ዓሳኣፔ ዔራቶና ካላሌ ካላሊ
ዴራ ኮሺ ናንጋንዳጉዲ ሺኢቂንቴ ሺኢጲሢ
1ፆኦሲዮ!
ናንጊና ኔ ኑና ዓይጋ ኬኤሬይ?
ሄንቆ ቦኦሎይዳ ዓኣ ኔ ማራቶይዳ ዻጋ ኔኤኮ ዓይጋ ዔኤቴይ?
2ሚናፓ ዓርቃዖ ኔ ዶኦሬ
ኔ ዒጊኒ ማዓንዳጉዲ ዓይላታፓ ሻንቂ ኔ ኬሴ
ዴሮ ኔኤኮ ማሌ፤
ሃያኮ ቤርታ ኔኤኮ ናንጎ ቤሲ ኔ ማሄ
ፂዮኔ ዹኮም ማሌ።
3ሄፆ ኔኤኮ ናንጊና ቆይዳ ማዔ ቤዞ ባንሢ ማሄ፤
ሞርካ ኔኤኮ ጌኤዦ ማኣራ ዓኣ ባኮ ቢያ ፑርቲሴኔ።
4ሞርካ፦ «ኑ ባሼኔ» ጌዒ
ኔኤኮ ጌኤዦ ማኣሮይዳ ሄርሺንታኔ፤
ባሺፆ ዔርዛ ዔያቶኮ ባንዲሮዋ ሱፄኔ።
5ካዮ ባኣካ ሚሢ ቆፃኒ
ሄርጋ ዓርቄ ዓሲ ዔያታ ማላኔ።
6ሚፆ ቃርፂ ኮጫ ሱፆና ባኮ
ሄርጋና ቆፂ፥ ሞቶሾናኣ ጳርቂ ሜንሤኔ።
7ኔኤኮ ጌኤዦ ማኣሮ ሚቺ ዔያታ ባይዜኔ፤
ኔ ሱንፆኮ ዎይፆ ቤዞዋ ዒኢሴኔ።
8ዔያታ ፔኤኮ ዒኖና፦
«ጋፒንሢ ሄርቂ ኑ ዔያቶ ዎይሣንዳኔ» ጌዔኔ፤
ሳዔሎይዳ ፆኦሲ ካኣሽኪንታ ቤዞ ቢያ ዔያታ ሚቼኔ።
9ማይ ኑ ዛጋንዳ ማላታ ማዓ ባኣዚ ባኣሴ፤
ፔቴታዖ ፆኦሲ ማሊሢ ኬኤዛኒ ኬስካ ዓሲያ ባኣሴ፤
ሃይ ዎማ ሄላንዳኣና ሃማይዲ ዴዓቴያ
ዔራይ ኑ ባኣካ ባኣሴ።
10ፆኦሲዮ! ሞርካ ሚኢጫሢ ዎማ ሄላንዳኣናዳይ?
ኔ ሱንፆ ጫርቂ ዔያታ ቶኦቻሢ ዎማካ ጋፓይ?
11ኩጮ ኔኤኮ ኔ ዓይጋ ማሂ ዔካይ?
ሚዛቆ ኩጮ ኔኤኮ ሾኦጶ ዴማ ዓይጋ ዳካይ?
12ፆኦሲዮ! ሚናፓ ዓርቃዖ ኔ ታኣኮ ካኣቲኬ፤
ሳዖይዳ ኔኤኮ ዓውሲፆ ማዾ ኔ ማዼኔ።
13ኔኤኮ ዎልቆና ባዞ ፓቄሢ ኔናኬ፤
ባዞይዳ ናንጋ ቦዖኮዋ ቶኦኮ ዋኣፆይዳ ኔ ዳኣፄኔ።
14ሌዋታኔ ጌይንታ ቦዖኮ ቶኦኮ ኔ ጋኣጬኔ፤
ዓሲ ናንጉዋ ዳውሎ ማዢንቶማዋኣ
ሙኡዚ ማሂ ኔ ዒንጌኔ።
15ዓልቃ ዋኣፆንታ ዎታ ዎሮንታ ዑሬሢ ኔናኬ፤
ቢያ ዎዴ ዎታ ዎሮ ኔ ሚጪሴኔ።
16ሮኦሮንታ ዋንቶንታ ኔኤሮኬ፤
ዓጊኖና ዓቦና ኔኤኒ ዶዲሺ ዴይሤኔ።
17ሳዖኮ ማዓ ካሮ ጌሤሢ ኔናኬ፤
ዖጎፆንታ ባርጎንታ ኔኤኒ ኬሴኔ።
18ናንጊና ናንጋ ጎዳሢዮ!
ኔ ሞርካ ኔና ቦሂ ዓማላሢ ዛጌ፤
ዔያታ ዔኤያ ማዔሢሮ ኔ ሱንፆይዳ ጫርቃኔ።
19ኔኤም ዎርቃ ሼምፓሢ ቦዖም ዓኣሢ ዒንጊፖ፤
ኔኤም ማዻዞንሢኮ ሜቶ ናንጊና ዋሊፖ!
20ጫኣቁሞ ኔኤሲ ማሌ፤
ዋይዚ ዒፂሢ ቡኬ ቤሲ
ሳዔሎኮ ዹሜ ጊንፃ ኩሜኔ።
21ሄርቂንቲ ዎርቃዞንሢ ቦርሲንቲ ማዖፓ፤
ማንቆንታ ሜታዼ ዓሶንታ ሱንፆ ኔኤሲ ጋላቶንጎ።
22ፆኦሲዮ! ዔቄ!
ኔ ጌኤዞ ዛሎ ሞኦቲንቴ፤
ፓሡዋ ዓሳ ሮኦሮ ጉቤ
ኔና ቶኦቻሢ ዛጌ።
23ኔ ሞርኮኮ ሄርሺንቶ
ቢያ ዎዴ ዺቢ ዺቢ ዓኣዻ ሆኦሊንቶ
ዔያቶኮ ኔኤኒ ዋሊፖ።