮ ዒጊና ኔኤኒ ኮሜ ኮፃያ ማዔሢ ዋሉዋጉዲ ዔያቶ ዎዺፖ፤
ጋዓንቴ ኔኤኮ ዎልቆና ዔያቶ ዜርቄ፥ ሃሣ ዻውሲሴ።
12ፔኤኮ ዔያታ ዻንጋፓ ኬሳ ጎሞሮ
ፔ ሙሱሮና ዔያታ ጌስታ ዑኡዞሮ
ዔያታ ጋዳንቂ ሉኡቃሢሮ
ፔ ዖቶርሙሞና ዓዺንቶንጎ።
13ኔኤኮ ዻጎና ዔያቶ ባይዜ፤
ዔያቶ ጋጋፒሴ፤
ያዺ ማዓዛ ፆኦሲ ዒስራዔኤሌ ዓሶ ዎይሣያ ማዔሢ
ዓጮኮ ጋፖ ሄላንዳኣና ዔርቴያ ማዓንዳኔ።
14ታኣኮ ሞርካ ጉሪ ካታሞይዳ
ካኒጉዲ ቦጪ ሃንቲ ሺራኣ ሺራ
ዒባኒ ማዒ ሙካኔ።
15ሙዖ ባይዚ ዔያታ ጳሽኪ ሺራኔ፤
ዔያታ ሚሽኪባኣያታቴ ጉሪ ቦጪ ሺራኔ።
16ታኣኒ ጋዓንቴ ኔኤኮ ዎልቆ ዛሎ ዓይናዻንዳኔ፤
ኔኤኒ ታኣኮ ፑኖ ካያሢኬ፤
ታና ሜቴ ኬሎ ኔ ታኣኮ ዹካሢኬ።
17ፆኦዛሢዮ! ኔ ታኣኮ ዱማዼሢኬ፤
ኔኤኒ ታኣኮ ፑኖ ካያሢኬ፤
ኔኤኮ ናንጊና ናንጋ ናሹሞ ኔ ታና ቤኤዛኔ፤
ዬያሮ ጋላታ ዓይኑሞ ታ ኔኤም ሺኢሻኔ።