ዑኡቴሎ ዓይኑሞ
1ታኣኒ፥ ሳኣሮኔ ቦኦሎ ቡኖጉዲ
ዶኦቺዳ ባቃሌ ሚዛጲ ቡኒጉዲኬ።
ዑኡታሢ ዓይኑሞ
2ታኣኮ ሚሼላ፥ ኔኤኒ ዉዱራሢ ባኣካ ጴዻ ዎዶና
ዓንጊሢ ባኣካ ዓኣ ሚዛጲ ቡኒጉዲኬ።
ዑኡቴሎ ዓይኑሞ
3ታኣኮ ዒሼ፥ ሜሌ ዼጌሢና ዎላ ቤኤዞዛ
ካዮ ሚፆ ባኣካ ሚዛጲ ጴዻ ጋሲጉዲኬ፤
ታኣኒያ ሚርጌ ታና ዎዛሴም ዒዛኮ ሺባ ዴይ ሃውሼኔ፤
ዓኣፖዋ ሙይ ታኣኒ ዎዛዼኔ።
4ዒዛኮ ሙዖ ሙዎ ዳልጎ ኬኤፆ ታና ዒ ጌልዜኔ፤
ዒ ታ ዑፃ ባንዴራ ማሂ ዓርቄ ባካ ናሹሞኬ።
5ታ ዒዛ ናሽኪ ሃርጊንቴሢሮ
ዎይኖኮ ሜሌ ዓኣፖ ሙኡዚ ታና ዶዲሹዋቴ፤
ጋዞ ዓኣፖዋ ሙኡዚ ታና ዎዛሱዋቴ።
6ፔኤኮ ሻውሎ ኩጮ ኬሬ ማሂ ጌሣኔ፤
ሚዛቆ ኩጮና ታና ዒ ኮንቃኔ።
7ዒንሢ፥ ዬሩሳላሜ ዉዱራሢ!
ዒዚ ፔኤሮ ኮዓንዳያ ሄላንዳኣና
ዒዛ ዒንሢ ካኣሚ ጴቹዋጉዲ፤
ካዮ ቦዖ፥ ዶቆዞና ሞይሎ ሱንፆና
ታኣኒ ዒንሢ ሺኢቃኔ።
ላምዓሳ ዓይኑሞ
ዑኡቴሎ ዓይኑሞ
8ታ ዒሼ ዹኮና ጌሜሮና ዑፃ ኮኦሚ ኮኦሚ ሙካኣና
ዑኡዛ ዒዛሲ ታኣም ዋይዚንታኔ።
9ታኣኮ ዒሼ፥ ሞይሌና ዶቆሲናኮ ናይ ማላኔ፤
ሃይሾ ኑ ማኣሮኮ ቲኢፆ ዓጫ ዒ ዔቂ ዓኣኔ፤
ማኣሮኮ ፑልቶ ካሮና ጋሮ ባንሢ ዒ ዛጋኔ፤
ፑልቶ ካራ ጋሲ ኮሾና ፂኢኖና ሞኦኪ ዒ ታና ዛጋኔ።
10ታ ዒሼ ሂዚ ታኣም ጋዓኔ፦
ዑኡታሢ ዓይኑሞ
ታ ሚሼሌ! ዔቄ፤
ታኣኮ ሚዛጴሌ! ሃኒ ዬኤ ኑ ዎላ ዓኣዾም፤
11ማይ፥ ባርጋ ጋፔኔ፤
ዒራኣ ሻንቄኔ፤
12ዱማ ዱማ ቦኦሎ ቡና ቡኒፆ ዓርቄኔ፤
ዓይናዺ ኮርጎ ዎዳ ሄሌኔ፤
ዶኦሎ ዱላሢያኣ ኑ ዓጫ ዋይዚንታኔ።
13ቤሌሶ ሚፃ ዓሚፆ ዓርቄኔ፤
ዎይኖ ቡኖ ሳውማ ሳዖ ዔኬኔ፤
ዬያሮ ታ ሚሼሌ! ዔቄ፤
ታኣኮ ሚዛጴሌ! ሃኒ ዬኤ ኑ ዎላ ዓኣዾም።
14ጋጋ ዓኣ ላሎ ዛኣዚንፆይዳ
ዓኣሺንቲ ዴዔ ታኣኮ ዶኦሌሌ
ሂንዳ ዓኣፖ ካሮ ኔኤኮ ታና ዻዌ፤
ዑኡዞዋ ኔኤኮ ታና ዋይዚሴ፤
ዑኡዛ ኔኤኮ ታና ዎዛሳያ
ኔኤኒ ኮሺ ሚዛጳያኬ።
ዑኡቴሎኮ ጌርሲንሢ ዓይኑሞ
15ዎይኖ ጎዣ ቡኒ ዓኣ ዎይኖ ፑርቲሳ
ዬያ ዻኮ ዻኮ ዉኡካሢ
ፒሪ ኑም ዓርቁዋቴ።
ዑኡቴሎ ዓይኑሞ
16ታ ዒሼ ታኣሮኬ፥ ታኣኒያ ዒዛሮኬ፤
ዒዚ ሚዛጶ ቡኖ ባኣካ ቆልሞ ፔኤኮ ሄንቃኔ።
17ዹማ ካራንዳያ ሄላንዳኣና
ጉቶ ዢባራ ዢባርሻንዳያ ሄላንዳኣና
ታ ዒሼ! ሞይሌ ናይ፥ ጊንሣ ሃሣ ዶቆሲ ናይጉዲ
ጋጎ ማዔ ዹኮ ቶኦካ ኮኦሚ ኮኦሚ ማዒ ሙኬ።