1Xaitamoxi Nebukadnesa tabina lipuxing oxatanamdi ba ditongtongia babu tela mana gol. Maxaxayanganoa bila 27 mita, saing tubunganoa bila 3 mita. Dirang mali mana titi gomanoa duxu ba Dura mana probinsia Babilon. 2Baing ina naga, wagi lipuxindi dima—gabanadi, kiapdi, kaunseldi, lipu hatuminga sinaikkamdi, lipu siang wasanganamdi, lipu suxuyangamdi, madyistretdi—probinsiadi yanamiding longgalo. Baladi ba dima bu daxaxa babua rang mali. 3Binabu yanaminadi bagudi li dima dili babua ba maxania.

4Baing lipu habiangama wagi sabanga ba, ”Ang lipu numanuma xangxanganam mana, ang lipu bakbak xangxanganam mana, ang lipu xuaxua xangxanganam mana, alungu xaitamoxi tabinanganoa to! 5Bungina alungu toxiadi, panggeriangadi, gitadi, hapdi, waguadi, xaung axamang olaiyamdi disau, bing hata sibuna li agung kim tuxundi mari asabu mana babua gol xaitamoxi Nebukadnesa rang mali ba. 6Lipu gaxarea diyamu tabinangua disabu te, bagula am gaxap am gating mari yap saliang sibunia.”

7Baing ina naga, bungina dilungu axamang olaiyamdi disau, lipu longgalo—numanuma xangxanganamdi, bakbak xangxanganamdi, xuaxua xangxanganamdi—ding digung kiding tuxundi mari saing disabu mana babua gol xaitamoxi Nebukadnesa rang mali ba.

8Ne lipu hatung suxinganam teladi* dila rangua xaitamoxi(a) saing disu haruangua na Yudadi. 9Dibaxanga na xaitamoxi(a) ba, “O Xaitamoxi, uwa bungingbunginalo! 10Ung guhanaunau ba bing lipu longgalo digung kiding tuxundi mari disabu mana babua gol bungina dilungu toxiadi, panggeriangadi, gitadi, hapdi, waguadi, xaung axamang olaiyamdi disau. 11Xauna, uhanaunau ba lipu gaxarea diyamu bagula ditingdi mari yap saliang sibunia. 12Ne Yuda teladi umogudi ba duwa yanamdi etua mana Babilon oxatandi, adi ba Satrak, Mesak xaung Abetnego. O Xaitamoxi, tuwadi ba diyamu tabinangama. Disina yaya na urana ungiadi te, xaung disabu mana babua gol urang mali te.”

13Baing Nebukadnesa atin disala buk. Tabina ba daxai Satrak, Mesak, Abetnego tung dima maxania. Binabu daxaidi ma xaitamoxi(a) maxania. 14Nebukadnesa harua na dingtung ba, “Satrak, Mesak, Abetnego, ngalungu ba asina yaya na urana ngayuadi te, xaung asabu mana babua ngarang mali te. Maxuna? 15Nabu bila ba, bagula ngasina ganangang taininau muli ing ganina ba agung kim tuxundi mari asabu mana babua ngatongtongia ba. Bungina alungu toxiadi, panggeriangadi, gitadi, hapdi, waguadi, xaung axamang olaiyamdi disau, nabu asabu mana, bing sangau. Ne tegu, bing hata sibuna li bagula ditinggang mari yap saliang sibunia. Baing urana baruamta sanga ba xapkang muli sangua rimagia?”

16Baing Satrak, Mesak, Abetnego tung dahaxuya ba, “Xaitamoxi Nebukadnesa, amtum haruangamam te mana baraxinta ubo ba ulibu mamtum. 17Nabu ditinggam mari yap saliang sibunia, bing Urana am gatuxu oxatanoa mana ba, ina naga sanga ba xapkam muli. Xaitamoxi(a), ina bagula xapkam muli sangua rimamia. 18Ning heku hauliam kimbo hauliam te, amtum gabo ba am gaharua rangrang naung xaitamoxi(a) ba, bagula amtum gasabu mana urana ungiadi kimbo babua gol urang mali te.”

19Baing Nebukadnesa atin disala buk mana Satrak, Mesak, Abetnego tung, saing ramramonoa doa. Tabina ba diyaha yaba laing yahanoa dali mugamuga bila 7. 20Baing tabina lipuxing haungingam teladi daharing sibuna ba digoxi Satrak, Mesak, Abetnego tung, saing diting dingtung mari yap saliang sibunia. 21Binabu digoxi dingtung disau imangidingdi saing ditingdi mari yap saliang sibunia. 22Baing mana namua xaitamoxi(a) tabinadi haringina ba dibura yaba buk bila ba, bing bungina lipu haungingamdi daxai dingtung ditingdi mahaing, yap mananadi ditau lipu haungingamgadi ba mati. 23Baing Satrak, Mesak, Abetnego tung xungdi mari yap saliang sibunia, waxuadi daharingguyu.

24Nebukadnesa bagu, baing hata sibuna li hixi mana axa bagu ba saing mesa li. Baing xusunga lipuxing hatuminga sinaikkamdi ba, “Lipu tuwadi tagoxidi tatingdi mari yabia, bo?” Baing dahaxuya ba, “Wane, O Xaitamoxi. Maxung sibuna.” 25Baing harua ba, “Si! Ngabagu lipu luwadi luwadi dahaxa maluxu yabia. Ne waxuadi hasiading saing yaba hanggalangiadi te! Baing lipu luwa luwa ba bagunganoa bila urana tela baing!”

26Baing Nebukadnesa ila haxek monga mana yap xaluxinoa saing wagi ba, “Satrak, Mesak, Abetnego! Angtung lipu oxatamdi mana Urana Eta Loam Sibuna, asok ma! Ama to!”

Binabu disok ma sangua yaba. 27Baing gabanadi, kiapdi, kaunseldi xaung lipu hatuminga sinaikkamdi dibura taxiyadi saing dibagu ba yaba hanggalangia dingtung sanggading te. Toxoloding tela tau te, imangiding tela tau te. Doxola mana yap bunuxuyang saminoa baing!

28Baing Nebukadnesa harua ba, “Taiti Urana mana Satrak, Mesak, Abetnego yanoa! Soxi uleginama ba xap muli lipuxing oxatamgadi dahatum haringina mana ba. Diyamu tabinangagua, dahaxi ba disabu mana Urana dingia ing ganina, saing muruding ba dimati nam disabu mana urana tela. 29Binabu ngahanaunau bila li: Nabu lipudi mana numanuma tela, bakbak tela kimbo xuaxua tela ding daharungia Urana mana Satrak, Mesak, Abetnego, bing bagula ngatabina ba ditaxitaxidi xaung duxui numadingdi dahaxuru sangsangindi. Urana tela sanga ba xap muli bila li te!”

30Baing xaitamoxi(a) sina oxata haunua dali mugamugangama na Satrak, Mesak, Abetnego tung mana probinsia Babilon.