Kʉnanjɨkha ɨnhaaya ɨya mu Babeeli
1We gaashɨla ganaago, ɨnhamʉlola ʉkhabhɨzya ʉwamwabho akwikha kufuma kʉmwanya. Áamɨle nʉ waamʉlo ʉwʉpɨtɨ, nɨ nsɨ yɨkhalamɨlwa nʉ lʉkhozyo ʉlwa wumwamu waakwe. 2Akhazingula ɨshongo kwi zi ɨlya kʉdandɨzya akhatɨ,
“Waagwa, waagwa Babeeli, ɨnhaaya yiila ye mpɨtɨ!
Ishi wabha wɨɨkhalo wa maseetani
na mapepu amabhiibhi,
wabha wɨɨkhalo wi nyonyi imbiibhi zyonti ɨzya kuviisya.
3Kʉnongwa ye ɨnsɨ zyonti zikholiilwe
ku divaayi inhali ɨya wubhembu waakwe,
bhoope abhamwene abhɨ nsɨ zɨnɨɨzyo
bhabhembushile nawo.
Bhoope bhe bhakʉkazya abha mʉ nsɨ
bhawaajile uwudumbwe
kufuma mʉ wʉnavɨgane waakwe
we wujiniizye nhaani.”
4Ɨnhɨmvwa izi ilinji kufuma kʉmwanya lɨkʉtɨ,
“Yeepi kʉkwakwe ɨmwe mʉbhantʉ bhaanɨ,
kʉtɨ mʉtakhabhe peeka nawo mu mbiibhi zyakwe,
ɨnga ulufundo lwakwe lʉtakhabhaaje.
5Kʉnongwa ye imbiibhi zyakwe mpɨtɨ nhaani,
khabhɨlɨ zifishile kʉmwanya,
ʉMʉlʉngʉ akʉmbʉkha imbiibhi zyakwe.
6Mʉmʉbhombele anza she woope ábhabhombeeye abhanjɨ,
mʉmʉtabhʉlɨzye khonti khabhɨlɨ
kʉ gaala ge ábhombile.
Mʉ shɨkoopa shaakwe she abhasanganyiinye,
ɨmwe mʉmʉsangaanye khonti khabhɨlɨ.
7Mʉmʉyɨmvwe na kʉmʉvwalazya mʉ mwoyo
kufumilana na kʉyɨbaada kwakwe,
nɨ nsʉngʉkho zyakwe.
Kʉnongwa ye akʉyɨbaada mʉ mwoyo waakwe kʉtɨ,
‘Ɨne ɨnkwɨkhala mwɨ tengo lyanɨ,
na kʉtabhaala anzʉ mwene ʉmwantanda.
Ɨne te neene nʉmʉfwɨle,
khabhɨlɨ te ɨnhaswɨmɨɨlɨle naalumo!’
8Kʉnongwa ya ganaago, akhayɨposheela uwugoji waakwe
kwi siku lyeka,
uwufwe, uwuswimiilizu nɨ nzala.
Khabhɨlɨ akhayɨyazwa kʉ mwoto,
kʉnongwa ye ʉMwene ʉMʉlʉngʉ
ʉweene we amulonjile alɨ na makha.”
9Abhamwene abhɨ nsɨ bhe bhabhembushile nawo na kʉbhomba ɨvɨgane peeka nawo, bhakhayɨlɨla na kʉyɨlʉmbʉʉzya we bhaalola ilyosi ɨlyɨ nhaaya yɨnɨɨyo we yɨkwakha na kʉnanjɨkha. 10Bhakhayɨmɨɨlɨla ukutali kʉnongwa ye bhakwogopa amayɨmba gaakwe na kʉlonga kʉtɨ,
“Ʉsheleeye! Ʉsheleeye ɨwe Babeeli!
Ɨnhaaya ye yivwinshile, khabhɨlɨ nhaaya ɨya makha!
Kʉ khabhalɨlo akhɨ saala yeeka bhʉʉlo
ulufundo lwakho lwakwaga.”
11Bhoope bhe bhakʉkazya abhɨ nsɨ zyonti bhakhayɨlɨla na kʉyɨlʉmbʉʉzya, kʉnongwa ye atalɨɨpo umuntu wowonti we akhayɨkala ivintu vwabho. 12Kwe kʉtɨ atalɨɨpo we akhayɨkala izahaabu yaabho nɨ nhela na mawe agɨ nhela ɨmpɨtɨ ni luulu ni kitaani inyinza. Khabhɨlɨ atalɨɨpo we akhayɨkala amenda amashamamizu ni haliili na menda amashamamu nɨ vɨkholo vwonti ɨvwa makwi ge gakununshiilila. Khabhɨlɨ atalɨɨpo we akhayɨkala ɨvɨlɨɨlo ɨvwɨ mpembe izyi nzovu nɨ vwa makwi agɨ nhela ɨmpɨtɨ nɨ vwɨ shaaba nɨ vwa shɨjela ni vwi malumaalu, 13umudalasiini, iliiki, uwuvumba, nɨ manemaane, nu wuudi ni divaayi na mafuta nu wusu uwinza nɨ ngano. Khabhɨlɨ atalɨɨpo we akhayɨkala ɨngʼombe nɨ ngoole ni falaasi ni vidodombwi na bhantʉ bhe bhatumwa.
14Bhe bhakʉkazya bhakhayɨtɨ, “Ivintu ivwinza vwe vwawʉsʉngʉsyaga ʉmwoyo waakho vwateega, uwudumbwe nɨ togo lyakho vwakupulukha, te ʉkhaakhole kʉvwaga winza!” 15Bhe bhakʉkazya bhanaabho bhe bhawaajile uwudumbwe kufuma mʉ nhaaya yɨnɨɨyo, bhakhayɨmɨɨlɨla ukutali kʉnongwa ye bhakhayoogopa amayɨmba gaakwe. Bhakhayɨlɨla na kʉyɨlʉmbʉʉzya, 16bhakhayɨlonga bhakhayɨtɨ,
“Yɨsheleeye! Yɨsheleeye ɨnhaaya ɨmpɨtɨ!
Waalʉbhɨɨye kʉkwata amenda aminza
amazelu aga kitaani,
amashamamizu na mashamamu
na kʉyɨbhɨngʉlanya ni zahaabu
na mawe agɨ nhela ɨmpɨtɨ ni luulu!
17Kʉ saala yeeka bhʉʉlo
uwudumbwe waakwe wananjɨkha!”
Khabhɨlɨ bhe bhakʉjenzya imeeli bhonti na bhe bhakʉshʉʉla bhoope na bhonti bhe bhakʉbhomba ɨmbombo mwa sʉmbɨ, bhakhayɨmɨɨlɨla ukutali. 18We bhaalola ilyosi ɨlya mwoto wuula we wʉkhayɨyɨnanganya, bhakhayizingula ɨshongo kwi zi ɨlya kʉdandɨzya bhakhayɨtɨ, “Yɨtalɨɨpo naalumo ɨnhaaya anzɨ nhaaya ɨmpɨtɨ ɨnɨ!” 19Bhakhayɨsʉmbɨla amasuuto mʉ matwe gaabho kumo bhakʉlɨla na kʉyɨlʉmbʉʉzya kʉtɨ,
“Yɨsheleeye! Yɨsheleeye ɨnhaaya ɨmpɨtɨ!
Ɨnhaaya ye bhonti bhe bhalɨ ni meeli mwa sʉmbɨ,
bhashaajile ɨshʉʉma kufuma mu wudumbwe waakwe.
Kʉ khabhalɨlo akhɨ saala yeeka bhʉʉlo
wananganya ivintu vwonti!
20Seshelaji ɨmwe mwanya, nɨɨmwe bhafinjile.
Seshelaji ɨmwe bhasundikwa, nɨɨmwe bhakuwi!
Kʉnongwa ye ʉMʉlʉngʉ ayilonjile ɨnhaaya
kufumilana na gaala ge yaabhabhombeeye ɨmwe!”
21Pe ʉkhabhɨzya ʉmo ʉwa makha akhabhʉʉsya iwe lye likholiine ni we ɨlya kʉsyela, akhalɨsʉmba mwa sʉmbɨ na kʉlonga kʉtɨ,
“Ishi she iBabeeli yɨkhayɨsʉmbwa na kʉteega nzɨɨla.
22Amazi aga vɨnanda ɨvɨpɨtɨ na ga kwɨmba,
amazi agɨ mfwɨlɨmbo na ga makakaavu,
te gakhavwɨnshe naalumo kʉkwakho.
Te akhabhe we akʉgomba wowonti
kʉnʉʉkwo kʉkwakho,
poope izi lyi we ɨlya kʉsyela
te lɨkhavwɨnshe naalumo kʉkwakho.
23Ʉlʉkhozyo ʉlwɨ taala te lʉkhaloleshe winza kʉkwakho,
poope izi ɨlya we akwega na we akwegwa,
te gakhavwɨnshe naalumo kʉkwakho.
Kʉnongwa ye abhabhombi bhaakho bhe bhakʉkazya
bháamɨle bhapɨtɨ mʉ nsɨ.
Khabhɨlɨ ku wulozi waakho ɨnsɨ zyonti zyákhopeliilwe!
24ɄMʉlʉngʉ akhayɨyɨlonga ɨnhaaya yɨnɨɨyo,
kʉnongwa ye kʉkwakwe
kwámɨle ɨbhanda ɨlya bhakuwi
nɨ lya bhafinjile nɨ lya bhantʉ abhanjɨ bhonti,
bhe abhalʉgʉ bha Mʉlʉngʉ bhabhagojile mʉ nsɨ.”