ዓይኑሞ ሱኡጋሢ ዓይሣ ጎይፆ ሹሉንጎና ዓይናዺንታ ዓሳኣፔ ዓይኑሞ
ቦንቾ ኬሊና ዓይናዺንታ ዓይኑሞ
1ኑኡኮ ዶዱማሢ ማዔ ፆኦዛሢም ዓይናዹዋቴ!
ያይቆኦቤ ፆኦዛሢም ዒላሹዋቴ!
2ዓይኑሞ ዓርቁዋቴ፥ ታምቡሮዋ ባዑዋቴ፤
ፔቴ ሻሺና ዴንሢ ዋርቆ ጎኦሎንታ
ሜሌ ዓይኑሞ ዓንጋሞዋ ዴንሢ ኮሺ ዑኡሲና ዓይናዹዋቴ።
3ዓጊና ፄኤራኣና ጊንሣ ዋኣፃ ጌላኣና
ዼኤፖ ቦንቾ ኬሎናይዳኣ ዛዬ ዋርቁዋቴ።
4ዬይ ዒስራዔኤሌ ዓሶም ዒንጊንቴ ዳምቤ
ያይቆኦቤ ፆኦዛሢ ኬሴ ዎጌኬ።
5ዒዚ ጊብፄ ዓጮይዳ ሜቶ ዓጌ ኬሎና
ዬይ ዮሴፔም ኬሶናያኬ፤
ታ ዔሩዋ ሙኡቺና ሂዚ ጋዓንቴ ታ ዋይዜኔ፦
6«ጌኤቶ ታ ዒዛኮ ኬዲዳፓ ሃውሺሴኔ፤
ኩጫ ዒ ዔካ ዴኤፆ ባኮ ታ ዒዛ ሃሺሴኔ።
7ኔና ሜቴ ዎዶና ኔ ታና ዔኤሌኔ፤
ታኣኒያ ኔና ዓውሴኔ፤
ታ ዓኣሺንቲ ዓኣ ዹሞ ሻኣሮ ጉጉንፆሲ ባኣካ ዓኣዖ
ታ ኔኤም ዋይዜኔ፤
ዣላሢ ዎሮኮ ዋኣፃ ዓልቃ ቤዛ
ኔ ዎይታቴያ ጌዒ ታ ኔና ዛጌኔ።
8ታ ዴሬዮቴ! ታ ላታ ባኮ ዋይዙዋቴ፤
ዒስራዔኤሌ! ኔ ታኣም ዋይዛቴ ዓይጎ!
9ኔ ካኣሽካ ፃንጎ ፆኦሲ
ሃሣ ዔርቱዋ ፆኦሲ ኔኤኮ ባኣያ ማዖንጎ፤
ዬያ ካኣሽኪፖ።
10ጊብፄ ዓጫፓ ኔና ኬሴ ናንጊና ናንጋ ጎዳ ማዔ
ኔ ፆኦዛሢ ታናኬ፤
ዻንጎ ኔኤሲ ኮሺ ሾኦኬ፤
ታኣኒ ኩንሢ ኩልሳንዳኔ።»
11«ታኣኮ ዴራ ጋዓንቴ ታኣም ዋይዚባኣሴ፤
ዒስራዔኤሌ ዓሳኣ ታኣም ዓይሢንቲባኣሴ።
12ዬያሮ ዔያታ ማሌ ማሊፆጉዴያ ዓኣዻንዳጉዲ
ዔያቶኮ ባይቄ ዒኖም ዓኣሢ ታ ዔያቶ ዒንጌኔ።
13ታ ዴራ ዎንዴ ታኣም ዋይዜያ ማዔያታቴ
ዒስራዔኤሌ ዓሳ ታ ጎይፆና ዓኣዼያታቴ
14ቤዞና ታ ዔያቶኮ ሞርኮ ባሼያ ናንዳንቴኬ፤
ዔያቶ ሞርኮ ዑፃ ታ ኩጮ ታ ዔቂሴያ ናንዳንቴኬ።
15ፆኦሲም ዋይዞ ዒፃ ዓሳ ዒዛ ቤርታ ዻውሲንታንዳኔ፤
ዔያቶ ሄላ ሜታሢያ ናንጊና ጋፑዋያ ማዓንዳኔ።
16ዒንሢ ታ ጋዓንቴ ኮሺ ዛርጌ ሙኡዛንዳኔ፤
ዑታሢ ዔኤዞና ታ ዒንሢ ሚሻንዳኔ።»